四大日式壽喜燒推介 東京米芝蓮、觀塘小店$498 A5和牛套餐
2022-06-23

雖然而家仲未返到鄉下旅行,掛住日式美食特別係壽喜燒,好在香港都有唔少供應日式壽喜燒嘅餐廳畀大家止癮。今次介紹四間各有所長嘅壽喜燒餐廳畀大家,有高性價比嘅、日本東京過江龍、一位難求嘅壽喜燒專門店及棉花糖A5和牛壽喜燒專門店,無論你鍾意咩風格都無問題!


$498 A5和牛套餐 喰楽  

想食正宗壽喜燒但又想經濟啲,呢間位於觀塘工廈,主打高性價比嘅壽喜燒及日式定食餐廳就啱晒你。餐廳有齊關東同關西兩種唔同風格,關西壽喜燒由最平嘅美國產牛肉到日本產和牛都有,日本產和牛會按時令挑選唔同產地嘅A4至A5和牛,只係$498就食到,同坊間嘅壽喜燒餐廳相比真係好抵食。套餐亦包括三式前菜、野菜拼盤、特式飯點,同是日甜品。想食平啲嘅話就可以下晝嚟食關東壽喜燒鍋,同樣有呢三款牛肉選擇,食法係Shabu Shabu形式,湯底一樣香甜。

圖: tgifri.food


日本東京名店 日山  

1928年已於東京成立嘅日本壽喜燒名店,三年前正式進駐香港。裝潢以傳統日式大宅為設計靈感,真係好似返咗鄉下咁。分別供應三個價位嘅壽喜燒套餐,第一次去嘅建議可以試吓中價位嘅「日山.竹」套餐,包括前菜、壽司、季節魚料理、野菜盛、A5 黑毛和牛西冷兩片、飯或烏冬及甜品。壽喜燒湯汁由餐廳東京廚師親自熬製完成再空運來港,入口濃郁,甜味恰到好處。和牛花紋有如大理石,第一片要點日本生蛋連大蔥食,入口即溶,油脂爆發。而第二片就會連埋其他蔬菜盛於小碗中享用,所有材料都吸收晒醬汁,送飯食一流!

圖: kimmicheuk


關西風壽喜燒 すき焼 森

一位難求嘅壽喜燒專門店,想食分分鐘要等幾個月呀。餐廳都係主打關西風壽喜燒,$680嘅dinner course都幾抵食,有齊前菜、蒸物、野菜、壽喜燒、飯或烏冬及甜品。牛肉係A4近江牛,由淡味至濃味排列好,包括肉眼、西冷、油牛肩及嫩牛肩,以少量嘅湯汁配合砂糖去提升牛肉嘅層次。特別推介嫩牛肩,入口夠肉味,輕嚼有彈牙感,配埋生蛋同白飯食真係無得輸。

圖: RosaTsang6219


棉花糖A5和牛壽喜燒專門店 十侍 

最吸睛當然係棉花糖A5和牛壽喜燒喇,絕對係相機食先之選!先用棉花糖起爐,之後再加入自家秘製壽喜燒汁,套餐選用日本鹿兒島A5黑毛和牛,煮好後沾上蘭王蛋漿,油脂於口中溶化,牛香滿滿。套餐另外配有新鮮當造的季節野菜盛合及稻庭烏冬或日本白米飯,兩個人食非常滿足呀~

圖: CAROLCHUNG430


文:Yanica


關鍵字
日本菜
壽喜燒
日式料理
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
4天前
【2022生日優惠】持續更新!7月壽星免費嘆自助餐/海鮮燒肉放題半價
3天前
5月份好評餐廳十強
2022-06-06
酒店新出「北歐神話」下午茶 10款鹹甜點色彩繽紛 多款海鮮入饌
2022-06-10
銅鑼灣和牛燒肉及料理放題 120分鐘任食 自家農場A4、A5黑毛和牛
2022-06-16