嘆麻糬班戟+一汁三菜和食 旺角新開天台咖啡店(有片)
2020-02-17

旺角上海街618號活化後有唔少餐廳進駐,包括呢間上環開過嚟嘅咖啡店。特色班戟配料豐富之餘裡面仲有麻糬,新增一汁三菜和食,食得豐富又夠均衡。加分點係咖啡店開喺頂樓,室外可以吹下風,室內亦有大玻璃窗,自然採光感覺特別舒適。
 


蟲二意思即係「風月無邊」,係上環特色班戟店3rd Space嘅旺角分店,上環店嘅主食以西式為主,新店就會以日本飲食文化當中嘅「一汁三菜」作為靈感推出套餐。上環店嘅招牌班戟旺角店都有,仲有新店限定嘅桂花口味呀!
 


一汁三菜($140,配熱茶)

一汁三菜即係一碗湯加三道菜配飯,套餐包括柴魚湯、63度慢煮極上太白蛋、杏脯汁漬小番茄、香菇越光米股米飯,同自選主菜。主菜有三個選擇:赤味噌清酒燉豚肉、紅酒黑醋無花果燉牛肋粒,蘋果野菜咖喱日式雞肉。
 


三道菜都好有心思,餐廳推介嘅紅酒黑醋無花果燉牛肋粒口感鬆化,而且紅酒香突出又入味,紅蘿蔔味道亦帶甜。杏脯汁漬小番茄上面以桂花點綴,食起嚟Juicy而唔會太酸,旁邊嘅山藥片口感爽脆,相當醒胃。而63度慢煮極上太白蛋已經加咗醬油,撈飯一齊食真係無得輸!
 


伯爵茶傳統班戟($85)

上環店大受歡迎嘅伯爵茶傳統班戟呢度都有,厚身嘅班戟口感比較實,不過亦夠鬆彈。最驚喜嘅係裡面有煙韌麻糬,口感層次豐富!
 


班戟上面有燒海鹽芝士忌廉醬、牛乳雪糕、百花蜜、鮮果同脆脆,燒海鹽芝士忌廉醬表面香脆裡面Creamy,帶焦香同同海鹽嘅鹹味,平衡返牛奶雪糕嘅甜度,而且同班戟上面嘅香蕉都好夾。
 

更多【新店直擊】:
1. 上環新開泰式菜館 主打泰北名菜12款香料咖喱牛金麵
2. 香港首推煙韌白布烏冬!大角咀新日本料理研究所
3. 蕃茄全蟹意粉/龍蝦牛油果多士/開心果Pancake 尖沙咀日本班戟店獨家新菜式



HERSHEY朱古力肉桂西多($85)

另一甜品係朱古力肉桂西多,同一般西多士唔同嘅係係用朱古力海綿蛋糕代替麵包,沾蛋汁再煎,香口得嚟比一般西多士嚟得輕盈。
 


同樣配燒海鹽芝士忌廉醬、牛乳雪糕、百花蜜、鮮果、脆脆,再加埋朱古力醬,朱古力味濃郁亦無蓋過肉桂香氣,甜度適中,唔會食到一半就覺得膩。
 


伯爵綠茶朱古力($55/凍,$50/熱)

Earl Grey控當然連飲品都要點伯爵茶!呢杯凍伯爵綠茶朱古力顧名思義有齊伯爵茶、綠茶同朱古力,飲落有佛手柑香味,之後係朱古力嘅甜味。有清香嘅綠茶平衡返,令飲品甜而不膩。
 


芒果乳酪茶($55)

而想飲熱茶嘅話,呢度亦有多款口味嘅德國茶葉選擇,芒果乳酪茶裡面有芒果乾,味道酸甜清爽。
 






蟲二
地址:旺角上海街618號頂樓




文、相、片:Cathy

關鍵字
旺角
露天餐廳
Cafe
一汁三菜
班戟
蟲二
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22