啖啖芝味率先試!The Cheesecake Factory將推10款新菜+2款新蛋糕
2019-04-08

兩年前,有間嚟自美國嘅人氣芝士蛋糕店落戶香港,佢哋menu上有超過200款嘅主食同甜品,喺全盛時期,仲曾經要等位兩三個鐘先至食到,直到今日,人氣依然高企。各大芝士控,唔知你哋去過朝聖幾多次,但佢哋嚟緊4月12號起,又再推出一系列新菜式同新口味芝士蛋糕,你哋都係留定quota夾定日子再去戰鬥過啦。

十款新菜式中,有唔少都係芝士類。首推車打芝士夾心漢堡,就咁望,可能你會問:芝士?邊度有芝士?原來內有乾坤呀!

師傅一早就將車打芝士同美式芝士兩種cheese釀入咗落去7安士嘅美國牛肉中間,再淋上秘製醬汁同埋焦糖洋蔥喺面,加上香脆嘅麵包,啖啖都係熱溶芝士嘅香味,咬開仲有微微流漿添。

如果覺得成個漢堡太heavy,但又想食到類似嘅嘢,小食芝士漢堡春卷係個唔錯選擇,以同樣原理將芝士同牛肉釀入春卷中,點埋秘製嘅酸甜醬汁,又脆口又開胃。

而最特別嘅新菜,非巴馬臣芝士雞肉「薄餅」莫屬。個餅底唔係麵粉嚟㗎,而係由雞胸柳肉加牛油、香草味麵包糠等製成,半煎炸做成微脆口感,on top再加上Mozzarella、Fontina、Romano同巴馬臣4款芝士同意式蕃茄醬,OMG!趁熱食固然做到拉芝效果,仲好有鹹香芝味,不過啖啖肉加咁多芝士,幾飽下,要人多些牙先至食得到。

五花腩小漢堡麻雀雖小但五臟俱全呀,入面夾住三件慢烤五花腩㗎,連埋炸酸瓜同燒烤醬酸酸甜甜咁好惹味。

至於肉食獸,毫無懸念,墨西哥燒烤牛扒!嫩香軟腍、肉味香濃嘅牛柳,點埋微辣帶酸嘅辣椒番茄洋蔥忌廉醬就更加香口。上碟時已經切成塊狀,方便大家開心share,不過肯肯定係手快有手慢冇咯。

 另外兩款新麵食:麗絲玲白酒(Riesling)雞扒意大利麵、拿玻里意大利麵

而甜魔當然最留意就係佢哋蛋糕嘅新動向啦,兩款新增口味分別係非常車厘子Ghirardelli®朱古力芝士蛋糕同Cinnabon®肉桂卷芝士蛋糕。前者得到朱古力嘅加持,令到大家好怕會係藥水味嘅車厘子,酸澀中都帶住陣陣甜香;而後者嘅肉桂味真心超香,記得點埋焦糖醬一齊食喎。星期日上午時段去嘅朋友仔,仲可以試到Sunday brunch限定:肉桂旋風班戟。


芝樂坊餐廳
地址:尖沙咀廣東道25號海港城港威商場地下G102號舖

文:Kar
相、片:Tom Li

關鍵字
尖沙咀
芝士
cheesecake
蛋糕
甜品
過江龍
人氣
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
2天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
7天前
日本人氣茶室登陸尖沙咀 招牌Tea Set、甜品推介(有片)
2019-09-25
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08