名廚主理$8酥皮叉燒餐包 尖沙咀新開港式點心茶居(有片)
2020-06-08

唔少香港人都鍾意嘆返「一盅兩件」,呢間新開嘅港式點心茶居就請嚟點心名廚甘志遠師傳主理,將佢創作嘅酥皮叉燒餐包帶到尖沙咀,$8/個真係好抵食!
 


恆之茶居主打各款傳統同摩登港式點心、蒸飯等,最架勢嘅係搵嚟車氏粵菜軒前點心主廚,有二十年經驗,亦係酥皮叉燒包嘅創辦人甘志遠師傳主理!首店開喺台北松山文創園區,最近回流返到尖沙咀開店。
 


甘哥叉燒餐包($8/個)

甘師傳嘅獨門點心,就咁睇有啲似迷你墨西哥包,其實上面係菠蘿包酥皮,薄薄一層但相當酥脆,帶少少甜味,攞上手完全唔油膩。
 


最吸引嘅係裡面熱辣辣嘅叉燒餡!叉燒肥瘦適中,味道鹹甜有致,同外層嘅酥皮一齊食更香口,連續食兩三個都完全無問題呀。
 



松露蝦餃($32/籠)

傳統點心亦加入新元素,蝦餃皮用澄麵製作,透薄得嚟唔會一夾就爛。食落咬到一粒粒蝦肉口感嘅同時亦爆發出松露香,係因為蒸前餡料混入意大利松露醬,蒸好再用滴管注入松露油,所以既聞到亦食到濃郁松露味。
 


海膽燒賣($32/籠)

而燒賣就加上新鮮日本馬糞海膽,雖然話海膽分量唔算非常多,但就可以帶起鮮味。燒賣餡用原粒蝦混合豬後腿肉,口感特別彈牙。
 


秘製咖喱四寶($20/份)

秘製咖喱偏印尼風味,香料味較重,秘製食譜雖然唔可以公開,但甘師傳就透露有落到海味嚟提鮮,所以咖喱食落有多重層次嘅香味!而四寶分別係魷魚、魚蛋、豬皮同蘿蔔,全部都相當入味,豬皮會吸收最多醬汁,魷魚、魚蛋就勝在口感彈牙。
 

更多【新店直擊】:
1. 必食巨型火山排骨!旺角新開現代泰菜館
2. 銅鑼灣新開韓式紙盒吐司專門店!足料軟殼蟹滑蛋/泡菜豚五花芝士口味
3. 門神進駐旺角「手工啤酒街」 Juicy牛肉包+酒香醉雞翼

 

虎蝦干蒸肉餅飯($38)

有唔少OL會嚟食點心同蒸飯,因為價錢相宜又夠飽。好似呢份虎蝦干蒸肉餅飯,唔單止有日本虎蝦乾,肉餅亦加入瑤柱增加鮮味!飯亦使用日本珍珠米,粒粒分明又吸收咗肉汁,再撈少少甜豉油就好夠味。
 



秘製咖喱牛腩飯($68)

另一推介同樣有甘師傳秘製咖喱,不過今次主角換成美國牛腩,煮最少四個鐘以確保入味。牛腩食起嚟口感鬆化,牛筋亦相當軟彈,配搭香辣嘅咖喱汁真係無得輸。
 


自家奶茶($16/熱,$19/凍)

飲品亦係貴精不貴多,有檸檬茶同奶茶兩款選擇,奶茶用四種台灣紅茶、一種香港茶調配,有齊粗茶同細茶去平衡口感。奶同糖亦用秘方拼配而成,口感柔滑唔榎,茶香比奶香突出,帶回甘。
 


細細聲講埋畀大家聽,恆之茶居本身就無座位嘅,除咗外賣,亦可以選擇坐喺隔離嘅奔之食堂,皆因兩間餐廳都係同一集團。唔飲奶茶,飲杯愛文芒果沙冰配點心一樣得,得咗。
 






恆之茶居
地址:尖沙咀廣東道28號力寶太陽廣場LG06號舖




文:Cathy
相、片:Tom Li

關鍵字
尖沙咀
點心
叉燒餐包
松露蝦餃
咖喱四寶
甘志遠師傳
恆之茶居
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
4天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30