又一間日本過江龍Pancake登陸香港，今次到呢間被稱為「名古屋No.1行列店」嘅Hoi Hoi Pancake House，於2011年成立，以用高級嘅日本原材料製作出夏威夷風味班戟聞名，係名古屋嘅人氣人龍店嚟㗎！餐廳正式進駐九龍灣，仲帶咗兩款香港限定口味嘅pancake畀大家，各位日本班戟控ready未？
法式焦糖梳乎厘班戟($98)(香港限定)
香港限定味道！材料包括麵粉、忌廉由名古屋直送，特別選用明治4.3特濃牛奶，質感更加軟滑富空氣感，配埋面層香脆嘅法式焦糖，雙重口感啊！
抹茶忌廉梳乎厘班戟($118)(香港限定)
抹茶係唔少港人至愛嘅口味，呢款都係香港店先有供應，鍾意抹茶嘅朋友有福了。選用來自日本滋賀縣名店、成立超過150年，丸安茶業嘅高級特調抹茶粉製作抹茶忌廉，味道特別甘香，配埋北海道十勝紅豆真係話都無咁夾！
夏威夷果仁忌廉班戟($108)
呢款班戟係選用當地麵粉廠特意為HoiHoi調製嘅麵粉，質感又幾獨特，鬆軟帶煙韌感，用埋島根縣新紀元雞蛋，香氣明顯，加埋忌廉同香脆嘅夏威夷果仁，味道層次又豐富啲。
更多【新店直擊】： |
秘製慢煮漢堡扒配手造麵包($98)
除咗Pancake仲有供應多款鹹點，漢堡扒由人手搓成3cm厚，再以密封式半蒸焗型式煮至全熟，肉質柔軟juicy。不過醬汁口味就稍為偏重咗啲喇。
炸豚肉定食($88)、墨西哥Taco飯($78)
炸豚肉選用鹿兒島豚肉眼，肥瘦均勻，口感鬆脆；至於呢個墨西哥Taco飯，醬汁用墨西哥香料製成，配埋豚肉碎、牛肩肉碎、牛油果、蕃茄及蔬菜，又幾清新！
玫瑰牛奶咖啡($39)
本地咖啡店STUDIO CAFFEINE得獎咖啡師為HoiHoi特別調配之咖啡豆，入口有黑朱古力及烤榛子味道，亦有微微蘋果及葡萄酸香。
地址: 九龍灣宏照道38號企業廣場5期Megabox 1樓19-20號舖
文: Yanica
相、片: Tom Li