去台北少不免會食燒肉，呢間橘焱胡同燒肉夜食都相當出名架，喺台灣有10間分店，亦開到去上海、南京同廈門，連續3年獲Miele Guide選為全亞洲500大餐廳。28/8終於喺尖沙咀試業喇！店舖延續古式古香中國風裝修，食物亦跟足台灣店，即刻睇睇有咩食！
香港店盡量做到台灣風味，餐牌同菜式差唔多，香港店員更要去台灣受訓。來自台灣、曾在胡同工作5年的副店長阿宏話，香港店部分肉類更加高級，好似有澳洲純血和牛、日本宮崎A5和牛等等。可惜香港店冇得用炭爐，炭燒焦香一定差啲。
調味及肉類部位都同台灣一樣，部分肉類有椒鹽、鹽味、烤肉醬等等。所有肉類都係即叫即調味，沒有醃製過夜，保持原汁原味。店員仲會在吧枱chok住落鹽，好似Salt Bae咁型架！
店員會根據柯打來決定上菜次序，一般就由淡至濃。前菜通常都會叫一碟生蟹膏干貝($100)，刺身級北海道帶子包住一大堆台灣蟹膏，而且加少少阿里山山葵同醬油調味，鮮甜開胃！
店子招牌菜有達拉斯 ($168)，菜名靈感源自NBA 。呢一款美國黑安格斯牛小排，烤香4 面之後再烤中心，大約7分熟左右，咬落充滿肉汁而且有彈性，肉味濃郁。
另一款必吃嘅係鹽葱牛舌($88)，薄薄嘅牛舌包住葱花，牛舌只需單面燒30秒，葱花冇草青味，肉質同樣富彈性，而且食落唔膩，忍唔住一件又一件。
其他牛肉好似係純血和牛骰子牛肉($298)、扇子肉($198)、美國安格斯牛五花($158)同日本A5級宮崎和牛肋眼眉部位，味道質感各有不同，骰子牛肉帶嚼勁、扇子肉偏瘦但柔軟，牛五花脂肪分佈平均，日本和牛就當然油花最重啦。唔識燒唔緊要，店員會會提醒你燒法及所需時間，甚至幫你手燒。
豬肉同雞肉都相當有驚喜！好似霜降松阪豬($70)係豬後頸肉，肉質爽口，味道帶甜而冇羶味。去骨雞腿肉($80)更加係亮點，使用日本山口縣雞腿肉，嫩滑juicy，加埋牛油非常香口！
店子只有70個座位，booking已經full到去10月！想試就要睇運數喇！
文、相、片：Perrins