台灣賣到街知巷聞嘅洪瑞珍三文治，今次真係正式登陸香港開分店啦！屯門新店將會售賣四款經典口味嘅三文治，全部都係嚟自自設工場，冷藏運送及儲存。新張期間仲有買三送三^嘅特別優惠！
 

洪瑞珍係1947年於台灣彰化北斗鎮創立嘅糕餅店，招牌古早味三明治紅到全台灣，甚至去到韓國首爾開分店！特色之一係用美乃滋（蛋黃醬）取代牛油去搽麵包，微甜嘅香味配搭口感綿密嘅麵包，加上配料比例拿捏得宜自然好味。香港店用嘅係用咗台灣配方本地新鮮製造嘅白麵包，而其他配料就全部嚟自台灣，而且跟返台灣配方製作，保證大家食得返同台灣一樣嘅味道。
 

滿漢（火腿+起司）（$22）- 經典人氣口味，中間有火腿同芝士，再加蛋皮、牛油、美乃滋
 

招牌火腿（$20）- 火腿、蛋皮、牛油、美乃滋
 

芒果起司（$19）- 芒果醬、芝士、蛋皮、牛油、美乃滋
 

原味起司（$20）- 芝士、蛋皮、牛油、美乃滋
 

雖然暫時只得四款經典口味，但負責人表示台灣始創店方面亦正努力研發新口味，例如唔同口味嘅美乃滋，唔排除之後有機會推出香港限定口味！
 

由於新鮮製作後全程冷藏（0-4℃）運輸及儲存，建議買完放喺室溫10至15分鐘，或者唔好拆包裝用微波爐小火叮5至8秒回溫先好食！如果買返屋企放雪櫃保存就要記得留意返有效日期，不過當然就係即日買即日食先享受到最佳風味啦。
 

洪瑞珍
地址：屯門屯順街1號屯門市廣場一期1樓Kiosk 8
*確保質素，產品當日售完即止
^買三送三優惠只限16/8至30/8每日首50名顧客，另買滿一盒六件套裝再送一件指定口味（招牌火腿/芒果起司），以上優惠不能同時使用

文、相：Cathy