Bagel控唔洗飛台灣啦，因為人氣好丘貝果呢個禮拜第二次嚟到香港開快閃店，今次仲有香港獨家芒果金萱口味，台灣都買唔到㗎！加上玫瑰洛神乳酪、黑糖黑芝麻兩款首次到港，同芋頭鹹蛋黃、桂花紫薯等，共12款口味任揀，睇開飯仔介紹揀定心水啦！
香港限定芒果金萱
芒果金萱貝果（$40）
好丘貝果第二次快閃店選址尖沙咀海港城city'super，同上次一樣有好丘主廚親臨，每日現場回烤貝果。12款唔同口味當中，芒果金萱係今次新增嘅香港限定口味。選用台灣當季愛文芒果製成新鮮果乾，而貝果麵團就加入台灣出名嘅金萱茶葉。
聞起嚟有少少金萱嘅茶香同獨特嘅奶香，食落芒果乾非常有驚喜，因為芒果乾唔會太乾太硬，特別係加熱後食嘅話口感帶軟，咬落係非常濃郁嘅芒果甜香！而且芒果乾落得夠多，每一啖都食到滿滿嘅芒果酸甜味同金萱清新茶香。今次快閃限量1,200個，唔好錯失機會！
香港初登場口味！
黑糖黑芝麻貝果（$34）
好丘貝果有唔少特色口味，今次帶嚟其中兩款香港首次發售嘅口味。第一款係香味十足嘅黑糖黑芝麻，用台南關山手工黑糖加上100%純黑芝麻醬，一切開黑芝麻香味立刻攻佔鼻腔！
食落微甜而唔會有苦澀味，只有香醇嘅黑芝麻味道。而且貝果上面亦有撒上黑芝麻，增添香味同口感層次。
玫瑰洛神乳酪貝果（$34）
另一款就係台妹最愛口味之一：玫瑰洛神乳酪！特別選用台灣屏東新鮮頂級有機玫瑰花製成花醬，搭配蜂蜜洛神花增加酸甜味道。
而餡料有混入Cream Cheese，令口感柔滑之餘亦增添一份奶香。所以食落先聞到馥郁嘅玫瑰芳香，之後係酸酸甜甜嘅花味同Cream Cheese，同Q彈嘅Bagel夾得嚟又唔會太膩。
更多【飲食潮流】： |
人氣特色貝果
其他口味都富有台灣特色，唔少都加入當地特選食材，加上師傅手工現作嘅飽滿貝果，畀大家滿滿嘅寶島風味！
芋頭鹹蛋黃貝果（$34）- 上次快閃相當受歡迎嘅口味，用苗栗檳榔芋頭製成綿密芋泥，再加入鹹蛋黃粒，富台灣古早味
草莓甜乳酪貝果（$34）- 唔少小朋友同女孩子嘅最愛，用台灣苗栗大湖草莓乾混合Cream Cheese，食到一粒粒果粒
橙香煎茶貝果（$34）- 茶香貝果當中加入手作煎茶牛奶糖同蜜漬橙皮粒粒，既有茶香又帶一絲絲果甜
地瓜乳酪貝果（$32）- 台灣熱賣No.1，以口感細軟嘅台灣66號紅心地瓜配Cream Cheese，Q軟香甜集於一身
桂花紫薯貝果（$32）- 台灣紫薯加上清幽嘅嘅桂花香氣，口感較柔軟
今次快閃即日起至9月9號共7日，每日11:00開賣，常溫貝果平日限賣500個，假日限賣600個！
如果買唔到常溫貝果亦可以考慮買冷凍貝果，加熱後味道口感依然，而且可以保存一個月喔。冷凍貝果喺另外三間city'super亦有售，期間限定售賣至9月24號。
好丘Good Cho’s尖沙咀快閃
活動日期：2018年9月3日至9日 *每日11:00
開售地址：尖沙咀海港城港威商場3樓3001號舖city'super
好丘冷凍貝果販售
活動日期：2018年8月30日至9月24日
地址：尖沙咀海港城、沙田新城巿廣場、銅鑼灣時代廣場及中環ifc city'super
文、相、片：Cathy