台灣人氣麻辣火鍋登港 麻辣湯底仲可當湯飲(有片)
2018-01-04


又多一間麻辣火鍋喇!今次呢間係嚟自台灣嘅,香港係佢哋首間海外分店,大部分嘅材料以及湯底都係由台灣帶過嚟,值得一提嘅係,個麻辣湯底仲可以當湯咁飲!

幾時都話湯底係打邊爐嘅精髓,呢間火鍋店湯底選擇唔多,就三種,一係辣,一係唔辣,一係鴛鴦。唔辣嘅就簡單啦,昆布清湯。至於辣呢,冇用牛、豬、雞之類嘅肉或者骨去熬,反而係用咗蔬果、辣椒、同埋藥材等落去煲。仲有鴨血,麻辣湯底本身都有幾嚿鴨血喺入面,由台灣運到嚟之後,用麻辣湯浸住48個鐘先嘅,入味之餘仲好滑身,建議用刀叉切開嚟食。所以個湯底嘅味道幾有層次,先係有啲藥材味同麻香,辣味慢慢滲出,到最後仲會有些少甜甜地嘅感覺,當湯咁直接入都得。

 果凍鴨血

 西班牙伊比利黑毛豬

手打丸類

至於打邊爐嘅配料,都係不外乎牛呀豬呀、丸呀餃呀、海鮮呀咁,內臟控覺得煲內嘅鴨血,唔夠可以再單點果凍鴨血,台灣本店名菜嚟呀。丸係手工丸嚟,手打墨魚丸、手打蝦丸等,其中手打豬肉丸做跟足台灣做法,加入埋梅菜,粒粒彈牙。

至於海鮮,就有蝦、扇貝、海蜆、南非鮑魚等,全部都大大隻,如果想食得到海鮮嘅鮮甜味,就建議落喺清湯嗰邊喇。

牛肩胛

(左)牛小排、(右)和牛

至於牛肉,就有油脂分佈幾平均嘅美國牛小排、牛肩胛同澳洲M7和牛等。要特別講下啲牛(牛小排同和牛)點食,平時就就咁放入個爐度淥熟啦,呢度每枱都會有個侍應嚟做個示範另類食法:先將牛放入碗度,然後嗶啲熱麻辣湯落個碗度,就咁用熱力浸至5成熟左右就食得。開飯仔試過,咁樣食,啲牛的確係比平時食嘅軟嫩滑身,但牛味就相對冇咁濃喇。

南極冰藻淥一淥就食得,幾爽脆,索埋啲辣汁又幾入味。

想解辣嘅,可以叫杯特飲,荔枝蜂蜜檸檬水,酸酸甜甜咁,仲有啲分子爆珠,一咬就咇啲荔枝汁出嚟,幾fresh。
講咗咁耐,可能你會問,咁有咩醬料?答案係冇嘅,個湯底本身都已經好濃香,好夠味。而餐廳想推行慢食文化,畀客人慢慢烚下烚下咁,所以冇入座限時嘅。加上餐廳樓底高,空間感大,枱同枱之間隔得都算開,仲有屏風隔下咁,都幾適三幾個人嚟gathering傾下計聚下舊。



麻神麻辣火鍋
地址:銅鑼灣登龍街1-29號金朝陽中心2期Midtown 25樓

文、相:Kar


關鍵字
銅鑼灣
台灣菜
火鍋
麻辣火鍋
牛肉
過江龍
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18