邊個話精品咖啡店得蛋糕輕食，又或者食台式早餐就要配豆漿先？鴨脷洲呢間新店就糅合台式早餐店風格，同自家烘焙嘅精品咖啡，好有新鮮感！必食滷過夜至入味嘅滷肉飯同煙韌蛋餅，而飲品除咗好啱消暑嘅冷泡咖啡同冷泡茶之外，仲有嚟自台灣嘅得獎朱古力呀。
 

叄瘋位於鴨脷洲大街，由三位年輕人主理，其中一位係半個台灣人，加上佢哋都特別鍾意台灣嘅早餐店，就決定開一間可以同時享受食台式早餐同精品咖啡嘅小店。所以咖啡豆都係自己烘焙，包括兩款主要用嚟做Espresso嘅House Blend，同多款嚟自唔同地方嘅單品豆，單品豆約兩個禮拜換一次。
 

叄瘋滷肉飯（$68，配黑糖冬瓜茶）

滷肉係用五花腩加日式醬油等材料滷過夜，令豬肉充分入味嘅同時，做到瘦肉鬆化而肥肉充滿膠質嘅口感，聞起嚟亦夠香，真係撈飯一流！
 

加上蛋黃半熟嘅太陽蛋、爽脆帶酸嘅自家醃青瓜、口感滑溜嘅嫩豆腐等配料真係好滿足。白飯亦用上日本新潟縣產米，不過略嫌飯粒偏腍，撈埋醬汁口感就唔夠彈牙喇。
 

鹹牛肉蛋餅（早餐時段$45，其他時段+$40追加）

講到台式早餐又點少得蛋餅！早餐時段會有較多口味選擇，暫時只有呢款鹹牛肉蛋餅就會全日供應。用台灣進口蛋餅皮，配搭雞蛋、蔥、鹹牛肉同芝士。
 

蛋餅皮口感軟得嚟又幾煙韌，同蔥嘅香味好夾。而雞蛋、鹹牛肉同芝士係無得輸嘅配搭，鹹牛肉嘅鹹香突出但無蓋過雞蛋同芝士嘅味道，口感同味道層次都好豐富。
 

麻醬豆腐手撕雞沙律（$64，配黑糖冬瓜茶）

手撕雞特別選用雞髀肉，口感特別嫩滑，加上麻油香氣同麻醬相當醒胃。嫩豆腐就更加軟滑，再配搭酸甜多汁嘅車厘茄同沙律菜，整體清爽。
 

 

冷泡咖啡（$60起）

冷泡咖啡會用嘅單品豆同樣係約兩個星期換一款，拍攝當日用嘅係哥倫比亞厭氧處理咖啡豆，口感厚滑，有熱情果嘅酸味同可可風味。
 

冷泡茶（$55）

冷泡茶以台灣茶為主，拍攝當日就有日月潭紅茶同烏龍兩款選擇。冷泡烏龍茶清澈冰涼，完全無茶澀味之餘喺喉嚨仲會有一陣回甘，消暑一流。
 

福灣巧克力（$45/熱，$51/冰）

福灣係台灣本地朱古力品牌，主打Tree-To-Bar概念，先後喺International Chocolate Awards同Academy Of Chocolate奪獎。凍飲會用手切冰，融化速度比一般冰粒慢，可以更好咁維持朱古力嘅味道同口感！飲落朱古力味香濃，但整體略甜。
 

叄瘋
地址：鴨脷洲鴨脷洲大街132號合時大樓地下F號舖

文：Cathy
相、片：Calvin Kwok