北京煎餅都幾受香港人歡迎，早前紅磡、天后、灣仔等區新開嘅煎餅舖都排晒長龍，最近，行街發現銅鑼灣又新開咗一間啦。

新舖新到連名都未有，暫時主打4種北京煎餅，兩鹹兩甜，全部即叫即做，仲喺你面前做添，成個製作過程都睇得一清二楚。

首推北京烤鴨煎餅，餅底用綠豆麵粉做嘅，打咗隻蛋落去之後，再灑黑芝麻、加京蔥、烤鴨醬、烤鴨、青瓜同埋薄脆等材料。疉埋一齊都幾厚身呀，加咗黑芝麻係幾香口，而塊薄脆，即係炸雲吞皮脆卜卜，令到口感更豐富。鍾意嘅仲可以加辣，惹味啲。而另一款鹹食就係棒棒雞煎餅。

而甜食呢，我都唔想用邪惡呢個字，但係……你哋自己評論啦，Nutella煎餅，用嘅係紫米麵粉，同樣會打蛋同加黑芝麻，料唔多，就咁厚厚der落幾轉Nutella醬已經夠晒，再加多塊薄脆，完。相機食完到自己食，切嗰陣啲Nutella低調地擠出嚟，仲有些少微溫，除咗甜，都係甜，但今次塊薄脆就感覺同佢唔多夾喇。唔想食Nutella嘅，仲有港式甜煎餅揀，即係花生醬加煉奶，唔知邊款甜啲呢？

地址：銅鑼灣禮頓道138號希雲大廈地下2號舖

文、相：Kar