軟嫩多汁嘅玉子燒唔少人都鍾意食，最近油麻地就有間小食店，班底之前有多次活動擺檔經驗，落單等三分鐘左右就有一份即叫即整嘅玉子燒，配料落足仲有半融芝士！其他小食都有板有眼，鐵板魷魚鬚越炒越香，本身魷魚就夠鮮甜，加少少七味粉就好惹味喇。
 

廟街玉子燒顧名思義就係開喺廟街主打玉子燒啦，幾個後生仔之前參加過美食博覽、冬日美食節、西貢廟會等活動，都係擺擋賣玉子燒同小食，所以雖然係新店但做起嚟好熟手。玉子燒選用日本雞蛋同水牛芝士，蛋香濃郁之餘又做到牽絲效果！
 

明太子芝士玉子燒（期間限定，$40/份）

新推出口味，玉子燒裡面係日本明太子醬、蟹柳同水牛芝士，上面再加沙律醬、蟹籽、木魚碎。玉子燒熟度啱啱好，食落又軟又夠厚身，而且仲保留到半熟蛋汁。
 

切開就見到半融嘅芝士，口感軟滑同玉子燒真係好夾。明太子醬鹹辣味道突出又唔會蓋過其他食材味道，一粒粒咬落爆開嘅蟹籽就增加口感層次。
 

鹹蛋黃魚皮芝士玉子燒（$40/份）

將之前大熱嘅黃金魚皮加落去，而且仲係自己炒鹹蛋黃魚皮，零舍香口！加埋沙律醬同豬肉鬆，配搭新穎。
 

玉子燒比較濕潤嘅關係，所以最好趁熱食，如果唔係魚皮就會變腍。而鹹蛋黃嘅鹹香同玉子燒都幾夾，而且沙律醬酸酸甜甜咁令玉子燒食落味道再豐富啲。
 

鐵板魷魚鬚（$40/細盒，$70/大盒）

開飯仔私心推介，因為聞起嚟真係香得好過分！秘訣原來係先用鐵板炒雞皮同肥豬肉逼出油分，加上用嘅係大件厚肉嘅紐西蘭有機魷魚，唔單止有鮮味，仲有Omega-3呀。
 

魷魚鬚食落相當爽口，比較幼嘅尾部特別香脆，而魷魚肉就煙韌而且帶少少肉汁。加少少鹽同七味粉就非常惹味。
 

豚肉大阪燒（$40/份）

大阪燒口感鬆軟，裡面有唔少菜絲，同鹹香燒汁夾埋唔會太膩。上面嘅豚肉係豬腩片，煎香後肥肉特別甘香，而且保留少少軟骨，食落特別有咬口。
 

雙色章魚小丸子（$30/8粒）

雙色係指芝士醬同日式燒汁，而章魚小丸子偏軟腍，食到出裡面章魚肉嘅彈牙口感。
 

廟街玉子燒
地址：油麻地廟街30-34號地下B4號舖

文：Cathy
相、片：Tom Li