南豐紗廠新餐廳進駐 健康素食店、老字號甜品新Line(有片)
2018-12-27

荃灣南豐紗廠唔單止有得打卡,裡面亦有唔少餐廳可以畀大家醫肚。上次就介紹咗4間特色Cafe,今次介紹4間餐廳,由健康素食到中式糖水,台式茶飲到本土傳統麵食,總有一間啱你!
 

Farm to table素食餐廳 Joie Plant-based Bistro


主打天然同健康嘅素食餐點,特別在有租用到南豐紗廠天台嘅耕作園地,希望長遠可以做到Farm to table!以突出食材天然原味為原則,未有採用素芝士或素肉。
 


柚子、車厘茄、本地水耕菜沙律(配麵包或中東米)($68)

以柚子同餐廳自家製油醋為主調,酸爽開胃。油醋比一般沙律醬嚟得清新,而唔會蓋過蔬菜原味。選用本地水耕菜,更新鮮所以口感亦更為爽脆。
 


松露·番茄乾·高野豆腐扁意粉($98)

素食唔等於味道寡,呢碟意粉就用咗松露醬同日曬番茄乾調味,帶鹹香同少少酸味又不失清新。而高野豆腐類似蜂巢豆腐,好似海綿咁吸收哂醬汁嘅味道,質地綿密有彈性。意粉上面仲有金箔點綴,趁涼之前影多兩張相打卡最啱!
 


八丁味噌野菌意大利麵($88)

野菌同樣香味十足,呢度嘅大廚就將其長時間炒製,再配搭日本八丁味噌,特點係經過長期釀造因而鮮味濃厚。味噌鹹鮮味同野菌香平衡,香而不膩。
 

九龍城甜品老字號新面貌 茂一茂


九龍城28年歷史中式甜品店地茂館甜品由第二代接手,進駐南豐紗廠後開設新Line茂一茂,糖水跟返地茂館嘅食譜,亦新增各款手調飲品、小食同多士。
 


鮮磨蛋白杏仁茶($29)

用玻璃杯奉上嘅係最出名嘅鮮磨蛋白杏仁茶,用南杏生磨後加入蛋白煮熱。即叫即煲所以可以聞到好香杏仁味,而唔係奇怪嘅藥水味,呈糊狀所以口感比較厚身,蛋白亦相當滑。蛋白杏仁茶有潤肺止咳嘅功效,而且杏仁可以幫助抗氧化,所以亦有美顏效果呀。
 


桑寄生蓮子蛋茶($27)

另一款熱賣傳統糖水,用桑寄生、蓮子、雞蛋同少少普洱茶葉煲成,雖然聞起嚟有少少藥材味,但飲落味道甘甜,無澀味所以唔會難入口。而且桑寄生有多款功效,包括行氣活血、寧神安眠!
 


擂沙湯圓($21/5粒)

黑芝麻湯圓亦係店家自己手搓,粒粒都係心思。配以用花生、白芝麻、砂糖打成嘅花生糖碎,香味十足之餘亦有口感層次,係大人小朋友都會鍾意嘅口味。
 

更多【新店直擊】:
1. 粉紅少女心 韓國人氣甜品店登陸 大熱士多啤梨奶油捲
2. 承傳婆婆台灣食譜 尖沙咀新開便當小食外賣店
3. 喜茶來了!沙田店現已開業 香港menu率先試

 
手沖茶配星球甜品 木衛二鑄茶所


呢間嚟自台北淡水嘅茶飲店主打人手用紫砂茶壺沖嘅台灣高山茶,比銅鑼灣店更大,唔單止可以坐低慢慢飲茶,仲供應多款精緻甜品!
 


奶霜法芙娜($49)

店家最受歡迎嘅特飲,用Valrhona黑朱古力配搭藍伯爵茶,所以飲落無想象中咁甜膩,反而黑朱古力嘅香同藍伯爵茶嘅甘都幾突出。而厚滑奶霜上面有Oreo粒粒增加甜度,建議點正常甜度或者少甜就得喇。
 


初芽驚蟄烏龍($47)

手沖現泡茶選用台灣茶葉,而且用紫砂茶壺沖泡,無論熱飲定凍飲都可以品嘗到最純粹嘅茶香。初芽驚蟄烏龍意指喺春天驚蟄採摘嘅烏龍茶葉,經過低火烘焙後,茶湯金黃清澈,入口清爽帶淡淡回甘。
 


金星($68)

舖頭唔單止掛住盞月球燈,連特色甜品都係以星球做主題!Bling Bling金色賣相嘅係金星,敲開朱古力裡面係香蕉焦糖朱古力布蕾,上面嘅朱古力相當幼滑,配埋下層嘅香蕉蓉味道香甜,亦有脆脆等增加口感,賣相同味道同樣出色。
 


(左)榛子朱古力泡芙($34/3件),(右)馬卡龍($38/3件)

Bite Size甜品亦有驚喜,榛子朱古力泡芙外面係朱古力脆皮,裡面嘅榛子朱古力餡夠香滑,略嫌泡芙皮淋咗啲。而馬卡龍有兩Set口味選擇,分別係雲呢拿、朱古力、咖啡各一,同開心果、覆盤子、檸檬各一。
 

馳名巷仔雲吞麵 新大光燈


由紅磡嘅一個街邊檔開始,五年前入舖改名新大光燈,但一樣係賣細蓉,即係港式雲吞麵。亦有粥、腸粉同小食,係附近唔少上班一族嘅飯堂。
 


鮮蝦雲吞湯麵($33)

招牌細蓉嘅亮點雲吞放喺彈牙蛋麵下面,大細啱啱好可以一啖一粒,裡面有蝦肉粒、豬肉同大地魚粉,以蝦肉嘅彈牙為主,帶少少豬肉油脂香,的確做到皮薄餡靚。不過調味略鹹。而湯底就用大地魚、豬骨、蝦頭、蝦子、羅漢果等熬製六至七個鐘,清澈鮮美。
 


炸兩($28)

呢度另一招牌菜係布拉腸粉,而且係即叫即拉,做到雪白透薄。配粥最啱點份炸兩,油炸鬼夠香脆,再加埋豉油甜醬就已經無得輸。
 


Joie Plant-based Bistro
店號:1樓119
 


茂一茂
店號:地下G13
 


木衛二鑄茶所
店號:1樓118
 


新大光燈
店號:地下G14
 

南豐紗廠
地址:荃灣白田壩街45號
 

睇埋Cafe介紹!
→ 荃灣新地標南豐紗廠 4間特色Cafe全介紹




文、相、片:Cathy

關鍵字
荃灣
南豐紗廠
素食
甜品
糖水
雲吞麵
Joie Plant-based Bistro
茂一茂
木衛二
新大光燈
新店直擊
走在最前線,為大家搜羅及報道有關新開餐廳的資訊。
餐廳資料
更多
收起
本月熱門
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24
10月份好評餐廳十強
2019-11-05