半島酒店新開廚師發辦 日籍米芝蓮大廚主理 食盡法國藍龍蝦、德國鱘龍黃金魚子醬等珍貴食材
7天前

好多人都會「一係唔食,一食就要食豪啲」。間中放肆豪華一餐嘅機會嚟喇,有間高級Omakase進駐半島酒店,餐廳由3位星級主廚主理,當中包括曾主理米芝蓮一星餐廳、擁有超過25年日式料理經驗嘅日籍大廚富山幸人。由步入餐廳開始,已經可以感受到奢華而典雅嘅氣派,加上單係午巿嘅menu都有近20道菜,而且道道選用嘅食材都非罕即貴,例如法國藍龍蝦、德國鱘龍黃金魚子醬等,足見排場之大。

 牡丹蝦餅

 日籍大廚富山幸人及蒸鮑鮑魚肝醬

5款頭盤中,特別介紹製法特別嘅牡丹蝦餅同蒸鮑鮑魚肝醬。前者先將北海道牡丹蝦過篩,再剁成Carpaccio薄片,即使只係簡單以岩鹽作調味,蝦肉嘅甘甜味都已經好突出;而後者則採用三重縣頂級赤鮑,蒸煮8個鐘再配上自家調配嘅鮑魚肝醬,鮑魚肉質軟腍彈牙,肝醬味道濃郁但又唔會喧賓奪主,依然可以食到鮑魚嘅鮮甜。

日本生蠔白鳥貝番茄冷湯亦係一道驚喜破格之作。大廚竟然將生蠔製成冷湯,湯品索盡精華,自然鮮味十足,清新鮮甜。

嚟到主菜部分,食材更見豪華。其中,海膽魚子醬松葉蟹啫喱動用到萬分之一嘅德國鱘龍黃金魚子醬,再放埋金箔喺面,你可以話浮誇,但你又會受。多種食材一啖入口,甘甜鹹鮮香輪流喺口中散發,層次豐富。

又如法國藍龍蝦配安鱇魚肝醬,煮至5成熟嘅藍龍蝦,重留有多汁,肉質爽口鮮甜,鮟鱇魚肝醬則被製成泡狀現身,濃郁香滑。

佢哋更係全港首間日本餐廳採用源自日本富士山山頂天然水去製作壽司飯,入口比一般嘅壽司飯香甜啲。多款以時令同季節限定食材嘅壽司包括有北寄貝、金目鯛、大拖羅、小肌等,款款新鮮,加上師傅嘅刀功同用心嘅調味配搭,值得期待。

最後以甜品作結,芝麻朱古力唔好一啖咬落去,放入口中含一陣,慢慢溶開,甜香亦慢慢蔓延;花生酥嘅花生味好濃郁但都幾甜身下,食返清甜嘅時令日本水果中和下就最好了。

關心價錢嘅朋友仔可以留意下,午巿每位最平$880就食到,晚巿則由每位$1980起。


  
地址: 尖沙咀梳士巴利道半島酒店B1樓Bw1, Bw3 & Bw5號舖


文:Kar
相:Wilfred


關鍵字
尖沙咀
廚師發辦
Omakase
日本菜
壽司
生蠔
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2021生日優惠】持續更新!10月壽星半價嘆自助晚餐/免費放題
2021-09-30
【隨時更新】零食速報 每周新款零食、酒品點評
5天前
4間大閘蟹食店集合!米芝蓮食府大閘蟹宴+最平$368任食大閘蟹
2021-10-06
9月份好評餐廳十強
2021-10-08
今期流行!你是我的心愛甜品 全港6大Apple Pie推介
2021-10-08