喺筲箕灣甚至去到港島東區，燒肉店真係少之又少，想搵間燒肉店食吓都唔係咁易㗎～不過最近筲箕灣新開一間日式燒肉專門店，以「激安」即係抵食作賣點，供應多款肉類及海鮮，一齊睇睇究竟有幾抵食啦！
激安大草園Prime沙朗 $128
Prime沙朗牛扒可自選口味，包括芥末鹽、汁燒及原味，油花紋理均勻、肉質較結實、油脂豐富及牛味重，加入芥末令到味道更豐富，而且無咁易膩。
鹿兒島A4和牛西冷 $268(指定時段$134)
偏向鍾意食油脂重嘅牛魔王，一定要試試呢款鹿兒島A4和牛西冷 ，入口即溶，一入口感受到陣陣牛脂香，而且7點半前離座及10點後入座有半價啊！好抵食！
九宮燒牛盛合 $288
貪心嘅牛魔王想咩都試吓，當然要叫呢個牛肉豪華拼盤，有限定嘅紫蘇漬一口牛安格斯、黑毛牛小扒、草飼牛肋條、鹿兒島A4和牛、安格斯牛三角、黑毛牛梅花、安格斯牛仔骨、Prime級牛小扒及草飼牛護心肉，簡直係牛控天堂。
厚切牛舌($78)、雞腿肉自信漬($42)
牛舌好厚實，帶少少微脆口感。至於唔想食太多牛嘅朋友，都可以試吓呢個雞腿肉自信漬，加上餐廳秘製醬汁，堆到成座山咁高都係$42，好抵食～
海賊船 $288
除咗燒肉仲有供應十二款海鮮，如活元貝、蟶子、車海老虎蝦、日本廣島蠔及鮑魚等，全部都係每日新鮮購入，夠晒新鮮。
另外小食特色燒飯團加入蛋黃及秘製醬汁包起食，又幾特別。燒芝士年糕加埋大量煉奶真係無得輸啊！另外而家仲做緊生啤買一送一優惠，快啲約埋朋友嚟燒肉兼啤一啤啦！
地址: 筲箕灣新成街8號新成中心地下F號舖
文、相、片: Yanica