北角新打卡Food Court!東歐風主題多國菜選擇+粉紅色裝修咖啡甜品店
2020-09-28

諗唔到食乜最啱去Food Court,勝在一個地方乜都有得食。好似北角呢間新開嘅美食廣場咁,集港、日、韓、泰等唔同國家菜式選擇,仲有甜品咖啡店滿足埋甜品胃。而且裝修非常特別,一邊走東歐異國風放滿土耳其玻璃吊燈,另一邊以粉紅色為主仲有幅花牆,想點打卡都得!
 


和富樓下美食廣場位於北角和富薈地庫,全場約8,000呎而且分兩個區域,共有八間餐廳,唔係見慣嘅連鎖店反而以特色小店為主,而且定價親民,附近嘅街坊同打工一族可以當飯堂呀!
 

自家製Gelato+咖啡 野草


木瓜牛奶雪糕配奇亞籽水果杯($62)

Cafe主打自家製Gelato同咖啡,採訪當日有六款口味嘅Gelato,遲啲唔排除會再有新嘅季節限定呀。而且店主希望可以推廣本地農業,例如木瓜牛奶雪糕就用咗喺梅窩種植嘅生態友善木瓜,食落木瓜香味濃郁又自然,甜度適中。Gelato除咗就咁食,仲可以配奇亞籽水果杯、戚風蛋糕、酥皮等。
 


蜜餞檸檬錫蘭紅茶貝果配忌廉芝士($40)

甜品唔啱亦有輕食選擇,支持返支持香港職人,貝果係嚟自網店brickery.bread嘅純手工無添加出品,Sourdough就嚟自大美督嘅Mayse Artisan Bakery。熱賣嘅蜜餞檸檬錫蘭紅茶貝果口感煙韌有嚼勁,茶香突出,配搭蜜餞檸檬同忌廉芝士,Tea Time食啱啱好。
 


(左)玫瑰鮮奶咖啡($38/熱,$41/凍),(右)熱情果黃薑綠茶菌($42)

店主身兼咖啡師,選用Momentum Coffee烘焙、Ethiopia及Brazil拼配嘅咖啡豆,偏Nutty但同時會有少少Fruity明亮酸香嘅餘韻,層次豐富。玫瑰鮮奶咖啡配搭自家製玫瑰糖漿,玫瑰花香濃郁同時唔會死甜。熱情果黃薑綠茶菌就係本地品牌Taboocha出品,係一款有含有豐富益生菌嘅發酵茶,酸酸甜甜又有少少氣泡感。
 

泰國人主理正宗泰菜 亞發亞萊


泰妃海南雞飯($50)、水桶珍多冰($25、跟餐+$15)

另一邊以東歐異國風為主題嘅區域有更多選擇,呢間請嚟泰國人擔任廚師主打正宗泰國菜。海南雞皮香肉滑,配埋泰式酸辣醬真係無得輸!而雞油飯就勝在有香味而唔太油。
 


泰式無骨豬髀飯($50)、水桶三色冰($25、跟餐+$15)

無骨豬髀非常入味軟腍,特別係豬皮非常有膠質感,配埋爽口惹味嘅酸菜真係送飯一流。
 

新派韓國美食 韓潮


芝士煙肉焗韓式辣味年糕($48)、韓式煙肉香腸串($28、跟主食+$14再送泡菜及罐裝飲品)

掛住韓國小食?呢度有多款新派韓食揀!芝士煙肉焗韓式辣味年糕趁熱有芝士牽絲效果,食落其實唔會好辣,少少辛辣香反而會帶起芝士同煙肉嘅香味,同煙韌嘅年糕好夾。而韓式煙肉香腸串即係用煙肉包住粗香腸,食落富鹹香,配甜蜜糖辣醬減低油膩感。
 


芝麻雞肉芝士焗飯($44)、BB魷魚鬚串($28、跟主食+$14再送泡菜及罐裝飲品)

想飽啲仲有一系列韓式芝士焗飯,炸過嘅雞肉外脆內嫩仲Keep到少少肉汁,同香噴噴嘅芝士醬汁係絕配。小食推介係BB魷魚鬚串,顧名思義用咗魷魚BB,有魷魚獨特香味,口感特別嫩同爽口,完全唔會韌到咬唔開。
 

更多【新店直擊】:
1. 機舖內的熱狗店 多款自選配料+自家製醬汁 特設無腸熱狗
2. 紫芋雪糕三文治+香濃花生燉菜有驚喜 灣仔新開摩登菲律賓菜餐館
3. 必試稀有鳥取A4和牛+清酒自動售賣機 尖沙咀新開日式燒肉店

 
精緻日式便當 友間日式料理


極上鰻魚便當($62)

點少得香港人無論任何時候都最愛嘅日本菜先?呢間小店主理人之一有多年日式餐廳經驗,調味、食材等都從日本運過嚟。好似呢個便當嘅主角就係日本鰻魚,汁燒後香氣誘人,口感嫩滑味道香甜。
 


咖喱吉列雜錦便當($55)

咖喱係唔少人嘅Comfort Food,呢度嘅咖喱吉列雜錦便當仲一份有齊炸蠔、炸蝦、炸黑豚肉餅同炸雞,吉列炸漿調配得宜,所以炸物食落口感非常香脆。咖喱味道就偏日式嘅甜辣風格。
 

南洋美食 必飲恐龍美祿 NY Garden


南洋雜錦喇沙($72)、恐龍美祿($22)

餐廳名NY係南洋嘅意思,即係主打南洋特色美食啦。主理人曾經喺新加坡居住,亦特別選用當地嘅香料同食材,希望將南洋風味帶到北角。南洋雜錦喇沙有大蝦、青口、蜆、肥牛、海南雞,非常豐富。湯底一入口先有多款香料嘅香氣,然後有濃郁椰香。私心推介埋恐龍美祿,凍美祿本身已經夠香,加埋美祿可可球增加口感更過癮!
 


新加坡無骨海南雞飯($68)、青檸梳打($18)

海南雞特別挑選90日齡嘅走地雞,肉質結實嫩滑,而且跟返傳統有齊薑蓉、辣椒醋、新加坡黑豉油三款醬料。套餐仲包埋清甜滋潤嘅椰子雪耳雞湯。青檸梳打就夠酸甜清爽。
 

多選擇砂鍋米線+石磨腸粉 滕王閣素葷美食


生滾豬扒砂鍋米線($68)、石磨紫米漿($18/細、$38/大)

叫得素葷美食即係有齊素食同葷食,而且非常貼心咁將製作素食同肉嘅廚具同餐具分開使用,令各位「跑素」朋友更安心。小店主打係砂鍋米線,可以自由選配配料、湯底同粉麵。每碗米線都會有炸腐皮、酸菜、青菜、蟲草花,另外仲有炸花生、芫荽等配料畀大家任加!石磨紫米漿比較濃稠,有淡淡嘅紫米甜味。
 


鮮豬潤腸($48)、竹蔗馬蹄水($18/細、$38/大)

另一推介係佢哋嘅即拉石磨腸粉,望落白雪雪而且口感又夠滑。而且配料有好多選擇,由素食嘅羅漢齋、雲耳粟米、冬菇素肉,到有肉嘅鮮豬肉、鮮豬潤等等應有盡有。
 




和富樓下美食廣場
地址:北角和富道21-53號和富地庫B50-51號舖




文、相:Cathy

關鍵字
北角
Food Court
Cafe
咖啡
gelato
海南雞飯
便當
喇沙
砂鍋米線
和富樓下美食廣場
新店直擊
走在最前線,為大家搜羅及報道有關新開餐廳的資訊。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
桔梗姐妹店進駐牛頭角 8,700呎自設炒豆房及餅房 手沖咖啡配輕食
2020-11-02
Wine & Dine 2020預告 免費網上學品酒 精選品酒套裝率先睇
2020-11-19