北區美食天堂聯和墟潮聖指南
2016-12-19
開飯仔明白好多時候,對唔同地區嘅人都會有啲刻板印象,例如見到住康城嘅朋友就問係咪真係心曠神怡,遇到住粉嶺嘅朋友就問係咪會見到牛(朋友真人真事)。咁啦,其實粉嶺仲有個美食集中地叫聯和墟,係嚟港鐵站有少少遠,但入到去,無論你想掃街食滑溜腸粉同惹味炸物,定真材實料嘅豬手麵同雞脾包都得!

平靚正滑溜腸粉  四眼仔腸粉


Photos by eddie_ilovefood777 & lam.yaan

今時今日通脹猛於虎,掃街再唔係最平民嘅選擇,好彩聯和墟附近呢間腸粉檔依然堅守平靚正嘅口碑。平,$3/2條呢個價錢喺旺區絕對搵唔到,而魚蛋、燒賣、牛肉等都係$3有交易。靚,因為特登入嚟試嘅食家唔少,加上街坊客多所以流量大,亦因此非常容易就買到新鮮蒸好嘅熱辣辣腸粉。正,腸粉入口柔軟滑溜,而且豉油同各種醬料亦落得爽手,畢竟混醬係腸粉嘅精髓,好似係。

老字號馳名豬手麵  群記牛肉圓豬手


Photos by ki918 & delicioussoul

溫馨提示,想食豬手麵嘅最好趁早,因為豬手每日供應數量有限,好彩嘅話就可以等到下晝三點半嘅第二輪,如果連第二輪都賣哂嘅話,只好請閣下擇日再會。點解佢地嘅豬手咁好賣?一個字:真材實料,豬皮彈牙無肥膩感,啱哂愛骨膠原嘅女士。豬肉新鮮軟腍,加少少辣椒醬已經夠好味。另外牛丸爽口彈牙,牛肉炸卷就夠脆卜卜,都係唔少街坊嘅心頭好。

雞脾打人牙胶軟?  協香麵包西餅


Photos by natfoodiary_ & lam.yaan

雖然唔知雞脾係咪真係可以令人牙胶都軟哂,但協香嘅雞脾包的確可以令人心軟。新鮮出爐嘅雞脾包,單係嗰股牛油同麵包嘅香味,就足夠令人舉白旗投降。咬落滷雞脾有豉油香得嚟又多肉。而且雞油同豉油滲咗少少落微甜嘅麵包到,令口感更外脆內軟之餘,仲增加咗味道層次。小店嘅麵包、蛋糕、蛋撻等都係細個食嘅味道,同而家嗰啲「空氣麵包」無得比。

無敵鹹牛肉蛋餅  漢興茶檔


Photos by Che

又係開飯仔溫馨提示時間,呢間茶檔只開星期一至五,朝早五點到下午三點。咁點解仲要介紹?因為呢度嘅蛋牛餅真係無得輸!大大份成塊厚身漢堡扒咁,啱啱煎好嘅蛋牛餅外面微焦但食落超鬆化唔死實,鹹牛肉同蛋漿比例啱啱好,配埋烘得香脆嘅多士食一流。食多件香脆嘅雞翼或者豬扒,飲埋杯香滑奶茶,又係邪惡得嚟又滿足嘅一個茶餐。

要「趣」就「脆」小食店  雲津美食


Photos by avril_yee

炸嘅小食雖然好熱氣又無乜益,但偶一為之亦不為過啫。呢間小食店最出名嘅就係各式炸物,蜜糖炸燒賣雖然只係將普通燒賣拎去炸再加蜜糖,但燒賣炸得啱啱好金黃香脆又唔會乾身,同帶少少清甜嘅蜜糖非常夾。招牌炸壽司食落似炸飯糰,難得嘅係壽司炸粉唔厚而又無散到,食得出師傅功力深厚。最邪惡嘅一定係炸芝士通心粉同意大利芝士飯波,減肥?食埋呢次先啦。

花樣年華式豉油西餐  雅士餐廳


Photos by Winnie The Tail

或者每個舊區都總有一間有懷舊感嘅港式扒房,聯和墟嘅代表就係呢間連個名都優雅過人嘅雅士餐廳。無論係扒餐、焗飯定意粉都係細細個食嘅味道,特別係羅宋湯依然係用料十足,酸、辣、甜味道平衡有致。另一招牌香橙班戟仲要有師傅出嚟,喺客人面前即場烹調。雖然有老街坊覺得餐廳衛生同服務有少少退步,但老師傅嘅手藝依然值得推薦。

住家Feel All-day Breakfast  太陽花


Photos by 一姨姨 & jess 6630

唔一定要去樓上Cafe先嘆到All-day Breakfast,呢間喺地舖嘅餐廳一樣有唔錯嘅西式早餐,畀你嘆個悠閒brunch。Sunflower Breakfast有炒蛋、煎香草腸、煙肉、煎蕃茄、磨菇、茄汁焗豆同牛油多士,食物唔算非常出色,但調味得宜,唔過鹹唔油膩,而且溫度夠熱,同呢間小店一樣有平實溫馨嘅感覺。鮮茄濃湯牛肉通粉同定期換款嘅自家制甜品都值得大家一試。

隨時接收最新資訊
讚好OpenRice專頁!
關鍵字
粉嶺
聯和墟
腸粉
豬手
雞脾包
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【編輯推介】平靚正之選:祐漢熟食中心
2016-08-22
【開飯熱店大賞前哨戰】本地薑VS日韓風 街頭小食你撐邊個?
2017-04-25
【優秀開飯熱店大賞 2017】頒獎禮盛況
2017-05-17
【新店直擊】路環市區都食到高質牛雜麵
2016-08-01
【當時得令】來一杯透心涼消暑飲料!
2016-07-22
【開飯熱店入圍名單巡禮】走訪各路中式飯店感動胃兒
2017-03-08
餐廳資料
更多
收起
本月熱門
人氣餐廳進駐長沙灣新Foodcourt 老Come煎餅、十二味酸菜魚(有片)
2018-12-28
一鍋兩食!上層干鍋底層火鍋 荃灣必食龍蝦海鮮山(有片)
2018-12-28
觀塘新開酒店半自助餐 任食即開生蠔、長腳蟹
2019-01-09
荃灣新地標南豐紗廠 4間特色Cafe全介紹(有片)
2018-12-24
12月份好評餐廳十強
2019-01-14