來自加拿大嘅過江龍法式可麗餅專門店品牌Crêpe Delicious繼2017年首次於香港開店後，事隔三年以全新Urban Café概念進灣仔利東街。餐廳採用新鮮入口原材料，班戟漿更直接由加拿大進口。每份班戟即點即做，餅皮微厚帶韌性，蛋味香濃，餡料豐富。新店樓高兩層，更帶來十款新推出嘅甜、鹹可麗餅、主食、酥皮薄餅及意式雪糕奶昔！

餐廳樓高兩層，地下可以觀賞員工即席製作可麗餅。

新菜式系列：

焦蘋肉桂甜薄餅($88)

蛋味香濃嘅可麗餅配上用焦糖輕煮嘅蘋果、雲呢拿吉士及焦糖核桃，上層再加多三塊新鮮蘋果，成個薄餅甜而不膩，又食到蘋果嘅爽脆。

美式手撕豬肉鹹薄餅($118)

呢份鹹薄餅都幾有驚喜，手撕豬肉配上清爽嘅牛油生菜及紅洋蔥，味道濃味得嚟又帶點清爽。

美式手撕豬肉酥皮薄餅($108)

想口感再豐富啲，可以試吓美式手撕豬肉酥皮薄餅，有別於一般薄餅，以輕薄香脆嘅千層酥皮為餅底，另外仲有西班牙辣肉腸及四重芝士菠菜口味添！

紅酒慢煮牛頰肉配薯蓉($188)

餐廳另外都有供應多款主菜，如都係新推出嘅安格斯肉眼扒及香烤三文魚，今次推介紅酒慢煮牛頰肉配薯蓉，牛頰肉肉質軟腍嫩滑，香濃惹味，配埋吸晒汁嘅薯蓉食啱啱好。

牛油果蟹餅($108)

大開殺界前想開吓胃，呢味牛油果蟹餅就啱，底層係牛油果，中間係滿滿蟹肉沙律，上層就係酸酸甜甜嘅番茄，清新之選。

朱古力榛子意式雪糕奶昔($58)、士多啤梨意式雪糕奶昔($58)

新推出嘅milkshake都好有誠意，係用意大利手工雪糕製成，有士多啤梨及朱古力榛子口味，濃郁香甜，甜品控必試！

人氣招牌菜式：

紅茶匯聚甜薄餅($88)

招牌以紅茶吉士為餡料嘅甜薄餅，搭配朱古力脆脆及焦糖醬，加埋品牌自家製嘅手工意式雪糕，一入口帶淡淡茶香～

日本北海道帶子鹹薄餅($138)

平時鍾意海鮮嘅，就要試日本北海道帶子鹹薄餅，放上三隻大大粒嘅日本帶子及特調醬汁，味道甜甜鹹鹹會食上癮。

Crêpe Delicious (Urban Cafe)

地址: 灣仔皇后大道東200號利東街地下G26及F26A號舖

文、相、片: Yanica