話咁快就到夏天喇，想味蕾都一齊清新一「夏」嘅話，不如約埋好友一齊去酒店餐廳嘆返個芒果下午茶啦！開飯仔搵咗呢三間供應芒果主題下午茶嘅酒店餐廳，無論係精緻三層架定係甜品任食，相信都可以令各位芒果Fans心滿意足。
 

Club @28　　情迷芒果下午茶

銅鑼灣呢間位於酒店28樓嘅酒吧餐廳免費附送令人心曠神怡嘅靚景，而且佢地最近推出嘅呢個情迷芒果下午茶由賣相到茶點都非常吸引。三層架上面放滿六款甜品同五款鹹點，包括用香甜菲律賓呂宋芒製成嘅迷你香芒火焰雪山，以清新泰國水仙芒入饌嘅芒果糯米飯，香煎法國鴨肝、日式串燒鐵板牛柳等。

供應日期：即日起至2017年7月31日 
供應時間：14:30 - 17:00
 

Park café　　夏日香芒下午茶

而呢間尖沙咀區嘅酒店餐廳亦即將推出芒果主題下午茶，由清新火焰芝士三文魚芒果杯同大蝦芒果冷麵，到惹味迷你黑松露芒果蟹肉酥盒同黑魚籽鵝肝醬多士都各具特色。食過鹹點就進入芒果甜品時間！芒果拿破崙同熱情果芒果芝士蛋糕等總有一款啱你心水。另外可以加錢升級，額外享用煙三文魚芒果藜麥沙律同朱古力心太軟伴Mövenpick雪糕。

供應日期：2017年5月28日至另行通知為止
供應時間：15:00 - 17:00
 

 
花月庭　　清甜香芒初夏「燕」下午茶自助餐

食自助餐可以同時養顏？因為旺角呢間餐廳提供嘅係芒果加燕窩主題嘅下午茶自助餐呀！糕餅總廚用菲律賓呂宋芒配搭滋潤養顏嘅燕窩創作出燕窩芒果金黄朱古力歌劇院蛋糕、燕窩香芒千層酥同異國情調燕窩香芒椰子慕絲等一系列甜品。另外仲有多款環球美食，包括新鮮日式刺身、港式碗仔翅同蝦多士等任食。

供應日期：即日起至2017年6月25日逢星期六、日及公眾假期 
供應時間：15:15 - 17:15

文：Cathy