冧冧媽咪!玫瑰、康乃馨、抹茶蛋糕精選
2021-04-27

好快就到母親節,大餐、禮物、蛋糕都不可少,今次就等開飯仔為大家獻下計,精選咗幾款一秒融化媽媽嘅母親節蛋糕、甜品出嚟,向媽媽表達心意啦!

玫瑰士多啤梨芝士蛋糕    HABITŪ

粉紅色總係畀人一種浪漫嘅感覺,趁住母親節,梗係要氹下媽媽啦。呢個由餐廳自家製嘅玫瑰士多啤梨芝士蛋糕,有3層鬆軟嘅海綿蛋糕,配上玫瑰果醬同忌廉,滲透住幽幽嘅花香,輕易就可以令到媽媽心花怒放。

蜜桃康乃馨蛋糕  GREEN

母親節要送康乃馨畀媽媽?咁又唔一定要真‧花嘅,食得嘅花一樣得啫。呢間酒店嘅糕餅總廚一向主意多多,適逢母親節就設計咗呢款蜜桃康乃馨蛋糕,以日本蜜桃入饌, 海綿蛋糕口感鬆軟,加埋食咗都唔怕肥嘅低脂忌廉,餅面以白朱古力砌到成朵康乃馨咁,媽媽收到真係甜到入心喇~

巴斯克芝士蛋糕   22 Ships

家中有個潮媽嘅,就梗係要為佢預備近年橫行蛋糕界嘅巴斯克芝士蛋糕啦~ 陣陣焦香同濃郁嘅芝士味夾埋一齊,滿足感不言而喻。呢間餐廳可以連埋Patxaran一齊訂購,限定嘅Patxaran Royal Set除咗個cake之外,仲包括咗一支Cava sparkling wine、patxaran mixer以及cocktail配飾,到時親手調返杯cocktail畀媽媽試下啦。

玫瑰芬香紅茶茶香樹莓蛋糕   Tea WG Salon & Boutique

每種花都有唔同嘅花語,而玫瑰則代表愛,喺母親節送畀媽媽當然適合不過啦。呢間主打精品茶葉嘅舖頭,亦有以茶葉同玫瑰入饌嘅蛋糕。玫瑰芬香紅茶茶香樹莓蛋糕以杏仁酥餅做底,上層係綿潤嘅海綿蛋糕,外層有玫瑰芬香紅茶茶香慕斯,頂層則搭上樹莓醬,啖啖酸甜交錯。

心形敲敲蛋糕  Bombshell

媽媽由細到大都帶我哋去探索好多新嘢,而家大個咗,輪到我哋帶返啲新鮮感畀媽媽啦。食咗咁多年傳統忌廉生果蛋糕,今年不妨考慮下玩味十足嘅敲敲蛋糕啦。Blooming Beauty Bomb同Mom-nificent Bomb分別鋪上玫瑰、鬱金香同康乃馨,輕輕敲開白朱古力外層,入面滿載嘅唔止有各式嘅朱古力、曲奇同糖果,仲有媽媽嘅童心呀!啱晒佢影相打卡再send畀朋友放閃~

眷顧之羽  Twinkle Baker Décor

講到靚嘅話,一定唔少得呢個品牌嘅蛋糕啦,有成團鮮紅玫瑰置頂嘅薔薇盛典夠晒搶眼,包保媽媽見到都會忍唔住變bling bling眼加嘩一聲。配搭埋豆沙紅蛋糕、無花果蓉啫喱同士多啤梨慕絲,味道微酸甘甜,唔使怕膩。但如果都係想要細細個cake,純粹意思意思咁,可以選擇眷顧之羽,由焦糖慕絲夾主海鹽焦糖脆珠,中間係蘋果蓉加原味牛油蛋糕,同樣令媽媽心都甜晒。

宇治抹茶堂島卷  Mon Cher

以前可能成日都會帶媽媽去旅行,遊日本,今年未有機會住,但都可以畀媽媽食到日本嘅味道!嚟自日本大阪嘅殿堂級甜品品牌,最近喺香港開咗幾間分店,帶嚟city’super分店限定口味——宇治抹茶堂島卷。使用北海道農場空運直送嘅牛乳,製成輕盈軟滑嘅生忌廉,加埋京都宇治抹茶,呢條堂島卷嘅茶味夠晒濃郁,清香又回甘,仲有清甜嘅紅豆蓉夾心,保證媽媽實滿意。

客製朱古力   Schoggi Meier

呢個雖然唔係蛋糕,但絕對可以見到你嘅誠意。每粒手工朱古力都採用瑞士原材料Couverture 100% 可可脂朱古力製作,用料矜貴。不過最重要係,中間嗰粒朱古力,可以預訂製成相片朱古力,印咗你同媽媽嘅sweet池合照落去。媽媽打開見到,肯定覺得好surprise啦~


文:Kar


關鍵字
母親節
蛋糕
慶祝
玫瑰
朱古力
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
6天前
【2021生日優惠】持續更新!5月食日本直送海鮮送西班牙紅/白酒
3天前
【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30