全球首推!素食「新豬肉」生煎包(有片)
2018-08-08

無論你係咪食素嘅朋友,最近應該都有聽過「新豬肉」(Omnipork),用全植物材料模仿手打豬肉。嚟緊去呢間人氣生煎包店,就可以試到用「新豬肉」整嘅傳統上海生煎包!
 


(左)Green Monday創辦人楊大偉(David),(右)正宗上海生煎皇老闆蕭潤邦(Oscar)

正宗上海生煎皇今次同Green Monday合作,四間分店將會喺8月11號開始售賣新豬肉生煎包,暫定期間限定供應一個月。用植物為本嘅「新豬肉」代替豬肉,糅合正宗上海包點製作手法。
 


新豬肉生煎包($20/客)

生煎包嘅綠色餅皮係加咗菠菜汁,裡面嘅餡有「新豬肉」同冬菇粒。外表睇落就同一般生煎包分別唔大,一樣有芝麻點綴同生煎出嚟嘅脆底。
 


驚喜係咬開依然有爆汁效果!雖然比起豬肉少咗一分油脂香,不過「新豬肉」嘅口感的確同普通豬肉無異,加上豉油同冬菇嘅香,感覺有種食緊清新版生煎包嘅感覺。
 


同老闆Oscar傾咗幾句,原來開店八年以嚟,唔少食客都會問幾時有素食版,而Oscar又唔想敷衍了事。直到今年透過歌手兼Green Monday大使謝安琪認識到「新豬肉」,就決定嘗試。
 

更多【飲食潮流】:
1. Hello Kitty主題甜品店 超解暑雜果涼粉西瓜盅
2. 療癒系雲先生變甜品!中環樓上Cafe期間限定
3. 夏日炎炎去食tea 七大消暑清新下午茶推介!

 

雖然食客未必食得出分別,不過Oscar就坦言研發途中都會有困難。好似真豬肉會有肥瘦比例,相比起嚟「新豬肉」就少咗陣油脂香,但好處係更容易入味。所以就加入冬菇粒帶起香味,兼增加口感。另一困難係「新豬肉」唔爆汁,所以Oscar特別加入大菜糕,煎熱後就有多肉汁嘅效果。
 


「新豬肉」生煎包少咗陣豬肉脂香,調轉嚟諗就係少一份油膩感,Oscar亦指今次並唔係要做出同豬肉完全一模一樣嘅味道,而係希望帶出「新豬肉」嘅特色。而且價錢大眾化,打破有機或者環保就等於貴嘅概念,無論係咪素食者,任何年紀都可以試。
 


David就覺得好興奮,唔單止因為素食者又多個Comfort Food選擇,亦因為生產「新豬肉」比真豬肉嚟得環保得多。Oscar都話之後會積極考慮推出更多素食選擇,同Green Monday一齊將素食概念推廣出去,同時將傳統味道帶畀普羅大眾。
 




正宗上海生煎皇
銅鑼灣店:銅鑼灣登龍街41號地舖
旺角店:旺角豉油街72號地下
深水埗店:深水埗福榮街100號地下
大埔店:大埔大埔墟大明里10號地舖




文、相、片:Cathy

關鍵字
新豬肉
Omnipork
生煎包
素食
正宗上海生煎皇
Green Monday
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
$68鰻魚飯 日本人氣連鎖鰻魚專門店登陸尖沙咀 香港Menu率先試
7天前
【特約分享】尖咀商場搵食地圖 多國美食任你揀
2018-11-30
【又到聖誕】任食各款海鮮、環球美食!聖誕自助晚餐精選
2018-11-26
佔地三層!九龍城新開日式料理 一次食勻壽司+鐵板燒+ 爐端燒(有片)
2018-11-19
2019及歷屆米芝蓮香港澳門指南完全版
6天前