全港首間VR遊戲主題酒吧餐廳 必食泰式燒牛肉 $20舖Double Tap (有片)
2019-12-09

近年興起VR遊戲嘅熱潮,而家就連酒吧都有得玩啦~ 尖沙咀新開咗間酒吧餐廳,主力提供泰式菜同多款cocktails,而且仲有多款自家研發嘅VR體感射擊遊戲玩添!最平廿蚊舖!

食泰菜必食生蝦,6隻刺身又爽口又甜身,點埋微酸帶辣嘅醬汁,作為前菜好開胃。

沙律方面,成日都食青木瓜沙律或者柚子沙律,今次試下泰式三文魚沙律啦。望落好似好辣咁,唔好咁快就畀個樣嚇親。三文魚焗熟後,淋上以香茅、乾蔥、辣椒乾等泰式香料自家製成嘅醬汁,少少辣啦,但好惹味,會食唔停口der。

佐酒梗要食返啲炸嘢同串燒,泰式炸通菜夠晒脆口;串燒一碟包晒有豬肉牛肉同雞肉,肉香醬濃。

特別推介泰式燒牛肉畀各位牛魔,邊邊位燒到有微焦,肉色粉嫩,肉質軟腍仲好juicy。

嚟得酒吧,主腳當然係酒啦,兩款招牌cocktails介紹返,青色嘅Amazon帶有青瓜、青蘋果等香味,味道清新,側邊仲有兩片用火槍燒過嘅焦糖蘋果,好甜身。不過同時帶有淡淡嘅草青味,未必人人喜歡。

以骷髏骨杯盛住嘅係Bear Attack,插住兩粒輕輕燒過嘅棉花糖,如果因為咁你就以為呢杯係甜嘢,少年你真係太年輕。剛剛相反,調製過程中加入咗朱古力粉同咖啡粉,咖啡味係幾香嘅,味道較濃而且偏苦,兩粒棉花糖係畀你苦中一點甜啊。

就咁飲酒有啲悶?搵啲嘢玩囉。潘多拉盒子就夠晒刺激,一盒12支,遮晒包裝睇唔透內籠。只可以話畀你聽入面有辣有唔辣,成班朋友一齊隨機抽嚟飲,睇下邊個最good luck啦,甜酸苦辣嘅味都有㗎,抽之前記住Roll定機喎科科。

至於大家最期待嘅VR體感射擊遊戲,分別有6部VAR BOX,同2個VAR CUBE。前者可以多人連機對戰,內置3款遊戲,包括模擬真正槍手射擊嘅double tap同以風一身VR推塔嘅射擊遊戲,拎起手槍,戴上遊戲專用眼罩,廿蚊即可開局。餐廳仲特設遊戲主題飲品,輸咗嘅朋友仔要飲酒精度高啲嗰杯酒。

而VAR CUBE玩嘅則係Zombie Jail遊戲,三人一隊,一齊打喪屍,仲有手槍、散彈槍同機關槍幾款槍械選擇,增加真實感。同樣設有遊戲主題飲品,成班friend一齊玩最開心。

Box Hong Kong
地址:尖沙咀諾士佛臺1號10樓


文:Kar
相、片:Tom Li


關鍵字
尖沙咀
酒吧
cocktails
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
【2021生日優惠】超爽著數!免費任飲任食日式燒肉/火鍋(持續更新)
2021-04-12
【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09
帶媽媽味遊異國!母親節Brunch六選
2021-04-20
3月份好評餐廳十強
2021-04-08