平時食開嘅拉麵，唔係豚骨湯底就係雞白湯底或者鰹魚湯底，今次要同大家介紹一間以牡蠣湯底做主打嘅拉麵店！各位蠔迷準備好了嗎？

呢間拉麵店大有來頭，係連續3年獲得日本米芝蓮一星嘅拉麵名店——金色不如帰嘅姊妹分店。新店位於銅鑼灣，以蠔湯作主打，另外有4款新店限定嘅小食，全部都係以蠔為主題！

牡蠣鹽味拉麵嘅湯底，由星級廚師山本敦之親自研製，用上幾十斤鮮蠔，同埋秘製配料，低溫慢煮而成。伴埋自家製嘅日本牡蠣醬、鮮蠔油、低溫叉燒，以及多款時蔬配料包括意大利蕃茜、火箭菜、紫洋蔥、京蔥。餐廳更特意引入日本ACM淨水設備過濾食水，保持湯底品質。建議大家品嚐嗰陣，先嗶一匙湯底，混埋蠔醬，試試濃郁帶微甜嘅蠔香，之後先再撈勻個湯底。至於拉麵則選用100%北海道產小麥粉製作，麵條偏軟身，每啖都有蠔鮮嘅味道。不過如果想要食到埋原隻牡蠣，就要叫埋牡蠣小食喇。

4款小食中，最推介醬漬牡蠣一口飯，以脆身嘅紫菜夾住用自家製鮮蠔湯煮嘅成蠔飯、醬油漬廣島蠔，仲有幾片青瓜。層次鮮明豐富，醬油濃味得嚟亦滲出蠔鮮味，而青瓜則正好發揮到清爽同中和作用。

至於菇燒牡蠣串，一串串有日本廣島蠔、直菇、風乾火腿等。食落主要係濃重嘅醬油味，不過都滲有紫蘇葉辛味嘅。

另外仲有炸漿薄脆嘅牡蠣野菜天婦羅，同埋味道相對較清嘅蠣泡茶漬飯。

 白桃焙茶、完熟蕃茄梳打汽水

為慶祝新店開業，由即日起至6月25號，凡惠顧牡蠣鹽味拉麵一客，即可獲贈小食，菇燒牡蠣串一串或者牡蠣野菜天婦羅一客。

牡蠣不如帰
地址：銅鑼灣百德新街57號Fashion Walk地下A號舖

文：Kar
相、片：Wilfred Chui