一、抵食類
室內運動場藏$52早餐 茶咖廳
Photos by hhf1012
無錯，真係$52，就嘆到呢份有齊炒滑蛋 、煎雙腸、煙肉、茄汁豆、蘑菇、沙津同多士嘅All-day breakfast。雖然食得出係大部分都係現成貨，味道亦唔係好味到令人眼前一亮。不過喺而家買個食個空氣麵包都要$10嘅香港嚟講，CP值算高㗎啦。
隱世小店嘆$68列日窩夫早餐 小灶子
Photos by eatsalad
呢間位於荃灣商場裡面嘅Cafe唔單止舖頭細細，連門口亦比較低調，隨時行過都唔覺眼。但入到去就係另一番天地。最特別嘅地方係將多士改做列日窩夫，即係比利時鬆餅，口感扎實唔死甜。配搭嘅沙律、薯角、煙肉同煎腸都唔錯，但奄列稍嫌多油咗少少。唔鐘意列日窩夫嘅話仲可以揀西多士。
尖沙咀$65 Combo早餐 Barista Caffe
Photos by Wayman
尖沙咀食嘢一定貴啲？唔一定嘅，行多兩步一樣搵到平靚正嘅All-day breakfast。呢間Cafe有Light同Combo兩款，建議大家加多少少錢嘆Combo，有煎雙蛋、多士、煙肉、香腸、茄汁豆、蕃茄同沙律。而且食得出有落心機，香腸同火腿都唔係平價貨色，沙律嘅黑醋汁好味之餘亦落得重手。
二、特色類
海邊清新Feel早餐 MG Cafe
Photos by foodhistories
觀塘海濱長廊旁邊嘅歐陸風Cafe，連份All-day Breakfast嘅賣相都同Menu上個名一樣係Breakfast Fantasy。以加咗芒果汁同烤菠蘿嘅嘅沙律圍邊，特別靚之餘仲特別清新可人。中間嘅炒蛋亦滑溜，如果黑松露係加埋落去一齊炒而唔係就咁放喺面，應該會更誘人。炒蛋下面仲有多汁嘅大啡菇。其他茄汁豆、煙肉、香腸同多士都及格。
回到過去懷舊冰室 石屋咖啡冰室
Photos by moritatintin
唔好睇小九龍城嘅呢間石屋，原來佢係有七十年歷史嘅三級歷史建築，活化後就以社企形式去經營呢間以懷舊為主題嘅冰室。雖然叫冰室，但亦供應唔少西式輕食，包括呢份全日供應嘅Deluxe breakfast。煙肉、歐陸雞肉腸、煙三文魚、茄汁豆同牛角包都有板有眼，煎蛋仲可以轉炒蛋。
窩夫控必試勁量早餐 Green Waffle Diner
Photos by Duffy Bear
店如其名主打各種窩夫，所以連All-day breakfast嘅常見嘅多士都轉做窩夫，窩夫蛋香濃郁而且外微脆內鬆軟，加少少糖漿就夠好食。另一驚喜係炸薯仔粒，乾身得嚟相當香口。再加炒蛋、煙肉、香腸、煙三文魚同多士，呢份勁量早餐，建議細食嘅女士搵埋朋友開心Share！
自家果醬Jam出新意 一起果醬
Photos by 肚餓上班族
平時食All-day breakfast可能都會覺得果醬係配角，但嚟到呢間以果醬掛帥嘅Cafe就搖身一變擔正做主人公！特別配上烘過嘅厚多士再加牛油同自家制嘅無添加果醬，味道天然香甜無得輸。雖然配搭嘅炒蛋、磨菇、煙肉、茄汁豆、香腸同番茄都係一般水準，但勝在果醬夠清新，畀你一個Refreshing嘅Good Morning。
三、經典類
人氣悠閒Cafe嘆豐富早餐 Cafe Paradise
Photos by Miss 豆釘
去食All-day Breakfast可能都係想Hea下，所以悠閒Feel嘅Cafe就特別多供應All-day Breakfast，呢間亦唔例外。一份Paradise Energy有齊炒蛋、煙火腿、漢堡扒、法蘭克福腸、茄汁豆、薯餅、烤番茄、超雜菌、田園沙律同多士。另外仲有Paradise Vegetarian，即係All-day Breakfast嘅素食版。
心機文青餐廳Take a break Little Break Coffee & Kitchen
Photos by babyccc
呢間行簡約路線特別有文青Feel嘅Cafe，都畀唔少食家稱讚出品有心機。喺呢份All-day Breakfast上面亦睇得出，雞蛋唔係一般炒蛋或者煎蛋，而係海膽炒蛋！另外亦有香噴噴嘅黑松露炒蛋可以揀。煙三文魚、香腸、火腿、沙律、茄汁豆、薯餅同牛角包亦無馬虎，擺盤亦有心思，係細心嘅。
經典英式全日餐 BRICKLANE
Photos by Flora FaFa
提到All-day Breakfast不得不提嘅餐廳之一，由裝修到Menu設計都最有英倫Style。一份Everything就有煙肉、茄汁豆、芝士、火腿、薯餅、大啡菇、香腸、煙三文魚、沙律、多士，雞蛋仲可以任揀烹調方式。特別推介水波蛋，一嚟唔係好多餐廳都可以轉水波蛋，二嚟佢地嘅Egg Benedict非常出名，水波蛋亦自然相當有水準。
隨時接收最新資訊
讚好OpenRice專頁！
