全場劃一收費 $20、$40、$60食海膽山+刺身+鍋物 灣仔新開日式食堂(有片)
2019-02-27

月尾手緊又想食下好西?灣仔呢間新開平民日式食堂係唔錯嘅選擇!餐廳由日本人老闆伊藤 紘明主理,佢希望將日本大眾酒場同平民食堂呢種文化帶到香港,所以開設「246食堂」。餐廳無論食物定飲品都同其名一樣,全部食物價錢都係$20、$40或$60。價錢雖然平,因為有豐洲市場水產做後盾,所有食材都係新鮮運到,質素可以媲美五星級酒店架~係咪好抵食先!



海膽富士山($60)

$60呢個價錢真係有好多抵食之選,海膽富士山上放滿濃郁鮮甜嘅海膽,同坊間嘅海膽壽司相比份量足足有兩倍咁多,啖啖都係海膽,海膽控咪走寶!


大三元壽司($60)

單單一件壽司上就鋪上黑鮪赤身、腹身同蔥花黑鮪腹身魚腩蓉,一啖就食到黑鮪唔同部位嘅味道,有肥有瘦,口感又豐富咗。


A4和牛稻庭烏冬($60)

稻庭烏冬都唔係配普通牛肉咁簡單,而係配上兩片A4和牛,和牛煮到微微紅色,油脂豐富,入口慢慢溶化,配埋煙煙韌韌嘅稻庭烏冬簡直係Perfect match!


和牛壽喜燒鍋($60)、乳白海鮮鍋($60)、柚子胡椒豚肉鍋($60)

六十蚊就食到鍋物?係啊無睇錯啊!和牛壽喜燒鍋一樣用A4和牛,就咁睇牛肉油花就知係靚野,配埋蔬菜、冬菇同粉絲,甜甜嘅醬汁會愈食愈開胃~另外仲有鮮味濃郁嘅乳白海鮮鍋同清爽嘅柚子胡椒豚肉鍋揀,總有一個啱口味!



和牛大根煮($60)、軟殼蟹天婦羅($60)

和牛牛筋同大根都煮到入哂味,入口即溶。軟殼蟹天婦羅炸到金黃香脆,食落香口又有蟹嘅鮮甜。呢兩款小食都係送酒一流架~


特大海鰻壽司($40)、牛油果軟殼蟹卷($40)

$40都食到唔少高質壽司,海鰻壽司以蒲燒方式製作,手臂咁長嘅鰻魚鋪喺壽司飯到,好滿足啊。牛油果軟殼蟹卷,軟軟嘅牛油果配上香脆嘅軟殼蟹,估唔到又幾夾。



黑鮪腹身壽司/刺身($40)、蔥花黑鮪腹身魚腩蓉壽司($40)、三文魚子軍艦($40)

餐廳選用嘅黑鮪全部都用70kg以上,肥美又充滿油脂甘香,鮮味十足,無論咩整法都咁好味~三文魚子軍艦份量一樣咁震撼,師傅整果陣一啲都無手軟啊!





更多【新店直擊】:
1. 牛魔王出動!旺角新開燒肉店 稀有M9+全血純種澳洲和牛
2. 西營盤新開一人一日式海鮮鍋 札榥黑芝麻担担湯+北海道牛乳魚湯
3. 居高臨下歎香檳蝦餃、片皮烤鴨 中環新開靚景摩登中菜館


鐵板黑椒蔥花牛脷($40)、唐揚三文魚旗($40)、燒油甘魚魚鮫($40)

牛脷以黑椒同蔥花調味,用鐵板上食落香口惹味。三文魚旗同油甘魚魚鮫都好香脆,前者充滿油香,後者魚肉嫩滑。





蔥花油甘魚壽司($20)、唐揚炸雞($20)、蕃薯/南瓜天婦羅($20)、宮崎產燒腸($20)

平時食日本野廿蚊食到啲咩?嗱呢度都幾多選擇,蔥花油甘魚壽司用造型可愛紫菜杯裝住,記得襯紫菜變腍前快啲放入口啦~所有炸物都即叫即炸,而且粉漿唔會做到好厚。仲可以食埋宮崎產燒腸添!







溫馨一提每人最低消費係一百蚊,以日本菜嚟講呢個價錢食到呢啲質素,真係唔係咁易搵到!





246食堂

地址: 灣仔謝斐道415-421號積福大廈地舖B




文、相、片: Yanica


關鍵字
日式
灣仔
壽司
刺身
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【3月生日】優惠情報!有折扣仲有生蠔送
2020-03-03