御進私房菜

 御進私房菜由董事及總廚鍾志強師傅主理。

火燑菊花菜

其實菜嘅味道都不一定單調，呢味菜雖然完全無落鹽，但師傅將少量金華火腿丶新鮮雞及高質赤肉斬件洗淨飛水，然後放入燉盅燉六小時，燉出鮮味上湯。娃娃菜用小刀切成菊花形，煮至七成熟後撈起放入上湯浸至淋身，非常入味。

百花桂魚卷

而百花桂魚卷將桂魚捲起，包裹少量金華火腿絲、冬筍及冬菇絲一齊食。呢道菜同樣一粒鹽都無落，主要食返材料嘅原味。捲起魚片後用芹菜絲束起蒸五分鐘，用雞湯埋芡，加入蛋白後淋上魚卷，金華火腿帶微微鹹香，所以即使唔落鹽亦都唔會蓋過魚嘅鮮味。

花雕蛋白蒸蟹鉗

選用新鮮生猛大肉蟹，特別厚肉及鮮甜。用細火蒸約 8-10分鐘，再淋上以蛋白 丶清水及少量鹽製成嘅芡汁，調味簡單，唔會搶去蟹嘅鮮味。

御進私房菜
地址: 灣仔灣仔道83號3樓
電話: 25756966

胡同

 胡同菜式由張勇強大廚主理。

薑汁玉翡翠

以萵筍製成嘅涼拌開胃菜，先將萵筍絲下鑊煮至微微出水，放涼後配以自家製嘅葱蒜油及薑，整道菜薑味較濃，好開胃！

雞樅菌爆蝦球

比起平時爆炒蝦球落少三分之二鹽，而且蝦球特別爽口。除咗蝦新鮮外，仲要經過「三溫暖」，先浸啤冷水，再汆滾水，最後拉滾油，蝦肉更加爽口彈牙。而雞樅菌營養豐富，菌味好香濃。

白玉金盞

最特別係個炸巢！以銀魚製成，香脆之餘帶鮮味。銀魚巢盛載住海鮮、炒蛋白及帶子，帶子微微煎香，而且厚肉鮮味，加上鮮甜蛋白，一啖食真係好滿足。

胡同
地址: 尖沙咀北京道1號28樓
電話: 34288342

Dim Sum Library

 主打精緻點心的Dim Sum Library由梁國華大廚主理。

松茸冬菇包

有冇諗過食點心都可以少鹽少糖呢？Dim Sum Library特意推出素點心，方便素食人士之餘，崇尚健康嘅朋友都多個選擇。松茸冬菇包包身鬆軟，餡料有原隻冬菇，加入「菌中之王」松茸提味，而外表呈啡色係因為添加咗少許朱古力醬，味道就更加香啦～

紅菜頭野菌餃

餃子皮薄身之餘煙韌，係功夫之作。以紅菜頭及野菌作餡料，減少一半鹽同糖用量，主要以野菌之鮮同紅菜頭之甜提味，養顏又好味。

花膠魚湯津白

魚湯呈奶白色，鮮味十足～而紹菜吸收晒魚湯嘅鮮味，同時食到菜嘅甜味同魚湯嘅鮮味，加埋花膠增加口感，用魚湯提味比平時減少七成鹽添！

Dim Sum Library
地址: 金鐘金鐘道88號太古廣場1樓124號舖
電話: 36430088 

* 資料由客戶提供