倫敦名店Duck&Waffle現已進駐中環 必試鴨肉窩夫+香港限定菜式 (有片)
2019-09-09

今年可以話係過江龍嘅天下,一間又一間嘅外國名店相繼進駐香港,踏入9月,就有英國倫敦嘅人氣餐廳登陸。呢間以鴨肉窩夫聞名嘅餐廳,係倫敦以外嘅首間分店,嚟到香港,繼續秉持傳統,由朝早到深夜都開店營業!首本名菜當然有得食,另外仲有幾款香港限定嘅新菜式添!

招牌菜鴨肉窩夫,無論製作定係食用都相當考功夫。選用由英國運到嘅鴨髀,先醃製48個鐘再油封10個鐘作備用,收到落單時再即場製作。厚身軟綿嘅窩夫上,放上新鮮炸起嘅油封鴨髀同埋鴨蛋,賣相吸引。

相機食完就到自己食喇,先將鴨髀拆肉,拮穿隻蛋黃,淋埋餐廳自家調製嘅芥末楓糖漿,一啖放入口就會感覺到鹹甜交融嘅豐富口感,但又出奇地夾喎,而且鴨髀皮仲有微微脆口添!

另一道推介必食嘅係鵝肝焦糖布甸,運用鵝肝吉士醬入饌,再以焦糖燒焦表層,就咁望落好似平時嘅焦糖燉蛋一樣,但食落就發現充滿驚喜喇。鵝肝嘅羶香味濃郁,加上超creamy超滑嘅口感,就好似啖啖鵝肝醬溶喺口中一樣,食到停唔到口。

香辣牛面頰冬甩亦係倫敦招牌菜之一,炸波波嘅外形靈感最初原來係嚟自傳統中式包點,最後選擇以冬甩做外層,裡面包住辣辣地嘅牛面頰肉碎,外層脆內層軟,記住要點少少汁食喎,酸酸甜甜咁原來係杏脯醬呀,感覺又清新又新奇。

 香辣燒烤脆豬耳

香港限定菜式不能不試啦?生牛肉他他混入烤過嘅牛肉脂肪,佐以醃洋蔥、Marmite醬醃蛋黃同麵包,滿滿肉香之餘、口感軟滑。

味噌吉士撻亦係香港限定嘅甜品。雖然話就話甜品,但食落係甜中帶鹹㗎,幾過癮啊!

呢度嘅cocktails同樣充滿特色,成隻鴨仔浮喺面咁cute嘅呢杯係Slow Spritz,以黑刺李氈酒、蜜桃甜酒、Williams利口酒同青瓜苦精酒等製作,味道酸酸甜甜。女生想飲再甜啲嘅可以Sanpquack,呢杯直情用鴨仔杯上添~ 打卡一流。用上菠蘿氈酒、荔枝利口酒、raspberry糖漿等,成杯都充滿果甜。

而平時飲開Bloody Mary嘅朋友,就要試呢度獨有嘅Ducking Mary喇!淨係賣相都夠晒特別,插咗件waffle同椒仔喺度,飲落比平時嘅Bloody Mary多咗陣若隱若現嘅鹹香味!因為特地用咗鴨肉窩夫嘅調味料去製作啊原來,將鴨油放落vodka度浸咗幾個鐘,又加咗啲芥末籽同是拉差醬,唔怪得飲落仲有啲鹹鹹地啦。


Duck & Waffle
地址:中環港景街1號國際金融中心1樓1081號舖

文、相、片:Kar


關鍵字
中環
過江龍
英國
窩夫
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18