來一個台灣沒完沒了抹茶之旅(中南部篇)
2016-12-06

點解咁多台灣人同香港人咁Friend?皆因我哋好多嘢都好似,淨係講食,台妹同港女都有一種食物會令佢哋瘋狂,就係抹茶,香港啲抹茶甜品開得快,但都唔夠港女們去試得快,唔夠喉不如走一轉台灣去搵下人家嘅抹茶美食,成日講台北咁大路,今次走遠少少去台中同台南啦,打卡都型啲嘛!

抹茶X紅豆X年糕X三文治 肚房公正1号店

圖:食omo

台中西區一條巷仔裡一間有兩層嘅餐廳行簡約復古風,好啱假日嚟Hea食個早餐,比較出名係用飛碟機整三文治,其中最愛歡迎係抹茶紅豆年糕熱壓三文治,份量都幾大,配有薯條,麵包烘到脆黃,裡面有香濃抹茶加佢嘅好朋友紅豆已經夠夾,仲要有彈牙甜年糕,味道唔係好出,主要將材料黐埋增加口感,另有半融芝士片,邪惡指數爆燈!

有凍食有熱食 只園抹茶



圖:Emily chiouSevenYU

呢間店睇落好日式,其實係台北本地抹茶甜品名牌,而家台中都有分店,老闆專誠到京都揀選抹茶,但用獨門比例調配,形成特別細緻嘅質感。必試鐵板抹茶熱蛋糕,抹茶蛋糕底層舖有蜜紅豆,上層有杏仁脆餅同一球玄米抹茶雪糕,服務員會將抹茶白朱古力醬淋上去,聽到咋咋聲實在太吸引喇!,


另外,抹茶卷有抹茶醬餡,蛋糕鬆軟充滿抹茶味;抹茶千層派用三片酥脆焦糖派,中間有抹茶吉士同豆沙,好鬆脆,但留意只限星期五六日供應,仲有抹茶千層蛋糕、抹茶tiramisu、抺茶Cheese Cake、抺茶朱古力蛋糕、抺茶柚子撻、抹茶新地......你揀好未呀?

限量心機手做抹茶甜品 草DORO

圖:毛毛cabbage1109斑比

高雄鼓山區呢間草DORO,全部食物都係堅持每日新鮮手做,所以唔會話大量生產,每樣甜品都好精緻。

特製米麵包睇落似鬆餅,裡面加咗黑糖和麻糬,外層食起來很脆,內裡煙韌,抹茶香不停繚繞鼻腔與口腔之間。抹茶千層蛋糕一口咬下嘴裡全部抹茶苦味,覺得苦可以沾上黑糖一起吃,千層派中間有草莓乳酪。

另外濃抹茶玫瑰蛋糕藏咗六花亭生朱古力同Codiva35%白巧克力,上面粉色生奶油由山形玫瑰蜜調製而成的,甘苦之餘有花香;配上澄蜜抹茶Tiramisu,選用法國香榭成花蜜製成蛋糕,並浸於3種酒包刮宇治抹茶酒、梅酒及一種神祕酒36小時,面層再加一保堂抹茶粉,充滿柑果蜜香。

提提大家,呢度唔係好大,一日只做12轉檯,去之前一定要事先預約,如果唔係好大機會撲空。

京都名物 三星園抹茶新町稻荷



圖:fish615JessieChou

一個綠茶都市點都要有啲日本抹茶老牌進駐,台中同高雄都有來自京都嘅三星園分店,佢哋由日本幕府時期已經開始種植抹茶,過五百年歷史,質素有保證。有外賣店,亦有堂食,後者裝修都好有舊日本小船風情,必試就一定係「將軍的眼淚」,抹茶雪糕上面再灑滿抹茶分,濃度超高,重回甘,加上玉米脆片、白玉、紅豆增加甜品同咬口。

好彩嘅就記住食埋一天限量30份嘅山城御判燒,特濃抹茶松露朱古力熱鬆餅上再淋上抹茶朱古力醬,入口即溶,整個口腔都充滿抹茶味,係少有嘅做法,呢度絕對係抹茶控集郵好地方。

台南必買手信  依蕾特布丁奶酪



圖:台南美食地圖

香港上年就玩咗一輪芝士撻,台南呢個手信店早過香港大半年而經有,雖說唔係玩流心,不過都一樣好好味同多花款,呢個冬天去嘅就要必試期間限定抹茶紅豆芝士撻,面層係甘味較重嘅抹茶Mousse,再來係濃厚芝士味抹茶餡,最下層係紅豆餡嘅甜蜜,入口好順滑。

台南街頭爆漿紅豆餅 甜在心。紅豆餅



圖:醜女食記

台南有一檔街邊檔賣日系紅豆餅。有五種口味:淨紅豆、奶油、芝麻、花生同抹茶。你仲可以睇佢製作過程,有人話老闆會劑五圈餡,多到漏出嚟。

紅豆是自家熬煮過,每粒紅豆都好大粒,唔會太甜;花生係整顆脫殼花生炒過,帶焦香;抹茶控就緊係食抹茶味,吉士同抹茶比例適中,入口順滑,最緊要趁熱食,外皮脆口,紅豆同抹吉混合得好完美,唔會搶大家味道。


文:Marcus



其他地區精選文章:
下一站...天后!去電氣道搵食
走入荔枝角工廈 發掘唔同地方好味道
九龍城麻甩味食店推介


 

隨時接收最新資訊
讚好OpenRice專頁!

關鍵字
台灣
抹茶
甜品
Cafe
小店
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
超多打卡位!台北Cinnamoroll期間限定Cafe
2017-04-25
尖沙咀區酒店高CP值 宇治抹茶主題自助餐
2017-03-24
【新店直擊】細味抹茶甜點:御前上茶
2017-04-06
法式餐廳以京都抹茶入饌 有鹹有甜抹茶宴
2017-04-27
飲得食得 台灣豆腐人主題餐廳全部都係豆腐
2017-04-07
【開飯熱店大賞前哨戰】新店大混戰!十大生力軍餐廳
2017-05-04
本月熱門
【隨時更新】零食速報 每周新款零食、酒品點評
4天前
至甜初夏 6月下午茶推介
2020-06-15
甜蜜蜜暑假 7月下午茶推介
2020-07-03
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22
【7月生日優惠】免費食酒店晚餐.免費粥底火鍋
2020-07-02