川善茶居 抹茶心太軟
圖：Jacqueline H.
公認嘅抹茶天堂之一，抹茶控就算未去過都一定聽過上環呢間餐廳嘅大名。抹茶心太軟嘅流心程度唔算誇張，贏在抹茶味道香濃得嚟唔會澀，少少甜加上抹茶嘅回甘令人回味。簡簡單單配一球Creamy嘅雲呢嗱雪糕就夠正。
貓山皇 榴槤心太軟
圖：hkfoodtalk
榴槤Fans經過聞到香味一定會忍唔住停低嘅一間甜品店，入面唔少甜品都店如其名，用上貓山皇果肉嚟製造。例如呢個榴槤心太軟，望落以為係普通朱古力味，一切開暖笠笠嘅榴槤蓉同朱古力漿就流出嚟！朱古力甜度唔高，加埋榴槤食落都唔會覺得太膩。
甜品堂 紫薯心太軟
圖：Hin_Hins
除咗綠色嘅抹茶之外，紫色嘅紫薯亦係近年飲食風潮之一。喺Instagram同Facebook都經常見到嘅呢個紫薯心太軟嚟自呢間西環港式甜品店，雖然比較扁身但師傅火候掌握得宜，切開濃稠嘅紫薯漿緩緩流出，蛋糕鬆軟，紫薯味道自然香甜。連雲呢嗱雪糕上面都有紫薯粉㗎。
HeSheEat 拖肥果仁心太軟
圖：mykissyjade
基本嘅朱古力味一定悶？未必。呢間人氣甜品店就加入拖肥醬同果仁，甜味同口感嘅層次都立刻嚟個Upgrade。而且香滑朱古力漿甜度適中，流心效果亦唔錯，加多球冧酒雪糕，大滿足。
家香 奶黃流沙心太軟
圖：Hunter115
有無諗過中菜館都有心太軟食？呢間灣仔嘅港式Fusion餐廳就有呢個好點心Feel嘅奶黃流沙心太軟。奶皇漿香得嚟起沙，食落唔會太甜，蛋糕質地比較濕潤。唔知如果蛋糕部分再鬆軟啲嘅話，會唔會似平時喺酒樓食開嘅奶皇流心包呢？
Ideas Dessert 焙茶心太軟
圖：ryu_ng
位於荃灣嘅一間心機小店，焙茶心太軟流心程度唔算非常澎湃，但靜岡焙茶香味濃郁，甘中帶甜之餘，仲比抹茶多一分烘焙嘅幽香。而且配埋灑上焙茶粉嘅3.6牛乳雪糕，煙韌嘅白玉同香甜嘅紅豆蓉，成個Package相當吸引。
慕茶 玫瑰心太軟
圖：為食女司機
抹茶同焙茶都唔係你杯茶？咁花茶又啱唔啱？呢間隱藏喺觀塘工廈裡面以茶做主題嘅餐廳，就有玫瑰味嘅心太軟！玫瑰花漿幼滑香甜，有玫瑰花香又唔過濃。而且最正嘅可以自選一球茶味雪糕，無論係西式嘅伯爵茶朱古力、中式嘅普洱茶，定日式嘅玄米白茶口味都有。
Sense Dessert Cafe 紅白心太軟
圖：胃食小王子
普通款式心太軟食到厭嘅話，呢間分子料理Cafe可能可以帶畀你一啲新驚喜。一樣係朱古力心太軟，但配搭嘅係白色嘅分子雲呢嗱雪糕，同紅色嘅分子野莓雪芭！心太軟外面畀雪糕包圍，但切開依然有朱古力漿慢慢流出嚟，撈埋一粒粒嘅分子雪糕或者雪芭一齊食又係另一種新享受。
想甜嚐甜 七款口味心太軟
圖：阿啦
最後介紹呢間黃大仙嘅甜品小店，有食家稱佢為心太軟嘅天堂！唔單止口味有黑朱古力、荔枝玫瑰、金莎榛子、焦糖香蕉、宇治抹茶、紫薯同榴槤七款任揀，連配搭嘅自家制嘅乳酪雪糕亦非常出色。心太軟有流心效果之餘，乳酪雪糕仲係以倒轉雪糕筒姿態出場，啱哂相機食先。
隨時接收最新資訊
讚好OpenRice專頁！