佐敦酒店新buffet出場!生蠔龍蝦等海鮮6大必食回本位
2018-05-13

位於佐敦嘅逸東酒店最近裝修重開,變身成型格路線之餘,仲新開自助餐餐廳The Astor。逾千呎嘅自助餐新場,有生蠔、龍蝦、蟹腳等冰凍海鮮,又有即燒海鮮、串燒、天婦羅,以及多到數唔晒嘅搶眼甜品位,速睇有乜6大必食位先。

1.冰凍海鮮

Buffet迷最緊張嘅,當然係冰鎮海鮮啦!首先出場嘅有即開生蠔,每晚供應3個不同國家嘅生蠔品種,採訪當晚有:美國東岸Blue Point生蠔、澳洲Coffin Bay生蠔以及法國Fine De Claire生蠔。三款生蠔各有特色,有大隻有鮮甜有爽口,任君選擇,加上refill速度快,生蠔迷肯定鍾意。

其他海鮮有龍蝦、長蟹腳、麵包蟹等,每款都鮮甜多肉,亦係狂擦之選。至於調味,除咗常見嘅檸檬、cocktail sauce之外,仲有8、9款特色醬汁選擇,如柑橘醬油、紅蔥頭醋、越式冧汁等。

另一邊廂,喜愛日本菜嘅刺身絕對唔少得,三文魚吞拿魚油甘魚甜蝦北寄貝三文魚子樣樣齊,開飯仔必食推仲有加拿大珍寶牡丹蝦杯,蝦身夠大隻厚肉,口感一流。壽司方面有3-4款由餐廳師傅自家設計嘅創意壽司。

2.熱食海鮮

我知我知,海鮮迷梗係掛住豪食凍海鮮,佐呢度嘅熱煮海鮮亦好出色,款式比一般餐廳為多。喺生蠔區隔離就有個即燒海鮮檔,每晚至少有3款海鮮,如烤菲律賓龍蝦尾、帶子大蔥等,仲有清蒸青口海蝦蜆、蒸烏頭、辣炒海鮮、三文魚頭湯等。

3.即炸天婦羅、日式串燒

即叫即煮嘅日式串燒、天婦羅滋味非常,天婦羅會喺受到客人柯打後先開始炸,夠晒脆卜卜;而串燒有雞翼、雞軟骨等人氣款式,現場亦見不少食客密密拎,正!旁邊仲有不少調味料,有芝麻鹽、綠茶鹽、咖喱鹽、鹽、七味粉、黑椒等,喜愛「混醬」嘅食客們可逐一試味。

4.即切靚肉

餐廳特設非常專業嘅燒烤爐,只要轉動燒烤爐旁邊嘅轉輪,燒烤爐就會升起,廚師就可以不同火力去燒各款肉扒。採訪當晚有澳洲肉眼扒、牛仔扒等,旁邊亦設黑椒汁、肉汁醬、芥末子、法式芥末醬等調味。

另外,餐廳特別引入原隻36個月嘅西班牙巴馬火腿,喺客人面前即切即分,都幾少見。火腿薄而鹹香,配芝士口感更佳。


更多【新店直擊】:
1. 黃埔新開雞翼專門店 必試招牌玫瑰+創新鮮檸七口味
2. 生煎皇后初登場!主打招牌皇后湯麵五色水餃
3. 7/5起試業!天天海南雞飯新增和牛手卷賽螃蟹等小菜


5.印度波餅

講緊嘅係印度烤餅,每晚由印度師傅炮製出煙韌十足嘅烤餅,師傅先將麵糰放進油鑊,可不斷將油灑在麵糰上,令麵糰迅速澎漲,睇落成個「波」咁。上碟後,烤餅會慢慢冷卻而成烤餅樣,好有咬口。另有6款印度菜式,味道都幾正宗架!

6.甜品

甜品都有成20幾款選擇,有雪糕有蛋糕有糖果有朱古力,開飯仔推介有呢個即炒雜莓雪葩,味道清新微酸,可喚醒我哋「第二個胃」。

而且廚師將雪葩整成心形,好有心思,送畀女生實開心。另有即製法式crepe。

其他甜品有:意大利芝士餅、香檸果凍、荷蘭白朱古力慕絲蛋糕、香芒椰子布甸、雙層朱古力軟心蛋糕、榛子牛奶朱古力慕絲蛋糕等等等等,多都數唔晒,好彩,款款甜品都做得幾mini,試完一款都仲有大把quota試其他,放心。

餐廳設置雪糕機,用嘅係日本明治雪糕,有牛奶、咖啡及兩溝口味,旁邊仲有8-9款toppings,好味又好玩。

有部雪糕機都未夠喉?可以試埋Movenpick雪糕,有成12款雪糕口味選擇,每款試一球都覺得飽,抵晒!

小朋友最鍾意嘅candy corner都有,細路開心啲,媽咪們都「有啖好食」啦!

Buffet設任飲5款汽水,而且仲係懷舊味濃嘅樽裝添!另有啤酒任飲。


自助餐價錢
午市:(星期一至四)成人$238/位、小童及長者$188/位;(星期五至日及公眾假期)成人$298/位、小童及長者$228/位
晚市:(星期一至四)成人$438/位、小童及長者$318/位;(星期五至日及公眾假期)成人$488/位、小童及長者$358/位
註:另設加一;小童及長者年齡為3-11歲及65歲或以上。


普慶餐廳
地址:佐敦彌敦道380號香港逸東酒店B1樓


文:Joy

關鍵字
自助餐
酒店自助餐
buffet
海鮮
生蠔
龍蝦
天婦羅
串燒
甜品
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
幸福Pancake登陸銅鑼灣!鬆軟原味、開幕限定抹茶味(有片)
2018-09-24
地獄廚神Gordon Ramsay 尖咀再開分店 無敵海景伴威靈頓牛扒(有片)
2018-10-13
9月份好評餐廳十強
2018-10-08
濃而不膩!太子芝士麵專門店 必試芝士撈+咖哩撈+叻沙(有片)
2018-10-05
張敬軒餐廳新推皇后下午茶 紅絲絨盒珍珠鍊造型激真
2018-10-12