仲食腸仔包？ 4款新式麵包試過未？

2016-07-25

麵包嚟講，好多人細細個已經開始食。腸仔包餐肉包腿蛋包雞尾包豬仔包菠蘿包椰絲奶油包肉鬆包牛角包吞拿魚包方包乜乜乜基本上都應該已經食勻晒，正當話食到好悶嘅時候，麵包界都竟然悄悄起革命，近呢幾個月開咗幾間見到個包就好想試嘅麵包店呀！

去骨雞翼包　　好包

Photos by lam.yaan
元朗嘅好嘢食多到，連麵包店都特別過人！呢間絕對係非一般嘅麵包店，款唔多，但好吸引！慢煮豬腩肉包、吉列豬扒包、焦糖洋蔥芝士大啡菇包（呢個包冇肉嘅留意返），不過最吸引嘅一定係雞翼包，一個包有成三隻雞翼咁多，仲要係去晒骨㗎！即叫即整，熱辣辣仲有雞汁，夠晒juicy。未講完，雞翼有4種製法任君選擇：蜂蜜、椒鹽、青咖喱、香草醬。

五層流心包　　麥上日光

Photos by Sandyfloss & eatmugfoods
尖沙咀同灣仔都有分店嘅呢間麵包店，雖然唔係話開咗好耐，但我諗大家都唔會陌生。個包軟腍腍，芝士餡抹茶餡仲有朱古力餡同芒果餡通通都會流心，一個包仲可以有三種食法，即買即食啲芝士就最軟滑、叮熱食就有最流心，雪凍食呢就好似食緊雪糕咁！

有菠蘿嘅菠蘿包　　餅店

細細個食菠蘿包嗰陣，有冇問過「點解菠蘿包冇菠蘿」？而家唔使問點解喇，沙田一間酒店入面嘅餅店，有一個有堅‧菠蘿嘅菠蘿包喇，唔係淨係得面頭嗰塊風乾菠蘿喎，裡面啲餡係用鮮菠蘿再煮成菠蘿蓉㗎！不過成廿蚊個「菠蘿包」，都唔係平呀。

榴槤菠蘿包　　Baker Talent

Photos by namnampanda
呢間嚟自新加坡嘅麵包店，最近喺荃灣一連開咗幾間分店，主打榴槤菠蘿包。就咁睇落去，係同普通菠蘿包分別唔大嘅，但一食就知佢真係有料！有好多榴槤蓉呀，都濃味㗎喎，建議就唔好早餐食嘞哈哈。舖頭仲有個黑麻麻嘅黑武士包，你以為係芝麻？sor，係竹炭朱古力呀，酥皮嚟添㗎。

文：Kar

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。