今期流行 西班牙巴斯克芝士蛋糕 5間小店推介
2020-10-15

最近,甜品界最hit嘅蛋糕非巴斯克芝士蛋糕莫屬,外層黑黑哋,但切開其實係軟綿綿嘅芝士蛋糕。巴斯克芝士蛋糕由西班牙邊境巴斯克地區(Basque)起源,係當地嘅傳統糕點,但邊境位置近法國,所以唔少人以為巴斯克芝士蛋糕係法國甜品。咁香港邊度有得食?而家多咗好多餐廳同cafe有喇,開飯仔精選咗其中5間介紹畀大家!

芋泥巴斯克芝士蛋糕  CookHouse

 圖:餐廳甜品部Instagram

好多人都鍾意芋泥嗰種軟綿綿嘅感覺,加上芋泥比起一般嘅餡料更加天然同健康,令唔少怕肥嘅女仔都迷上佢。而粉嶺呢間cafe就將呢個兩大熱元素結合,佢哋嘅芋泥巴斯克芝士蛋糕好足料,濃郁嘅芝士味夾住層厚厚嘅芋泥,一次過滿足兩個願望!另外仲有伯爵茶味,不過巴斯克蛋糕唔係日日都有,建議想食嘅話,可能要打定電話去問下或者訂晒成個拎返屋企食都得!

超軟滑巴斯克蛋糕   La Viña

La Viña以西班牙嘅傳統食譜製作巴斯克芝士蛋糕,濃濃嘅芝士味、軟滑嘅口感,吸引。蛋糕有3吋、6吋同8吋嘅尺寸揀,最細嘅3吋即使獨食都冇問題! 原味固然有香濃芝士味,面層嘅焦糖焦香更加加分唔少;但自家研發嘅伯爵茶味亦不容忽視。為咗突出茶香味,蛋糕嘅芝士味冇咁重,啱晒啲想試下巴斯克芝士蛋糕但又怕膩嘅朋友。另外,大家仲可以揀「Very Soft Centre」,味道同原味一樣但蛋糕中間會更軟!不過佢哋以網店為主,想食要預早訂,舖面只有少量位置可以堂食。

咖啡味巴斯克蛋糕   Lucy Coffee & Food 

 圖:元朗閒人

食得太多原味cake相信大家都想試下其他口味,呢間長沙灣小店就有提供咖啡味嘅巴斯克芝士蛋糕。佢哋用自家混合嘅咖啡豆配方製作espresso,再加入蛋糕中,配合準確嘅爐溫控制,令蛋糕呈半溶狀態,咖啡嘅苦澀味中和咗芝士嘅膩感。佢哋仲會不定時供應鐵觀音半熟芝士蛋糕同冧酒提子半熟芝士蛋糕。蛋糕除咗可以喺店舖享用,早-5日落訂嘅話仲可以原個訂。

香濃巴斯克蛋糕  Chill Sweet  

  圖:餐廳facebook

係咪估唔到喺街市都可以搵到而家大熱嘅巴斯克蛋糕呢?呢間由90後店主打理嘅小店集合咗各式各樣嘅甜品,無論係中式定西式都有,大約三十零蚊就可以食到個巴斯克芝士蛋糕,CP值高。餐廳選用費城芝士製作,芝士味較一般食到嘅更為香濃。Size最細有4吋揀,一個人都食得晒,訂嚟做散水餅都得!

濃郁雲尼拿巴斯克蛋糕  Slash

 圖:shiitasfoodpicks

呢間位於深水埗嘅咖啡店係最近唔少年輕人嘅打卡熱點,而佢哋都有提供原味巴斯克芝士蛋糕。只用日本製嘅雞蛋,使用雲呢嗱籽油代替加工過嘅香草精油,質感啱啱好,唔會太軟或者太硬,芝士味適中,面層焦香。而且在場嘅咖啡師仲可以幫你客製咖啡,畀你chill住嘆cake~



文:Hailey
編:Kar






關鍵字
巴斯克芝士蛋糕
芝士蛋糕
青衣
粉嶺
中環
長沙灣
深水埗
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-11-19
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
桔梗姐妹店進駐牛頭角 8,700呎自設炒豆房及餅房 手沖咖啡配輕食
2020-11-02
Wine & Dine 2020預告 免費網上學品酒 精選品酒套裝率先睇
2020-11-19