今期流行皺皮腸粉 石磨粉漿米香重
2019-01-18

腸粉一直都係香港人嘅至愛,無論早、午、晚定宵夜食都冇問題。港式布拉腸粉相信大家由細到大都食唔少,而近排就流行一種比較少見嘅皺皮腸粉。原來呢隻腸粉並唔係咩新發現,而係潮汕、台山地方好出名嘅潮式腸粉。近期香港就開咗好多呢類腸粉嘅鋪頭,好多都強調自家石磨,又真係米香味重啲嘅。所以今次同大家搜羅咗幾間特色嘅皺皮腸粉店推介比大家去食!
 

大埔人嘅口福 友口馥

圖:MadameJ

呢間位於大埔嘅小店「友口馥」,店名取其諧音:有口福。店內石磨機即磨米漿,保證米漿日日新鮮製造。腸粉全部即叫即做。粉漿先放喺筲箕,擺上材料再放入蒸爐。而且款式都唔少,仲有櫻花蝦呢啲依家好Hit嘅食材,就算係素腸用料都好豐富,照顧埋素食者。另外有芝麻糊、砵仔糕、菜乾粥等小食,最啱同腸粉一齊食。
 

星級潮式腸 潮式腸粉家菜館

圖:foodiemoreaisamai

13年起至今五年連續獲得米芝年蓮推介嘅餐廳由元朗搬到嚟太子。得意嘅圓圈狀潮式腸粉,有冬菇、蝦米、雞蛋、芽菜等豐富配料,仲有蠔仔、蝦、魚片、肉類甚至素菜嘅配搭選擇。腸粉皮薄,加埋特製嘅醬汁嚟食,真係好滿足。除咗腸粉,鋪頭裡面仲有唔少特色潮州面食。
 

深水埗排隊店 五嫂石磨腸粉  

圖:foodie.nomoney

深水埗石磨腸粉店,成日都有唔少人排隊等食。同樣店內每日新鮮磨製米漿,所以腸粉入口有米香而且滑溜,價錢亦都親民。款式口味大路,當中以雞蛋瘦肉碎腸就最受歡迎。只要新鮮熱辣,簡單口味都好好食!
 

翻新街市小食店 食好啲


圖:文耳食圍天YenTsang4368

位於翻新後嘅啟業街市小食街入面。自家石磨米漿,腸粉即叫即做,一盒大大份。特別啲口味嘅有鵝肉腸同鯪魚肉腸。仲可以加埋自家製嘅菜莆同辣椒,更加香口惹味。
 

有粥又有腸粉 富粥

圖:Mail_csJJcaptain

雖然今次介紹嘅重點係腸粉,但呢間粥鋪嘅粥真係要講兩句先!粥品選擇多,而且粥底綿密、材料新鮮。另外,受到街坊所喜愛嘅台山皺皮腸粉,餡料有成二十款選擇,而且皮薄通透。有唔少人鍾意加生菜,令到口感更加豐富。
 

紅黑米漿夠特別 鳳鳴石磨腸粉  

圖:KitWong170

觀塘廣場內嘅小店,除咗有傳統白雪雪嘅石磨腸粉之外,仲有紅米同黑米腸粉比你揀。腸粉唔只係顏色突出,而且亦有紅米、黑米獨有嘅米香,夠晒特別。同埋有唔同調味,好似炸蒜同芫荽等等畀你自己落。
 

多菜豐富之選 潮聖

圖:joxfoodie

荃灣新店,有兩款腸粉:一係古法石磨腸粉, 另一款就係多咗蝦乾、魷魚乾等嘅潮聖石磨腸粉。兩款都會用上當日新鮮嘅蔬菜,雖然款式唔多,但用上日日唔同嘅新鮮時蔬呢點都幾有心思。
 

落街食宵夜 晶品美食  

黃大仙竹園夜市開咗冇耐,連近排好興嘅皺皮石磨腸粉都有。即場用磨腸粉米漿,米香十足。除咗大路嘅牛肉同叉燒之外,仲有比較特別嘅秘製麻辣雞絲。
 

文:Yanny

關鍵字
石磨腸粉
皺皮腸粉
腸粉
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06