人氣韓國菜館將軍澳開分店 豬髀仔芝士拉絲比賽 拉至指定高度可獲半價
2020-07-15

喺疫巿下開新餐廳,除咗有股勇氣之外,創新諗法亦唔少得。有間人氣韓國菜館,最近喺將軍澳開新分店,日日午巿都大排長龍,餐廳仲有多款新菜式,同埋拉絲「挑機比賽」呢~ 夠晒話題性。

自問係芝士控嘅朋友仔,等疫情過後記住要搵時間嚟朝返個聖。全新菜式邪惡拉絲豬髀仔,用咗4款咁多嘅芝士去製作,包括水牛芝士、車打芝士、巴馬臣芝士同奶油芝士。等啲芝士開始進入熱溶狀態嘅時候,就可以放幾隻豬髀仔上去,喺一片金黃芝士海上面捲呀捲呀,捲到成隻髀都畀芝士包圍住咁食,係治癒嘅。豬髀仔嘅製作都絕不馬虎架,加入咗黑胡椒同蜜糖去醃製,再放入焗爐烤製,鎖緊肉汁。食落陣陣芝士香之餘,亦有突出嘅蜜糖甜香。

餐廳亦特別搞咗個鬥芝士拉絲比賽,叫咗呢道菜式嘅客人就可以參加。用豬髀仔拉絲,一路拉一路拉,拉得愈高,就愈多折扣。例如拉到5cm就有5%折扣,最多拉到30cm或以上,就可以成碟半價!

另一款新菜式係玫瑰糖真露醉雞翼,甫上枱就聞到陣陣酒香,片片瑰瑰花瓣亦相當悅目。師傅採用新鮮玫瑰花風乾再製成玫瑰糖,加入韓國真露燒酒烹煮,味道香甜,不過酒味可以再重多少少。

韓國餐廳,點少得近期大熱嘅400次咖啡?咖啡奶綿密,帶焦糖香,下層係3.6牛乳,口感細滑。另一杯靚靚嘅打卡特飲係閃爍藍銀河特飲,攪一攪就會見到閃令令嘅銀河星星,原來係食用閃粉嚟。飲落係藍莓嘅清新酸甜。

捧場客實會食過嘅招牌菜亞之媽炸雞同芝士岩漿炒飯,前者酸甜香辣,外脆內嫩;後者有微微辣勁,仲可以瘋狂拉絲,輕易就可以留住粉絲心。


韓閣
地址:將軍澳欣景路8號新都城中心2期1015號舖

文:Kar
相、片:Tom Li

關鍵字
將軍澳
韓國菜
芝士
拉絲
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12
滋味到家!新鮮海野海鮮+逾200款蔬果肉類 食材直送上門網站推介2.0
2020-10-08