無論咩時候都好，食完甜品總係令人心情開朗啲。最近有間喺黃大仙起家嘅人氣甜品小店，去到大角咀開新分店，乘勢推出新款甜品，乳酪雪糕都係自家製嘅，而且仲有酒精搓手液賣添！

肉桂蘋果金寶配青蘋果乳酪雪糕係最新推出自家製甜品，老闆仲特地混合咗青蘋果、紅蘋果製作，較酸嘅青蘋果切粒處理，而清甜嘅紅蘋果則切片，校啱比例令到蘋果金寶食落酸甜有致，外層仲好香脆添。跟配嘅青蘋果味乳酪雪糕係期間限定口味，混入韓國乳酪粉同3.5牛奶自家製作，微酸嘅味道同crumble好夾。

最受歡迎嘅甜品非芋圓系列莫屬。一碗芒芋，細細碗但勁足料，芋圓、地瓜圓、紫薯圓、小丸子、水晶珠、芒果粒同奶凍全部有齊，啖啖芒果甜香，奶凍滑身而芋圓類煙韌，口感豐富。 如果芋頭同蕃薯嘅味再突出多少少就perfect池。

推薦榴槤控可選榴槤飄香忌廉泡芙窩夫配乳酪雪糕，窩夫外脆內軟，舖頭選用嘅係馬來西亞D101榴槤蓉，香味較重。拼盤上另外有自家製奶蓋，鹹鹹地平衡返榴槤嘅重口味。仲有微酸嘅乳酪同埋脆口杯芽玄米粒。

如果講到打卡甜品，就一定有火焰泡芙雪山同花之水滴份喇。前者以輕盈嘅忌廉蛋白蓋住微脆泡芙，再用火槍輕輕燒兩燒，視覺味覺都得到滿足。荔枝玫瑰水滴嘅賣相絕對拎滿分，碟邊圍滿既係裝飾，亦係最佳調味嘅白朱古力紅莓脆脆、荔枝玫瑰醬、荔枝肉，中間就係粒晶瑩通透嘅櫻花水玄信餅。彈彈der，味道較淡，但撈埋側邊啲醬呢，甜度就啱啱好。

想甜嚐甜   
地址：大角咀嘉善街18號利奧坊二期地下G703號舖

文、相、片：Kar