近年都有唔少粵菜館開業，尖沙咀最近又一間加入戰場！餐廳主打多款手工中菜，菜式雖傳統但外面唔係周圍都有得食，選材方面堅持用料新鮮，調味都係自家調配，希望突出食物原味，係誠意之選。
風味碌汕頭鵝
呢味就真係一道功夫菜喇！大廚話碌鵝唔同滷水鵝，滷水鵝可以一次過浸好多隻，但碌鵝一定要加入黃豆、生抽等調味後，用人手碌足一個鐘，花時間又花心機。因為製作繁複，而且一定要人手做，所以每日限量供應5-6隻咋，想食就要早啲去～鵝就選用惠州天然放養黑草鵝，約 5-6斤重，呢種鵝特性就較軟身無膻味，而且鵝味夠重，所以只作簡單調味就突出到鵝嘅鮮味喇。
阿不醬油炒牛河
炒牛河平時喺茶記就食得多，呢味招牌醬油炒牛河，用自家調配老醬油加上大蔥等炒成，有鑊氣。而且牛肉係選用澳洲和牛牛頸脊，肉質鬆軟又滑身。
XO醬炒手工有料蘿蔔糕
同樣都係大廚推介嘅招牌菜！由揀蘿蔔到醬汁，自家手工製作嘅蘿蔔糕，加入足料嘅自家炒香臘味，如臘腸、臘肉、蝦米以及自家製XO醬，食落好香～
更多【新店直擊】： |
芝士奶皇大虎蝦
黃金蝦嘅變奏版，加入巴馬臣芝士及奶皇，香濃惹味～蝦方面就選用印尼虎蝦，有手掌咁大隻 蝦甜肉爽。
原隻雞粒鮑魚酥
鮑魚控留意！呢度嘅自家製鮑魚酥都係用心之作，牛油曲奇皮上先放上炒香咗嘅無激素雞粒，再放上自己炆嘅新鮮鮑魚，口感同味道都好豐富。
點心拼盆
想每樣點心都試吓又無咁大個胃？咁就叫個點心拼盆試試，有黑蒜帶子餃(選用日本北海道帶子) 、蝦餃、金魚餃及鮑魚燒賣。
地址: 尖沙咀河內道18號K11購物藝術館3樓310-311號舖
文、相、片: Yanica