京都昭和風喫茶店登陸旺角 必試自家焙煎虹吸咖啡+香港限定忌廉焦糖吉士布甸
2021-05-28

旺角最近新開一間走昭和風格嘅咖啡店,原來係嚟自日本京都、有超過半世紀歷史嘅喫茶店!主打虹吸咖啡,用嘅係從日本總店直送到港嘅自家焙煎咖啡豆,確保品質。同日本喫茶店一樣,亦有供應適合配搭咖啡嘅甜點,必食香港店獨家兼限量供應嘅忌廉焦糖吉士布甸。
 


Sonia Coffee喺1970年,由長谷川慎一先生於京都創立,主要係供應自家焙煎咖啡豆畀同行,後來亦開咗間喫茶店,以家庭形式經營招待客人。旺角店係品牌嘅首間海外分店,用嘅咖啡豆100%由日本總店直送到港,都係由創辦人長谷川先生同家族成員親自焙煎!
 


小店嘅招牌係虹吸咖啡,皆因比起其他咖啡嘅沖煮方法,虹吸係以高溫持續萃取,更能夠將咖啡豆最原始嘅味道同香氣突顯出嚟,口感亦會更清爽、圓潤。另一加分點係客人可以挑選自己鍾意嘅咖啡杯,亦可以到吧枱前欣賞虹吸咖啡嘅沖煮過程。
 


虹吸咖啡(價錢按咖啡豆而定)

拍攝當日嘅係Mocha咖啡豆,聞起嚟的確有少少朱古力苦甜香,飲落咖啡香氣的確比一般手沖咖啡更濃,Aftertaste甘味亦更突出。唔單止虹吸咖啡用嘅豆會不定期更換,連House blend亦會大約兩個禮拜換一次,最近就係巴西同印尼嘅拼配,帶果香之餘甜度亦較高,適合製作Latte或者Americano。
 


忌廉焦糖吉士布甸($38)

喺京都店曾經作為期間限定甜品,而家就成為香港店獨家!以新鮮雞蛋加上鮮忌廉等製作,蛋香濃郁,加上焦糖嘅苦甜香味,相得益彰。口感軟滑綿密,配香濃嘅虹吸咖啡一齊食就最啱。
 

更多【新店直擊】:
1. 香港少見Detroit style pizza+流心蛋卡邦尼薄餅 上環新開美式風格咖啡店
2. 正宗潮州菜館尖沙咀開新分店 必試招牌滷水鵝肉拼盤、蟹黃脆皮海參伴柚皮
3. 備長炭燒鳥專門店 多款雞肉/內臟串燒 銅鑼灣新開日式居酒屋

 


喫茶店原味鬆餅($58/1塊,$88/2塊)

標榜以全天然食材人手製作,選用上等蜂蜜、日本麵粉、新鮮雞蛋慢火烘成厚身鬆餅。口感紮實鬆軟,蛋味香濃,配搭楓糖漿甜度啱啱好。
 


溏心蛋沙律吐司($48)

以烘過嘅丹麥吐司加上雞蛋沙律同溏心蛋,吐司嘅牛油香同沙律醬嘅酸甜、雞蛋嘅香味都好夾。配搭沙律亦可以解膩。
 


昭和雪糕梳打($68)

喫茶店嘅經典雪糕梳打,有巨峰葡萄、白桃,同甘王草莓三款口味,都有好搶鏡嘅漸變效果,加上雲呢拿雪糕,味道略甜但打卡一流。
 




Sonia Coffee
地址:旺角太子道西193號MOKO新世紀廣場MTR層M52號舖
*試業期間內餐單及營業時間會不定期作出調整,請留意餐廳Facebook/Instagram




文、相:Cathy

關鍵字
旺角
咖啡
虹吸咖啡
布甸
喫茶店
Sonia Coffee
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
1天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06