中環高質Omakase壽司/鐵板燒 大隻生蠔+鮑魚Risotto+ A5和牛牛肉厚燒
2021-02-04

新一年除咗要繼續努力防疫,亦要活在當下呢,有好嘢梗係要食咗先啦~ 落蘭桂坊唔一定去劈酒嘅,可以去呢間高級日本料理享受返一趟「日本味之旅」。餐廳主打鐵板燒同壽司,供應多款日本直送嘅魚類同海鮮刺身,仲有和牛。

先介紹一下佢哋嘅Omakase壽司套餐,包括咗時令前菜、刺身8款、季節蟹料理、手握壽司8款、鮑魚意大利飯同埋湯物、漬物加水果,非常豐富。

 蘋果木燻鰹魚 + 拖羅二食

 生蠔、慢煮八爪魚(左)、間八配赤貝、海膽及左口魚二食(右)

師傅對於食材嘅運用,相當花心思,8款刺身都以唔同嘅方法去處理。例如以熟成咗一晚嘅間八包住赤貝同海膽,喺面層加上烏魚子,魚香滿滿之餘仲有啖啖鮮味;鰹魚以蘋果木香燻過,香氣撲鼻;拖羅同左口魚亦有二食。生蠔仲大大隻,又飽滿又爽脆!

 梭子魚壽司(左)、鮟康魚肝配最中餅(右)

手握壽司亦同樣見心思,選用口感軟糯而飯粒分明嘅越光米,再按照唔同魚類嘅特性配搭赤醋或白醋。燒過嘅梭子魚加埋芥末籽醬,肉質肥美帶焦香;較濃味嘅鮟康魚肝則配上最中餅,可中和油膩感。

 鮑魚意大利飯

最吸引嘅應該係鮑魚意大利飯喇,選用澳洲大頭鮑,混入鮑魚肝醬去製作,珍珠米都做到好似risotto有嚼勁嘅口感,啖啖濃香,盡吸鮮甜精華,仲有粒粒鮑魚食到添。

至於喜歡鐵板燒嘅朋友仔,唔使羡慕,鐵板燒套餐同樣有滿足感。紅藤套餐包括前菜拼盤、刺身3款、鴨肝配紅酒啤梨汁、北海道蝦夷鮑配海膽汁、香煎龍蝦配招牌醬汁、雪葩、A5和牛牛肉厚燒、海膽炒飯、炒野菜,同埋湯物、漬物加水果。

 鴨肝配紅酒啤梨汁

其中,鴨肝配紅酒啤梨汁層次豐富,厚切嘅鴨肝陣陣甘香,沾一沾師傅調配嘅紅酒啤梨汁,連埋薄脆多士一啖放入口,絕對可以中和返膩感,保持戰鬥力。

 北海道蝦夷鮑配海膽汁

北海道蝦夷鮑配海膽汁則係一道頗考功夫嘅菜式,坐喺鐵板燒檯前望住師傅整,就更加能感受到佢嘅複雜。以大大片嘅海帶蓋住鮑魚,加大量食鹽再落埋白酒,焗一焗,最後淋上菇菌湯同海膽汁,仲有大根托底,賣相精美,味道清香,可以食得到原有嘅鮮甜。

而牛魔王最期待嘅一定係A5和牛牛肉厚燒,建議先食一粒原味嘅,感受佢喺口中慢慢融化同埋油香,之後先再按個人喜好加鹽或炸蒜。

 海膽炒飯仲有飯焦添!


T8 Japanese Cuisine
地址:中環蘭桂坊15-16號協興大廈5樓

   

文:Kar
相、片:Tom Li

關鍵字
日本菜
廚師發辦
omakase
中環
鐵板燒
壽司
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
7天前
【2021生日優惠】持續更新!5月食日本直送海鮮送西班牙紅/白酒
3天前
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15