抗疫除咗戴口罩外，食得健康增強免疫力都不失為一個好方法！中環呢間素食餐廳係李好系列餐廳李好味及李好醒嘅姊妹店，最近餐廳新出一系列嘅午市套餐同晚市外賣便當，仲有素食Tea set畀女士們嘆返個好chill嘅下午～
「Let’s Partea」下午茶套餐
素食人士都想high tea，而家又多個選擇啦！呢個下午茶套餐包括紅菜頭撻配咖喱素蛋黃醬、有助增強免疫力嘅蘑菇銀絲卷配燒烤汁，豐富蛋白質同鋅嘅麻醬百頁豆腐、創意料理糯米泡沫薯蓉同甜品紫糯米椰子烏冬配芒果蓉。
所有醬汁都係自家製，如燒烤汁及麻醬，咖喱素蛋黃醬用有機豆奶製成，好味又食得安心。
呢個套餐有九成食物都係純素，如果淨係食純素嘅朋友，落單嘅時候可以要求100% vegan，好friendly啊～
自家製午市套餐
呢個自家製午市套餐可以畀客人自由點選心水主菜搭配一款飯或麵食，而且鍾意單餸、兩餸或三餸都無問題！好似麻婆茄子用豆渣代替平時嘅碎肉，而咕嚕菠蘿炒鮮竹粒亦開胃惹味。
最吸睛係主食～一樣可以自由選配五穀糙米飯、椰菜花小米、羽衣甘藍白飯同松露野菌淮山麵四款。
椰菜花小米用小麥飯加椰菜花打碎再炒香，啱晒唔想食咁多澱粉質嘅朋友；而羽衣甘藍白飯靈感就來自白菜飯，先將羽衣甘藍炸香後加入白飯，口感同味道都好rich；淮山麵營養價值高，食完真係健康啲。
晚餐外賣便當
知道而家唔少人都鍾意買外賣返屋企食，餐廳仲有供應外賣便當，可自由揀一款主菜配一款前菜選配兩款前菜。主食方面推薦呢個黑松露雜菌燴薏米飯，帶有濃濃黑松露香氣啊。
地址: 中環威靈頓街198號The Wellington地舖
文: Yanica
相、片: Tom Li