香港本身都有唔少串燒店，大部分都係以電炭爐同普通炭製作，中環最近新開咗一間日式串燒店，唔止有資深日本師傅駐場助陣，仲係以日本備長炭同真‧炭爐製作，主打12款唔同部位嘅雞肉串，燒出嚟嘅雞肉保留到更多肉汁同肉香，兼且有近百款酒類飲品選擇，以後肉食獸又多個場揀喇。

資深日本師傅中尾翔SAN事事親力親為，由研發菜式、食材採購、堆炭起爐到製作串燒都親自處理，搓肉、透爐、燒肉……每個細節都好講究，特別係食材嘅新鮮度。餐廳只會用喺屠宰後24小時內嘅新鮮雞，12款部位包括：免治雞肉、雞肝、雞腿、雞柳、雞皮、雞頸、雞翼、雞心、雞腎、雞胸軟骨、雞尾、同埋雞心元，由於用真‧炭燒嘅關係，全部都帶有淡淡炭香。

串燒分為醬燒及鹽燒兩種，另外亦配有兩款醬料（清新開胃嘅柚子胡椒醬、微辣嘅日式芥末醬），建議兩者可梅花間竹咁食，中和醬料濃度。

咁多個部位中，最花功夫嘅應該係免治雞肉，師傅喺雞肉中混入山芋、洋蔥等食材，以人手搓肉處理，味道濃郁，而且口感豐富，軟綿綿中帶爽口感覺。

最受歡迎嘅係雞肝同雞心，前者迎合香港人習慣，大約燒至 85%熟，，入口甘香，鮮嫩彈牙，一啲腥味都冇；至於後者，則罕有地係原個雞心上碟，雖然咁樣喺燒製上較難煮熟，但口感會較佳，啱啱燒嘅即食，係會食到外脆內軟嘅口感，加埋麻油、蔥等調味就更惹味。

至於雞腿，則會喺舖頭熟成兩日，燒出嚟肉味更濃更鮮而油膩減少，啖啖肉仲要連皮食係幾正正子啊。

講到雞皮，好多人聽到都會怕肥或者怕乾，但呢度燒得剛剛好，脆脆地仲滲有雞汁，好鬼香口。而且師傅仲好細心咁切走啲肥膏先㗎，試得過啊。

而師傅私心推介嘅就係相當罕有嘅雞心圓，即係雞心隔籬嘅大動脈位置，每隻雞得一份㗎咋！對比雞心，雞心圓就多油啲啲，但係味道亦都香濃啲啲。

雞，但唔全部都係雞，豬牛串都有啲，和牛崩沙腩配wasabi比想像中夾，豚五花腩紫蘇卷則有種清新感。

串燒以外，都有多款前菜同飯丼可以選擇，要特別推介嘅就係呢款雞肝醬配麪包。雞肝醬相當濃香，搽麵包食好開胃，同埋千其唔好吝嗇，大pat大pat搽多啲啦，夠搽有突！（細細聲話你聽，醬有淨嘅話想添加麵包都唔係問題啊）

睇到呢度，酒鬼實問：串燒怎能沒有酒？啱啊！點可以冇酒？點會冇酒？呢度menu有近百款酒啊，啤酒紅白酒sake咩類型嘅都有。Sake嚟講，師傅建議串燒配襯啲比較辛口嘅酒會夾啲，阿部勘大吟釀呢隻就啱晒嘞！不過如果女生偏愛甜身少少嘅，牧の限定大吟釀都係個唔錯嘅選擇，米香果香同時散發，仲會甜喺口中迴盪一陣呢。

Birdie
地址：中環砵甸乍街45號The Steps ‧ H Code 9樓

文、相、片：Kar