一秒變出 招牌十八層海膽杯 佐敦小店全新體驗 魔術X鐵板燒
2021-06-11

食鐵板燒除咗係味覺嘅享受,視覺亦同樣得到滿足,睇住師傅即席嘅表演,確係精彩。佐敦有間鐵板燒專門店,更加創新地將鐵板燒融合魔術,一時喺個餐牌度變出一杯十八層海膽杯,一時又凌空拉出火焰,夠晒效果。

 十八層海膽杯發辦「一人前」套餐

鐵板燒專門店主理人樂師傅有超過30年經驗,為咗喺疫情下帶畀港人歡樂同滿足,佢特地向國際級專業魔術師請教,學咗幾道板斧,完美融合落鐵板料理度。想盡情質賞師傅魔術表演嘅,最好就揀十八層海膽杯發辦「一人前」套餐啦(留意返套餐最少要叫兩份起跳)。套餐包括有一杯仔餐前水果酒、時令海鮮前菜、時令沙律、十八層海膽杯、火焰海膽甲羅燒、2款鐵板時令海鮮、鐵板肉類、時令特色炒飯、燒野菜、特色紙包花膠蜆湯、吟釀清酒,同埋時令日本生果或自家製甜品,相當豐富。

 火焰海膽甲羅燒

多款菜式均加入海膽製作,火焰海膽甲羅燒除咗啖啖松葉蟹肉、蟹膏之外,仲舖上三文魚子、海葡萄、黑魚籽同埋海膽,鮮味十足。睇住師傅表演嗰陣,千祈唔好眨眼,會有凌空火焰效果啊,好有氣勢~

 十八層海膽杯

重頭戲當然係招牌十八層海膽杯,師傅介紹緊啲菜式,講講下時會突然喺本menu度拎咗杯海膽杯出嚟,為食客製造驚喜。高身長杯內放滿各式各樣嘅食材,包括北海道紫海膽,松葉蟹肉、三文魚子、粒貝、藍鰭吞拿魚拖羅容、北歐花膠、凍磯煮鮑魚、櫻花魷魚、牡丹蝦等等,每啖都有唔同嘅味道同口感,有鮮甜有甘甜,層次豐富。

 芝士海膽燒龍蝦

 鮑魚汁燒帶子

套餐既有海鮮亦有肉食,師傅會按季節挑選時令海鮮,開飯仔採訪當日就係芝士海膽燒龍蝦同鮑魚汁燒帶子。前者加入自家製作海膽醬同芝士,龍蝦爽甜帶鹹香;後者先以牛油炒香海膽,再加入自家製鮑魚汁提鮮,連埋達刺身級別嘅帶子一齊輕燒,又鮮又甜。

 鐵板A5和牛肉眼

肉食方面,推介牛魔王可選鐵板A5和牛肉眼,薄燒再捲埋海膽、紫蘇葉同蜜糖爆珠,肉香中滲出甘甜味,而且入口仲有好香濃嘅松露味呢。蜜糖爆珠咬開即爆汁,有助解膩。如果唔食牛嘅朋友仔,則可選十勝黑豚肉。

 時令特色炒飯

 海膽清酒雪糕

幸運嘅話仲可以遇上自家製海膽清酒雪糕作為甜品,會食到粒粒海膽呀!

睇到最尾嘅朋友仔,有彩蛋送畀你哋。餐廳為慶祝新開業,由即日起至6月15日,凡係身份證內有「樂」字嘅食客,惠顧即可以優惠價$68食到原價$298嘅北海道海膽流沙大蝦山藥薄脆。



樂Teppanyaki  
地址:佐敦偉晴街29-37號騏邦大廈地下6號舖

文:Kar
相、片:Tom Li

關鍵字
佐敦
日本菜
鐵板燒
魔術
海膽
海鮮
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
【2021生日優惠】持續更新!6月壽星送海鮮拼盤
2021-06-01
《優秀開飯熱店大賞2021》賽果公佈
2021-05-24
5月份好評餐廳十強
2021-06-04
一秒變出 招牌十八層海膽杯 佐敦小店全新體驗 魔術X鐵板燒
2021-06-11