【West口west臉eat好west】有乜好餃?細數香港好食餃子店(上)
2017-09-29

1. 亨通餃子店

要數餃子界名店,好多大家都認識。紅嘅係咪代表一定係真材實料/浪得虛名?又唔可以咁講,所以本爺會為大家摸清各家餃子巨頭嘅虛實!只不過,坊間實在有太多餃子店被overlooked,又有太多不為人知。油麻地亨通餃子店,傳統哈爾濱風味,餃子即叫即包,你聽過未?

雖然係細舖,逼狹,簡陋,地段市井,但係整潔。呢種小店風情,暗暗地喺我心入面加咗分。餃子方面,茴香豬肉+芹菜豬肉餃雙併比我想像中有料到,仲有汁𠻹,仲要都幾多汁𠻹,有幾隻餃咬落似食生煎包一樣射出汁液。以juiciness嚟講佔先於同類對手,高汁!兩款餡料同樣出色,尤其係茴香嘅鮮香味。餃身係大隻所以八隻都夠飽,餃子皮較同類店稍為粗之大葉但無影響口感。

最衰食完餃之後,我發現佢地既醬骨架同炸醬麵都係招牌,搞到我心郁郁想試埋。有鑒於餃子表現優秀,我決定當晚再訪,unlock phase2一試醬骨架。

<醬骨架>

用上花椒八角等調味,肉不肥膩亦醃得入味,煮得夠腍一夾即起,味道簡單,熱啲仲好食。不過夠分,可以unlock phase3。

<炸醬麵>

麵條unexpectedly al dente。炸醬看似低調但其實味道霸道咸香攻佔味蕾。可能你會覺得成件事偏咸,但係味唔重我反而會質疑唔夠地道。反正唔係油膩嘢無負擔就okay。總括來講呢度嘅出品,除餃子特別出色,仲有種唔花巧嘅隨性喺度,風味呢家嘢,你懂的。

🉐RamenGorRating -- 🍜🍜🍜🍜MUST try (dumplings)
 

2. 巧興麵食店

上一趟亨通餃子店俾到我好大驚喜,我決定一不離二,繼續講hidden gem。今次呢間巧興,真係好唔起眼,仲要對好多人嚟好偏僻,但其實係我嘅私人珍藏。我相信除咗土瓜灣友之外,都冇幾多餃子粉會識。我識,除咗係因為我見識廣博之外,亦因為我嘅中學年代就係喺土瓜灣渡過,所以佢哋嘅煎韭菜餃,我食咗好多年,唔油膩,煎得脆,韭菜同肉嘅比例最得我心,so far 未覺得坊間有比佢更出色。另外牛肉餃同三鮮餃都有中上水準!

🉐RamenGorRating -- 🍜🍜🍜SHOULD try 
 

3. 美味餃子店

識食餃子嘅,應該已摸熟曬太子荔枝角道一帶嘅呢個餃子重鎮。今次餃子篇上集,同大家介紹其中一間龍頭大佬:美味餃子館。

美味其實係幾美味。由於我唔太喜歡椰菜雲耳呢個combination,所以一條友,我會食白菜餃。兩條友,我會嗌埋煎韭菜餃。雖然我通常都只會嗌七隻,但呢度嘅餃子論size來講,絕對大贏你。餃子方面亦有中上水準,can try係走唔甩的。但今次有should try,全賴兩大功臣。一,有可能係餃子湯黎講最好飲嘅野,葛菜煲生魚豬骨湯,朋友話以前個濃郁但我覺得已經幾唔錯。二,嚟美味食佢地嘅辣菜莆已經是常識!

🉐RamenGorRating -- 🍜🍜🍜SHOULD try 
 

4. 山東餃子館

餃子店嘅大明星:山東,如果你自稱係餃子粉,但又未食過山東,well,就似常餐控但未食過澳牛同華星一樣,大家都係乖乖地偷偷地快啲去潮咗聖先好講啦。

本爺試嘅係長沙灣分店,如果你試其他分店而係唔掂就唔關我事啦。山東餃子嘅絶殺,就係無絶殺,但都好食。換言之,基本功做得好。首先,佢地嘅餃子皮,係四間入面最靚,精緻,好𡁻。其次,佢地嘅菜同肉比例,亦係四間入面最恰當,令人食得最舒服嘅。加上,羊肉餃真係好羶香,湯汁又多又好味,係咸咗啲。白菜馬蹄鮮肉餃幾趣緻。茴香餃無茴香味。蕃薯苗餃正常。煎餃偏油左少少。

🉐RamenGorRating -- 🍜🍜🍜SHOULD try


※上述內容純屬作者個人意見,不代表本網立場。※



 
關鍵字
West口west臉eat好west
拉麵哥
專欄
餃子
油麻地
土瓜灣
太子
長沙灣
拉麵哥SoulJase
笑臉迎人大把,西面型人買少見少。所以不論唱歌食飯寫作訪問,塊面都又chok又西。一齊west口west臉eat好west。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06