牛油果有益又多功效，個個都知要食多啲，不過就唔係個個都識點樣揀到個靚靚仔仔嘅牛油果，唔係太生就生熟，切開唔係硬邦邦就係一點點黑斑咁 😭 今次專誠搵到九龍城一果檔嘅負責人陳先生畀啲貼士大家，教大家點揀之餘，仲話埋你聽邊隻牛油果最好食！

 九龍城果檔嘅負責人陳先生

Q：牛油果有咩品種？

而家巿面見到嘅牛油果品種嚟講，主要有2種。一種係Hass，另一種係Stapard。Hass牛油果表面比較凹凸，果身長長地，肉身軟滑、牛油味好重；而大部分紐西蘭產嘅通常都係Stapard，呢種牛油果果身再窈長少少，同埋比較青色啲，相對上硬身少少，同埋淡口少少。

  (左)肯亞產較細個同圓身 ｜ (右) 澳洲產較大個同長身

Q：邊個國家嘅牛油果最大個？

澳洲牛油果都幾大個，大約有4吋；夏威夷嘅就再大個啲，可以去到6、7吋高，闊度比澳洲嘅闊一倍，不過呢啲牛油果嚟香港嘅數量比較少啲，一箱得6、7個，分分鐘賣到差唔多成$100一個。

 (左)肯亞 ｜ (右) 澳洲

Q：邊個國家嘅牛油果最濃味、最好食？

近幾年，澳洲牛油果好受歡迎，味道比較濃郁啲，又有牛油香。但講到最濃，就一定係夏威夷牛油果嘞，比澳洲嘅再濃一倍啊！

至於肯亞牛油果，價錢平成倍，但係就細個啲，味道亦相對會淡啲，冇咁香。而產量最多嘅地係墨西哥同中美洲，價錢比較大眾化啲，味道都唔錯，不過由於大部分都係船運過嚟，唔似得澳洲嗰啲係空運，變咗可以存放嘅日期就較短，最好2、3日內就食咗佢。

Q：點樣揀牛油果？

咁就睇你想買一個即食嘅，定係放多幾日先食嘅牛油果。如果想買即食嘅話，就要搵啲熟身啲嘅，睇佢表皮嘅顏色，揀啲深綠色啲，撳落去有少少腍嘅；如果想放幾日嘅，建議可以揀啲青綠色少少嘅，摸落去比較硬身啲嘅就比較好。

 (左)較深色，即係熟身啲

Q：買咗返屋企之後，點存放最好？使唔使放雪櫃？

最好就擺室溫啦，當佢變到有少少腍嗰陣，就可以進食。唔太建議放雪櫃。
畀多個貼士大家，如果想催熟個牛油果，可以擺啲蘋果拼喺隔籬，又或者擺喺啲暖啲嘅地方，都會快熟啲架。

 放個蘋果喺隔籬有催熟作用

鳴謝：九龍城永富大閘蟹及日本鮮果專門店

文：Kar
相、片：Wilfred Chui

【OHealth!】 牛油果篇

牛油果5大功效！有助減磅及抗老化 (傳送門按此)
口袋名單  5大牛油果餐廳推介 (傳送門按此)
歪歪實試！尖沙咀牛油果主題cafe  釀春雞/汁煮意粉  (傳送門按此)
輕鬆食譜跟住整 牛油果兔兔油揚Taco (奶素) (傳送門按此)
坊間流傳4種牛油果食法 即場實試邊款最好食 加納豆竟然唔係最伏？(傳送門按此)