【2021生日優惠】持續更新!9月壽星嘆Omakase送壽司蛋糕+清酒
2021-08-31

開飯仔每個月都會搜羅全港生日優惠,今次就整合咗9月生日優惠。有啲優惠仲會橫跨幾個月份,細心睇可能有驚喜㗎,等你過一個食得滿足又難忘嘅生日。

鮨吟 當月生日送壽司蛋糕+清酒
生日優惠日期:即日至9月30日

生日想食好啲,又食豪啲,Omakase係唔錯嘅選擇。鮨吟由日本海産市場直送食材到港,製作各式上等日本料理。而家9月生日嘅朋友惠顧廚師發辦,即送清酒300ml及壽司蛋糕。

圖:ayurain0139

Shining 當月生日送冰鎮鮑魚+西式酒
生日優惠日期:即日至9月30日

Shining係主打潮州菜嘅特色酒吧,由5星級酒店前行政總廚坐鎮,炮製古法滷水及其他潮州菜式;好似烹調招牌艾雷鵝肝就加咗威士忌,而招牌白鹵水海鮮拼盤集合大墨魚、大蟶子及新鮮鮑魚等海產。而家9月生日嘅朋友惠顧晚市,會贈送1客冰鎮鮑魚及紅、白酒或香檳1杯。

鳥居居酒屋 當月生日送清酒1瓶
生日優惠日期:2021年9月1日 至 2021年9月30日

鳥居居酒屋主打以日本鹿兒島赤雞製作嘅串燒,啱晒鍾意食特色串燒嘅壽星。而家當月生日嘅朋友預訂4位或以上晚市時段,並出示身分證確認本月生日,就送你300ml清酒1瓶。

圖:XbabychanxVirgo.W

Mokumoku Yakiton 指定分店各有不同優惠
生日優惠日期:2021年9月1日 至 2021年9月30日

呢間由日籍料理達人Kei San監修嘅日式豚肉串燒専門店,引入日本岩手縣嘅白金豚,油花分布勻稱;而豬內臟就用本地限量即日貨,連坊間少見嘅豬腰、豬心同豬肝串燒都有機會食到。而家當月生日嘅朋友預訂4位或以上晚市時段,並出示身分證確認本月生日,就可以享用以下生日優惠:

尖沙咀店
1. 全單九折  
2. 720ml嘅清酒買一送一  
3. 送一個雪葩或免切餅費

銅鑼灣店
1. 送指定清酒1壺

Mo Mo Kushiage 當月生日全單8折
生日優惠日期:2021年9月1日 至 2021年9月30日

日式串揚有唔同口味,Mo Mo Kushiage串揚專門店就走關西風。佢哋8成材料由日本新鮮直送,即點即炸,配自家調製嘅醬汁。而家當月生日嘅朋友預訂4位或以上晚市時段,並出示身分證確認本月生日,即時全單8折、飲品半價同免切餅費。

泰.夯蝦 「正宗曼谷流水蝦」4人同行壽星半價
生日優惠日期:直至餐廳另行通知,欲了解詳情可聯絡餐廳。

泰.夯蝦標榜正宗泰國流水蝦放題,設有特長蝦缸畀你即夾即燒,另外仲有多款海鮮選擇。凡4位成人其中1位係8月生日,壽星就有半價優惠,但不可與小童優惠共用。

圖:ki918

Fun Fun 串串鍋 麻辣串串鍋4人同行壽星免費
生日優惠日期:直至餐廳另行通知,欲了解詳情可聯絡餐廳。

Fun Fun 串串鍋由四川聘請師傅坐鎮,主理麻辣串串鍋任飲任食放題,而家夏天仲可以任食雪糕;如果加錢亦可以升級轉鴛鴦湯底,有招牌重慶麻辣湯鍋、藥膳胡椒魚肚湯等6款選擇。不過串串款式只有15款,選擇唔算多,但過下口癮都可以接受。壽星喺生日前後7日嚟享用晚市時段,只要4人同就1人免費,麻辣控咪錯過喇。

圖:food6850Tears_Tearswujoegame

豊勝手丼 當月生日全單9折
生日優惠日期:即日至9月30日

刺身控嚟到豊勝手丼可以試到多款海鮮丼,好似三國雲丹就有齊紫海膽、加拿大海膽同日本海膽;另外亦有各式壽司、定食同Omakase可以揀。而家當月生日嚟用餐時,出示身分證確認本月生日,全單有9折優惠。

圖:餐廳Facebook

Hungry Monkey 當月生日全單9折
生日優惠日期:即日至9月30日

西日裝潢嘅Hungry Monkey主打日式鐵板燒,有各式大阪燒、海鮮、小食同果味雞尾酒,坐吧檯的話仲可以近距離睇廚師炮製菜式。而家當月生日嚟用餐時,出示身分證確認本月生日,全單有9折優惠。

圖:沛楹

燒肉臻 當月生日贈送清酒
生日優惠日期:即日至9月30日

主打日式燒肉嘅燒肉臻除咗有專人燒肉服務,店內更設有熟成櫃自家低溫熟成牛肉,同埋特別引入嘅自助清酒售賣機。而今個月生日嘅朋友有口福喇,只要晚市嚟用餐時出示身分證確認本月生日,就會贈送指定清酒1瓶(300ml)同你賀一賀。

圖:Taste.n.tell海巷心處

八歌仙 壽星半價嘆和牛燒肉套餐
生日優惠日期:直至餐廳另行通知,欲了解詳情可聯絡餐廳。

呢間日本鐵板燒店主打鐵板燒放題,選擇多樣,肉質上盛,食客能額外追加無限暢飲。而家當月生日嘅朋友嚟惠顧Blackmore M9+澳洲和牛(HKD498)或A5熊本和王和牛(HKD688)燒肉套餐,都可以享有半價優惠。入座時需向職員出示身份證明文件證明。每枱只限一位使用呢個優惠,亦唔可以同其他優惠同時使用。而星期五、六及公眾假期不設此優惠,所有加一服務費會以原價計算。

圖:餐廳Facebook

一幻拉麵 中環店限定正日免費任食拉麵
生日優惠日期:2021年7月1日至31日 (已過期)

以香濃甜蝦湯底做主打嘅過江龍拉麵店一幻拉麵,今個月生日嘅朋友,喺正日生日去中環店都可以免費任食各款拉麵,仲唔限數量,不過會收加一服務費。而本月壽星喺非正日去都有半價優惠,同行朋友就有八折。

寬巷子 打邊爐送粉盒花園
生日優惠日期:直至餐廳另行通知,欲了解詳情可聯絡餐廳。

以藝術手工火鍋見稱嘅寬巷子主打麻辣鴛鴦火鍋,嚟到必點招牌玫瑰松板豬、冬甩子、枝仔冰、墨條牛軋等由外形到餡料都用心雕琢嘅火鍋配料。而當月生日嘅朋友提早至少兩日預訂4位或以上晚市時段,並喺訂位時講明慶祝生日,就會送原價價值HKD328嘅粉盒花園畀壽星,入面結合咗餐廳招牌蔬菜花藝拼盤同麻辣湯底醬料萬用醬。

La Famille 免費嘆戚風小蛋糕
生日優惠日期:2021年8月16日至19日(已過期)

La Famille嘅戚風蛋糕深受女士歡迎,而每個月都會挑選一日壽星送蛋糕俾佢哋。今個月嘅幸運兒係8月19日生日嘅你!只要喺8月16日至19日去La Famille任何一間分店,向店員出示有效嘅身份證明文件核對出生日期,做齊指定動作,就會免費送一件10cm戚風小蛋糕,不限口味,送完即止,詳情可以向各分店查詢。

校長燒肉日韓料理 餐廳專頁留言即送海鮮拼盤
生日優惠日期:直至餐廳另行通知,欲了解詳情可聯絡餐廳。

設刺身、燒烤、火鍋、熟食、甜品和酒類等9個區域任食,連啤酒、清酒都任飲。只要於餐廳Facebook 專頁留言「生日快樂」 並惠顧晚市B至D時段,入座滿2位即送極上海鮮拼盤(一客);入座滿4位或以上,加送拉絲芝士骨(一客)。另外,當日生日者入座滿6位,惠顧晚市7:15黃金時段即可升級無限時任飲任食,及免費追加生日佈置 (此優惠可與生日全單88折同時使用)。

圖:cargo001

優惠詳情:餐廳Facebook 專頁留言「生日快樂」 並惠顧晚市B至D時段,入座滿2位即送極上海鮮拼盤(一客);入座滿4位或以上,加送拉絲芝士骨(一客)。當日生日者入座滿6位,惠顧晚市7:15黃金時段即可升級無限時任飲任食,及免費追加生日佈置。
(優惠需提早不少於一天前預訂。此優惠只限元朗店/荃灣店分店)

真秘鍋 生日月獲贈玫瑰松阪豬一客
生日優惠日期:2021年5月28日 至 2021年6月27日(已過期)

真秘鍋有多款真材實料湯底,開動前一定要飲碗湯暖胃先。6月仲有夏日限定湯底—素翅貴妃冬瓜盅,清甜消暑;招牌湯底就有每日限量嘅九五之尊,係用即撈游水龍蝦、海蝦熬煮。壽星免費獲贈嘅玫瑰松阪豬係招牌配料之一,係豬頸肉連接下巴位,特別鬆化爽口。

圖:kitty1215carmanxchan

優惠詳情:生日月獲贈玫瑰松阪豬一客。

Chalet 送指定甜品及寫祝福語 
生日優惠日期:2021年6月1日 至 2021年6月30日(已過期)

去到門口已見到有格調嘅瑞士小木屋設計,好啱情侶食餐溫馨生日飯。呢度主打高級西式料理,烤加拿大豬鞍配焦糖肉桂蘋果、法式海龍王配麵包、西班牙烤乳豬都好推薦。6月生日壽星獲送指定甜品一客,提早向店家講低寫祝福語仲可以畀個驚喜壽星~

圖:Foodie.therapyyyDaDa.C

優惠詳情:6月生日壽星享用午餐或晚餐,獲送指定甜品一客及寫祝福語。

Tiffany Blue Box Cafe 送Blue Box Cake+Tiffany & Co. 旗艦店導賞
生日優惠日期:直至餐廳另行通知,欲了解詳情可聯絡餐廳。

夢幻藍色玻璃設計嘅Cafe,透光柔和,女生一定鍾意!套餐有前菜、湯同主菜,前菜可揀龍蝦沙律、香煎北海道帶子等;主菜則有黑松露醬烤雞三文治、鹹蛋黃卡邦尼意粉或龍蝦扁意粉等選擇。生日壽星可享一份迷你Blue Box Cake,並免費於全港最大Tiffany & Co. 旗艦店導覽體驗,由專人帶領欣賞店內藝術品及高級珠寶。

圖:yingyo甘甘子

優惠詳情:生日月份內訂座,即可享一份迷你Blue Box Cake 及於Tiffany & Co. 旗艦店導覽體驗。

龍鼓灘海邊BBQ 壽星免入場費+氣球佈置
生日優惠日期:直至餐廳另行通知,欲了解詳情可聯絡餐廳。

自助燒烤提供40幾款美食任燒,有麻辣雞翼、原味牛扒、香茅豬頸肉、蜜汁叉燒等,可以同朋友家人食足一晚。除咗出名靚海景,同場亦有各種玩樂設施,黃昏時段可以睇日落,夜晚亮燈後仲好有氣氛𠻹!

圖:christyc8JessicaLiao

優惠詳情:生日客人出示生日證明,於生日當天或7天前可享以下優惠,包括生日客人免燒烤入場費、提供1套氣球裝飾佈置、贈送生日卡1張、即影即有拍攝1次、生日歌曲點播等。優惠不可轉讓,最新詳情可致電店家查詢。

forte Vivva會員獲生日餐點及氣泡酒或紅酒
生日優惠日期:Vivva會員優惠由2019年7月15日起生效,詳情可向有關餐廳查詢。

餐廳有半開放廳房,環境開揚氣氛輕鬆,係觀塘區高質半自助餐,晚餐自助頭盤有鮑魚、蟹腳、凍蝦、刺身同沙律等,主菜則有威靈頓牛柳、德國豬手等,甜品有各款蛋糕、水果、Movenpick 雪糕等。只要成為如心酒店集團Vivva會員,可於生日月份喺forte 同集團旗下其他餐廳都享優惠。

圖:Lawrence Lau技巧樹熊

優惠詳情:生日月份期間惠顧forte 同如心酒店集團旗下餐廳之早午餐、午餐或晚餐時段,可獲贈生日餐點 (例如:精選甜品) 及氣泡酒/紅酒。

Dodam Chicken 壽星九折生日優惠 
生日優惠日期:2021年3月1日 至 2021年12月31日

韓國人氣店Dodam Chicken 登陸香港幾年,有韓式炸雞、馳名薄餅烤箱脆焗雞等選擇,一直大受韓迷歡迎。店家參考北歐國家特別做法,以27種天然草藥醃製炸雞,食落雞肉嫩滑又帶微微天然草本味道。又特以超過攝氏400度烤爐焗製,迅速逼出雞肉脂肪更健康,食多幾件都唔膩呀。生日優惠暫時去到2021年年尾,韓迷生日不妨考慮吓!

圖:yukiyu105Kwokclaw3

優惠詳情:出示OpenRice 優惠券,壽星享9折生日優惠。

CHEF STAGE de Eddy Chu 生日或周年紀念送寫名甜品一客 
生日優惠日期:2021年7月1日 至 2021年7月31日(已過期)

尖沙咀港鐵站一出行2分鐘就到,係間位於19樓嘅靚景西餐廳,由30年入廚經驗嘅老闆兼主廚主理,擅於將傳統法國料理融入新元素。喺度可以一邊飲紅白酒、一邊鋸扒,由餐湯到甜品都相當精緻,好有氣氛。唔少人鍾意呢度嘅「海鮮拼盤」,份量款式豐富,想食餐浪漫生日飯就啱喇。

圖:enricafafa信我揀呢間

優惠詳情:生日客人獲送寫名甜品一客。

魚鮮生 送西班牙LOLEA有汽紅/白酒
生日優惠日期:2021年5月1日 至 2021年5月31日(已過期)

銅鑼灣登龍街低調小店,不計成本每日由日本直送魚材,堅持唔會畀客人食隔夜貨,魚材真係同日本食嘅一樣鮮甜!特別係北海道海膽,比坊間常用嘅加拿大海膽更Creamy 同重海水味。同場仲有拖羅、喜之次、牡丹蝦等壽司刺身。5月壽星只要提早一日訂位四人訂枱,即送西班牙LOLEA有汽紅酒或白酒。

圖:karitangkk_genki

優惠詳情:5月壽星提早一日訂位四人訂枱,即送西班牙LOLEA有汽紅酒或白酒。

黑木亭 送祝福語甜品
生日優惠日期:2021年5月5日 至 2021年7月31日(已過期)

天后居酒屋主打串燒,同場仲有多款和牛、海鮮主菜,食串燒都可以當晚餐食得好飽!人氣串燒有明太子雞肉、白鱔、黑毛和牛串、厚燒牛舌等。和牛系列有超厚切和牛三文治,特別鋪上海膽、黑魚籽醬;和牛他他則燒至一成熟,軟綿綿又食到和牛原始味。

圖:瑪莉奧娜

優惠詳情:出示OpenRice 優惠券,即享蛋糕一客及免費寫上生日字句。

Plato Cafe & Bistro 送蛋糕一客及免費寫生日字句
生日優惠日期:2021年8月1日 至 2021年8月31日(已過期)

油麻地樓上Cafe 環境好坐,以醒目美國海報畫風做主題,情侶或一班朋友嚟食都好啱。菜式奉行美國風夠大碟,鋸扒、德國豬手、Burger同意粉都有,成班朋友一齊Share食慶生最啱。推介德國脆皮鹹豬手、黑松露牛面頰肉意大利飯同龍蝦汁大蝦意大利飯。

圖:hkerchillcheeseigfoodtaste

優惠詳情:出示OpenRice 優惠券,即享蛋糕一客及免費寫上生日字句。

德家日式燒肉店 壽星任飲任食日式燒肉/火鍋2小時半
生日優惠日期:2021年4月1日 至 2021年4月30日(已過期)

店內有沙律、甜品、雪糕自助吧;飲品區則有啤酒機、汽水、冷泡茶等。有「海鮮刺身盛燒肉半放題」、「刺身盛升級肉類火鍋半放題」等多款套餐選擇,可以食到刺身、海鮮、牛舌、牛肋肉,豬頸肉等,4人同行食燒肉/火鍋放題,1位壽星享免費任飲任食㗎!

圖:步菲foodiemapping

優惠詳情:4人同行惠顧燒肉/火鍋放題,1位壽星享免費任飲任食。

渝味曉宇 白羊座可獲半份紐西蘭精品羊肉卷
生日優惠日期:2021年3月21至4月20日(已過期)

主打重慶火鍋,有重慶出名嘅九宮格麻辣大紅鍋,同場亦有鴛鴦鍋供選擇。麻辣湯底又香又麻,同安格斯肥牛、羊肉卷肉味香濃,同麻辣湯底特別夾。海鮮有桂花蚌、鮑魚等,新鮮爽口;蔬菜則有栗米、蓮藕、手工萵筍等。白羊座朋友於白羊月內(3月21至4月20日)喺堅尼地城分店消費,即可享半份紐西蘭精品羊肉卷。

圖:ccrreamiyanyanyan5252

優惠詳情:白羊仔女於2021年3月21至4月20期間,於堅尼地城分店消費,即可享半份紐西蘭精品羊肉卷。

Pom's Kitchen & Deli 生日送自選甜品 
生日優惠日期:2021年2月26日 至 2021年3月26日(已過期)

呢間佐敦小店係由英國回流夫婦主理,佈置充滿英倫格調。主打新派西餐,將傳統同新式食材融合,以「番茄芝士焗牛尾千層麵」為例,就係以燴牛尾拆肉代替平常嘅免治牛肉,更有咬勁。同場仲有「炭燒美國穀飼連骨肉眼扒」、「龍蝦忌廉汁蟹肉龍蝦意大利飯」、「海鮮拼盤」同「原隻炭燒波士頓龍蝦配松露薯條」等。

優惠詳情:出示OpenRice 優惠券,生日客人獲送自選甜品。

響 - Hibiki 日本燒肉 4人同行.1位壽星免費
生日優惠日期:即日起 至 2021年3月31日(已過期)

主打日本放題燒肉,一次過食到刺身、和牛燒肉放題。只要生日4人同行,即享1位壽星免費!呢度有任食日本空運新鮮活魚刺身+和牛燒肉放題,刺身包括櫻鯛、金線鯛、深海池魚、池魚、金目鯛、黑鯛等多達40款。甜品仲有Movenpick、Haagen Dazs 雪糕任食,夠晒滿足。

圖:eatneverlateKathyPun

優惠詳情:4人同行,1位生日客人免費。

生日飯局
好友生日飯局的環境、食物質素、驚喜等因素都很重要,開飯仔集合各類最適合慶生的餐廳,方便飯局搞手。
餐廳資料
更多
收起
本月熱門
【2021生日優惠】持續更新!9月壽星嘆Omakase送壽司蛋糕+清酒
2021-08-31
【特約分享】Happy Hour飲番杯Schweppes®期間限定特飲!9間必去銅鑼灣餐廳(上)
2021-08-24
【特約分享】Happy Hour飲番杯Schweppes®期間限定特飲!9間必去銅鑼灣餐廳(下)
2021-08-31
自家製作!五間手工意大利麵專門店合集
2021-08-24
Chill住嘆Tea!9月份下午茶推介
2021-09-06