【2021中秋】姜濤月餅、榴槤千層月餅 十大早鳥優惠及預購月餅精選
2021-07-19

雖然離中秋仲有成兩個月,但成日話早買早享受嘛,早啲買仲有早鳥優惠添!今年一樣有唔少有gimmick嘅月餅推出,好似雪糕專門店推出嘅姜濤月餅、聯乘台灣品牌嘅貓山王榴槤法式千層月餅,同人氣千層蛋糕店嘅摩天輪造型月餅等,款款都咁吸睛點揀好?一齊睇下開飯仔精選嘅2021年十大早鳥優惠及預購月餅慢慢諗~


Häagen-Dazs 姜濤特別版雪糕月餅 

姜糖們注意! Häagen-Dazs今年搵嚟人氣王Mirror成員姜濤合作,首度推出姜濤特別版雪糕月餅,各位fans準備好搶購,等姜B陪住你過中秋未?月餅有兩款,分別以月亮同星星做主題,盒面更寫上姜濤名曲歌詞「So I say I love you!」打開個盒後仲驚喜,有四個鐵盒仔,每個都印上姜濤食月餅嘅cute cute樣,食完仲可以用嚟珍藏!嗚好驚買唔到~

早鳥優惠期:7月22-25日

早鳥價:凡購買姜濤特別版.星願或姜濤特別版.月滿雪糕月餅一盒(HK$548),即可以HK$225加購「星 ⋆ 復古 」或「星 ⋆ 明月」禮盒(二選一),或者以HK$299加購「星 ⋆ 華麗」禮盒。

餐飲券:星‧華麗雪糕月餅 (6件裝) 【第一輪早鳥優惠】Häagen-Dazs™ 雪糕月餅券1張


華爾登餅店 蛋黃白蓮蓉月餅套裝(姜糖限量版)

姜濤熱潮不停!呢間平時畀人感覺較麻甩嘅餅店,今次聯乘本地精品咖啡室「朝花夕拾」推出蛋黃白蓮蓉月餅套裝,分別有三個版本~姜糖唔使諗,一定買呢款真.姜糖版禮盒,外層有「我係姜糖」嘅宣言,四個月餅分別係印上「我係姜糖」、「我們不碎」、「有你有我」、「知我咩料」字句,再配搭真.薑糖兩包、堅果味咖啡吊同天香茉莉茶一包。唉肯肯定又係要搶購!

早鳥優惠期:即日起預售

早鳥價:$318


Lady M 星夜摩天輪中秋禮盒 

人氣千層蛋糕專門店,每年中秋月餅禮盒都充滿心思。今年中秋禮盒命名為「Celebration of Lights 星夜摩天輪中秋禮盒」,聽到個名已經覺得夠晒氣勢,包裝由美國總公司設計,立體摩天輪上嘅燈光猶如夜空中嘅星火,有埋摩登嘅煙花圖案襯托,只需輕輕一轉個盒就會旋轉,勁有氣氛!禮盒內有迷你奶黃月餅同迷你朱古力月餅各三個,前者甜而不膩,後者朱古力味好香濃。

早鳥優惠期:即日至31日,以禮券形式發售

換領日期:8月23日至9月24日,各Lady M香港分店,香港國際機場店除外。9月20日至24日期間只限於銅鑼灣時代廣場店及尖沙咀海港城店換領

早鳥價:$488


鴻福堂 X 微熱山丘 貓山王榴槤法式千層月餅  

首度聯乘深受港人歡迎嘅台灣人氣品牌微熱山丘,最吸引一定係「FORBIDDEN」嘅貓山王榴槤月餅系列,「FORBIDDEN」係微熱山丘於馬來西亞開設嘅新品牌,主打用馬來西亞彭亨州嘅貓山王榴槤製成嘅甜品,今次仲喺香港推出全球首創嘅貓山王榴槤法式千層月餅,由法籍糕餅廚師 Gaël Majchrzak研發,將法式甜品千層蛋糕同月餅結合,口感層次細膩 、味道濃郁,榴槤控必試!另一新品貓山王榴槤冰皮月餅同招牌鳳梨奶黃月餅都好值得食~

早鳥優惠期:即日至9月19日 

早鳥價:貓山王榴槤法式千層月餅$399、貓山王榴槤冰皮月餅$599、鳳梨奶黃月餅$249

餐飲券:榴槤法式千層月餅禮券 (只限銅鑼灣自取/順豐到付)


唐人館 西洋中國風月餅禮盒

鍾意復古風嘅,今年呢間中菜館推出糅合咗首飾盒同中式如意結造型窗欞、好有西洋中國風氣息嘅月餅禮盒。傳統經典雙黃白蓮蓉月餅選用頂級蓮子製成細滑嘅白蓮蓉,配上原個鹹蛋黃,入口清甜不膩,禮盒就以琥珀黃配紫藤色,印上花鳥圖案,古典氣息濃厚;迷你匠心奶黃月餅選用新鮮鹹蛋黃及天然牛油,奶黃餡香濃順滑,鹹鹹甜甜,包裝就青春啲以珊瑚粉紅同湖水藍作主調,自用送禮兩相宜。

早鳥優惠期:即日起至8月20日

早鳥價:$278


兄弟台灣生活百貨 芋見流心月餅 

呢間網購平台今年推出芋見流心月餅,採用台灣在地大甲芋頭製成口感綿密嘅芋頭內餡,芋頭香好突出。餅皮選用高級麵粉再用傳統手藝手桿而成,一層一層好鬆化。少油少糖,蛋奶素食者都啱食,而且凍食熱食都一樣咁好味。

餐飲券:芋見流心月餅望月禮盒91折($215)


逸東軒 復古木製手提箱禮盒

繼上年推出大受歡迎嘅竹製蒸籠月餅禮盒,今個佳節再次以環保作概念,將月餅禮盒打造成可循環再用嘅復古手提箱,並以時尚嘅橄欖綠色作點綴,過節後可將佢變成化妝箱或迷你手提行李箱用都得!迷你「奶皇迎月」禮盒一盒六個,皮薄鬆軟,香甜幼滑。「金黃明月」禮盒即係雙黃白蓮蓉月餅,一盒四個,入口香甜油潤,配茶食最啱!

早鳥優惠:即日起所至7月31日期間訂購可享正價六五折優惠,迷你「奶皇迎月」禮盒港幣$258;「金黃明月」禮盒港幣$298,於8月 1 日至31 日期間訂購,可享正價八折優惠,迷你「奶皇迎月」禮盒港幣$318;「金黃明月」禮盒港幣$366


鱷魚世家 帝一榴貓山王冰皮月餅 

今年中秋榴槤控真係有福!呢間食品分銷公司今年有賣馬來西亞品牌帝一榴嘅月餅,每日新鮮空運到港,一入口啖啖都係榴槤果肉,香氣極濃,真材實料!

餐飲券:帝一榴貓山王冰皮月餅 8 件75折($328) / 帝一榴貓山王冰皮月餅8件 x 4盒69折($1198)


鋒膳 北海道牛乳奶黃月餅

奶黃月餅愈出愈多,無返啲特別又點突出重圍呢!呢間餐廳嘅奶黃月餅內餡選用九州雞蛋同北海道嘅牛乳製成,北海道牛乳特別濃郁厚身,配埋九州雞蛋製成嘅金沙奶黃餡就好rich同軟滑,食落真係唔同啲~

預訂價:$330


Kylix Kitchen 中秋節卡通造型奶黃月餅DIY套裝 

月餅唔一定要買嚟食,自己屋企整都一樣得!呢間專賣烘焙食材嘅烘焙店就推出中秋節卡通造型奶黃月餅DIY套裝,卡通人物選擇分別有龍貓、小丸子、鬆弛熊同Snoopy,仲好貼心咁供應「須焗版」同「不須焗」版本,有晒影片教學,今個中秋節同屋企人留喺屋企,自己月餅自己整都唔錯!

餐飲券:中秋節卡通造型奶黃月餅 DIY 套裝91折($250.5)





文: Yanica
編:Kar



關鍵字
中秋節
月餅
2021
優惠
奶黃
雪糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06