【2020回顧】咖啡地圖!新開Cafe一覽 精品咖啡/寵物友善/異國風
2020-12-22

如果話2018係黑糖珍珠大熱、2019係石燒牛排潮流,2020嘅關鍵字就絕對係咖啡!每個禮拜都總聽到有新店開張。無論係新興Battlefield深水埗,一早有唔少小店進駐嘅中上環,甚至係以往較少精品咖啡店嘅新界區都多咗選擇,各自都有唔同風格。以下係開飯仔私心推介,睇睇你今年試咗幾多間?
 


精選2020新開Cafe地圖

九龍

深水埗區  十常八九


深水埗最近被英國雜誌《Time Out》選為全球最型社區第三位,無獨有偶今年喺大南街同基隆街一帶就開咗唔同風格嘅咖啡店,有主打手沖咖啡,亦有最近流行嘅「朝啡晚酒」形式。私心推介呢間走日系風格嘅Cafe,幾位年輕老闆都去過唔少日本Cafe取經,焦糖布丁同天使之鈴都係推介。House Blend咖啡有Nutty同Fruity選擇,想揀邊款配甜品你話事。

同區仲有:(長沙灣)Contrast、(深水埗)Kokoni Coffee、(深水埗)一草一木、(深水埗)PRESS THE BUTTON coffee stand、(深水埗)Coffee of the Day、(深水埗)Nomad、(深水埗)flow、(深水埗)FREEZING IN.、(深水埗)Slash、(深水埗)Will's Coffee

 
油尖旺區  Black Coffee


一向都係約飯局熱門地區嘅油尖旺都多咗精品咖啡店,唔少都開喺巷仔、轉角或者樓上舖,有種旺中帶靜嘅Feel呀。今年唔少新開嘅都係姐妹店,好似Black Coffee就由土瓜灣HeySoNuts班底主理,走完全唔同嘅全黑型格風,甜品梳乎厘等夠吸引之餘,咖啡亦相當出色,Peach Sparkling Coffee酸甜消暑,手沖咖啡更會不時更換單品豆。

同區仲有:(何文田)Five To One、(大角咀)浮生、(大角咀)My Ahjussi、(旺角)蟲二、(旺角)走過十萬八千里找到你、(旺角)Cafe Hachiko、(油麻地)不籽是咖啡、(尖沙咀)Vego Coffee、(尖沙咀)Naturally Choice Cafe、(佐敦)Good Day Coffee Co.

 
九龍城區  鳥山。商號


今年大家都係有假但飛唔到,好彩留喺香港都搵到有唔同地方特色嘅小店。紅磡呢間鳥山。商號由旅遊Blogger們開設,咖啡師曾經旅居台灣,而家去唔到台灣,就開店將當地嘅咖啡同咖啡文化都帶過嚟香港。唔少咖啡豆都喺台灣烘焙,特別啲仲有加入古法冬瓜茶嘅冬瓜茶拿鐵。甜點就係本地每日新鮮製作,台式芋泥卷嘅芋泥香自然濃郁,甜度啱啱好。

同區仲有:(太子)Le Rêveur at Flower Market、(太子)安樂珈琲

 
港島

中西區  TIL Today Is Long


中上環不嬲都係Cafe Hopping熱點,今年就更加可以嚟個新店一日遊。有主攻外賣嘅Coffee Stand,亦有可以畀大家坐低享受Coffee Break嘅Cafe。TIL Today Is Long呢間就兩種風格都有齊,既有外賣窗口,亦有樓底挑高富空間感嘅座位。走澳式風格,選用墨爾本烘焙商Small Batch嘅咖啡豆。特別推介佢哋嘅Croffle,亦係今年興起嘅小食之一,香脆酥軟。

同區仲有:(中環)Doubleshot by Cupping Room、(中環)角落、(中環)Say Hi Bar & Dining、(中環)Blue Bottle Coffee、(中環)MONO Lab、(中環)Starting Over Espresso、(中環)Between、(中環)Hypebeans、(西環)Poise Coffee、(西環)佬啡、(上環)404 Plant、(上環)NACASA Café & Bar、(上環)Swallow Dive、(半山)骨子裡、(堅尼地城)For Single

 
灣仔區&東區  野草


近年新店唔單止喺咖啡同食物上面花心思,環境、配套,甚至係概念都非常獨特。好似呢間藏身於Food Court當中嘅Cafe就主打咖啡同自家Gelato,希望可以推廣本地農業同支持香港職人,咖啡選用本地Roaster出品,Gelato嘅木瓜就係梅窩種植。不時仲會有免費嘅咖啡渣畀大家拎返屋企,飲咖啡同時亦可以為環保出一份力!

同區仲有:(銅鑼灣)The Coffeeology、(銅鑼灣)Project C、(銅鑼灣)The ALP @ Lounge Hakuba、(大坑)Sonne CAD、(灣仔)crew、(灣仔)要有、(天后)Superhooman、(北角)Coffee Obsession

 
南區  叄瘋


通常去咖啡店食嘅輕食都以西式為主,但呢間精品咖啡店就糅合台式早餐店風格,飲咖啡配嘅係滷肉飯或者台式蛋餅!特別係南區真係好難搵到好食嘅蛋餅。而咖啡用嘅咖啡豆亦係店主們自己炒嘅,espresso based嘅會有fruity blend同nutty blend兩款選擇。冷泡咖啡就會定期更換SOE,通常都會揀特色或者風味鮮明嘅豆,每次去都會有驚喜呀。

 
新界

新界東  Buzz Grill Bar & Cafe  


今年嘅新Cafe唔少都係寵物友善,例如可以畀毛孩坐喺室外、特設狗狗P位,甚至有供應Pet Menu!大埔呢間就係好例子,有哥基店長來福坐陣,寵物餐牌仲標榜用新鮮、有機、無激素食材製作。就算無養寵物,呢度嘅輕工業風裝修同可愛嘅寵物裝飾都夠吸引。午市主打西餐,賓尼迪蛋流心效果誘人;晚市就供應串燒,平均水準都唔錯。

同區仲有:(大埔)V.W Vegan Cafe

 
新界西  The Third


新界西對唔少九龍同港島住人嚟講都真係幾遠,但依然有新店選擇嚟呢區開新店。好似元朗嘅The Third就係西環Tuckshop by Social Club嘅分店,主打創意咖啡特調同班戟。好似Ying Yang靈感嚟自港式茶餐廳嘅鴛鴦,但茶底改為Earl Grey帶出咖啡果香。班戟有六款口味,推介Bacon & Egg,鹹香當中又有少少楓糖漿嘅甜,味道豐富。

同區仲有:(元朗)8cm Coffee、(葵涌)好日咖啡店、(荃灣)Sammi #000000






文:Cathy
相、片:Calvin Kwok、Tom Li、Cathy

關鍵字
2020年
咖啡
精品咖啡
Cafe
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節愛意滿瀉 甜蜜蜜堂食/外賣下午茶推介
2021-02-01
【隨時更新】零食速報 每周新款零食、酒品點評
3天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09