【2020中秋】 酒醇茶香 甜魔必選朱古力月餅 (不斷更新)
6天前

除咗傳統嘅蛋黃蓮蓉月、流心奶黃月餅之外,近年亦都愈嚟愈多朱古力月餅出現。無論係各大朱古力品牌,或高級酒店,不約而同都推出混合酒香、茶香嘅朱古力月餅,甜魔試完實大呼過癮。

Butterfly Patisserie 迷你朱古力月餅禮盒

瑰麗酒店嘅餅房行政總廚Holger Deh,係一位朱古力大師,佢特別以自家招牌朱古力,為今年中秋製作咗一系朱古力月餅,包括芝麻、椰子蓉、茉莉花茶三種口味,甜中帶甘。而每賣出一盒月餅,酒店都會捐出一個午餐盒畀ImpactHK,幫助社會上有需要嘅人士。又可以食月餅,又可以做善事。

Godiva   軟夾心朱古力月餅

朱古力月餅都可以有好多款,佢哋今年6款新味都係以朱古力殼包住軟心朱古力,底層再搭配果仁或富中式特色嘅材料,多重口感,口味亦夠特別:桂花豆沙牛奶朱古力、覆盆子玫瑰朱古力、生薑芒果黑朱古力、百香果榛子牛奶朱古力、抹茶金桔白朱古力同椰蓉夏威夷果仁黑朱古力月餅。

Venchi 花花朱古力月餅

呢幾個花花形嘅朱古力月餅,唔止有樣,仲有內涵。三款口味包括榛子餅乾碎、抹茶可可碎,同黑櫻桃朱古力月餅,全部都係以全天然食材製作。榛子餅乾碎嗰款,外層係56%黑朱古力,包住榛子餅乾同榛子蓉朱古力;抹茶可可碎同黑櫻桃嘅外層都係75%黑朱古力,前者混合抹茶朱古力同開心果蓉,後者係黑櫻桃醬加杏仁蓉黑朱古力。

Schoggi Meier  茶味朱古力月餅

茶同酒都係生活嘅享受,呢間喺香港自設廠房嘅朱古力品牌,今個中秋分別喺朱古力月餅內加入美酒同茗茶口味。香醇醉月朱古力月餅内餡用咗4款靚酒,包括威士忌、BAILEYS等,配搭64%黑朱古力,甜中帶甘,口感軟滑;而嚐茗品月 ‧ 朱古力月餅則有茉莉花茶黑朱古力、柑橘南非紅茶黑朱古力等口味,甜中滲有陣陣茶香,中和膩感。

網上商店(按此

海景軒 威士忌朱古力月餅

海景嘉福洲際酒店嘅威士忌朱古力月餅,一向係酒迷飛佛,今年繼續以四種單一產地嘅朱古力,融合紐約自家熟成嘅蘇格蘭威士忌製作月餅,當中有嚟自加納,帶有燒烤味嘅甘苦朱古力,亦有嚟自厄瓜多爾,甜甜地又帶果味嘅70%黑朱古力等。

Lady M 奔月月餅禮盒

年年個月餅盒都靚到飛天嘅Lady M,今年嘅設計就真係飛天啦~ 首次聯乘Netflix同東方夢工廠,以即將上映嘅動畫音樂劇Over The Moon為主題。呢個奔月月餅禮盒以碧藍色作主調,印有動畫元素,仲有機關可以著燈。兩款口味嘅月餅,包括迷你奶黃同迷你朱古力,朱古力味非常濃郁呢。

月高陞 酥皮朱古力金沙奶皇   

由第一代奶皇月餅原創人葉潤發 師傅親自監製嘅月餅,當然有保證。呢款酥皮朱古力金沙奶皇月餅以人手製作,誠意十足,黑朱古力酥皮香甜濃郁、口感鬆化。建議可用微波爐叮熱-10秒或者焗爐焗10-12分鐘再攤凍一陣食,如果屋企冇焗爐嘅,用平底鑊以微微火加蓋乾烘10分鐘一樣得。

餐飲券:79折 酥皮朱古力金沙奶皇月餅1盒 (4個裝)
餐飲券:7折 酥皮朱古力金沙奶皇月餅1盒 (8個裝)

Tea WG   茗茶月餅

Tea WG每年都會推出以茶入饌嘅月餅,今年當然都唔例外。加入獅城早餐茶嘅月餅有啖啖烤瓜子香、天燈頌願茶嗰款則有甜甜嘅黑白朱古力;仲有款加入黑峰塔茶嘅就混入埋核桃同榛子香。隨禮盒仲會附送天燈頌願茶添,一啖月餅一啖茶,就唔怕膩啦。

龍島 甜蜜盛意朱古力月餅禮盒

想食朱古力月餅嘅,仲有呢個朱古力品牌。紅盒內有個奶皇同朱古力流心月餅,甜度十足。仲加多6粒唔同口味嘅朱古力,例如抹茶軟心、烏龍茶軟心、玉兔棉花糖等。


更多【2020中秋合集】:
1. 台式流心奶皇、電車限量版月餅 早鳥優惠及限量預購精選集合
2. 齊撐本土小店ssss 自家製蕃薯香芋金沙月餅、馬拉直送榴槤冰皮
3. 健康抗炎 素食/低糖月餅之選
4. 創意新潮冰皮/雪糕月餅之選



文:Kar
相:Tom Li、餐廳提供


關鍵字
中秋節
月餅
朱古力
酒店
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
2天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11