【2018回顧】編輯精選6大餐廳(有片)
2018-12-27

2018年大家試咗幾多間新餐廳?我地開飯編輯就揀咗6間心水推介畀大家,由人氣過江龍到本土懷舊風味,家庭口味到手工啤酒吧,總有一間你未試過又值得加落To-go List!
 

人氣日式鬆厚班戟 幸福班戟



今年嘅日本過江龍之中,甜魔們最期待嘅一定係呢間嚟自大阪嘅幸福班戟。主打即叫即製、約4cm厚嘅空氣感班戟,每件都香軟鬆化,唔會完全入口即融得嚟又有蛋香,係名副其實嘅幸福滋味。最新推出嘅期間限定古典魅惑班戟保持到水準又有新鮮感,難怪9月開張到而家依然每日大排長龍啦。
  

簡約Cafe風格素食自助餐 每日



純白門面加上簡約裝修,一睇差啲以為係文青Cafe,但原來係提供素食自助餐!可以任食各款頭盤、沙律、炸物、熱盤、甜品,選擇多之餘亦標明有無蛋奶或者五葷食材,夠細心。食材配搭亦落足心思,好似合桃咕嚕肉就用合桃代替豬肉,味道不變但口感更香脆,就算唔係素食者都值得一試。

港式懷舊小菜館 女人街食飯公司

旺角女人街呢間樓上小菜館,無論裝潢定食物都好有七十年代港式風味。餐廳入面嘅枱、櫈同地磚都係特登搵人訂造,希望營造到最真實嘅懷舊氣氛。食物方面就有屋村三鮮、砵仔雞蛋焗魚腸、一口臭豆腐等懷舊小食,亦都有新菜式如泰式鹽焗乞衣魚同蟹子蛋白脆米炒飯等,最啱就係同朋友嚟飲返杯!
 

更多【開飯專題】:
1. 2019港澳米芝蓮總結 蜜斗老闆:我好想承傳香港嘅食物
2. 一路睇靚景一路Chill !香港露天餐廳酒吧好介紹
3. 尋找昔日本土情懷 特色老字號餐廳推介

 
泰式家庭口味 阿叔泰麵

今年都有唔少泰式船麵店開張,元朗呢間船麵店嘅大廚未婚妻係泰國人,佢地主打泰式家庭口味。湯底用牛骨熬成,再加入牛肉、牛內臟同藥材等熬足十二個鐘,味道濃郁,麵底建議揀掛湯嘅粉絲或金邊粉。小食方面就反而追求原始泰國風味,如火辣阿嫂青木瓜沙律、泰式牛扒沙律同篤篤炸丸等都好正宗。另外店內所有裝飾全部都喺泰國買返嚟,令食客有置身泰國嘅感覺!
 

台灣精品火鍋店 寬巷子

好多人都鍾意打邊爐,而18年亦開咗唔少火鍋店,有嚟自台灣亦有嚟自重慶等地,咁多間之中,開飯仔就最鍾情呢間台灣過江龍嘞。每樣火鍋菜式嘅擺碟都精緻到好似件藝術品咁,仲要係自家手工製嘅添,好有心思。好似玫瑰松板,就將新鮮豬頸肉厚切再砌成玫瑰,加上蛋白漿令每片肉更嫩。而靈魂所在嘅麻辣鍋,就用咗新鮮花椒、豆瓣、辣椒等十幾種香料炒香加中藥材調製而成,以麻引辣。
 

手工啤酒迷新蒲點 Tipsy Tap

2018年可以話係手工啤酒盛放嘅一年,除咗多咗幾個本地品牌外,亦都多咗好多餐廳有得飲。年尾先開業嘅Tipsy Tap迅速成為一眾beer geek嘅新寵兒,無他嘅,酒款多而精,食物水準高。雞翼配腐乳芝士汁可以話係送酒良伴,鹹香中帶辣,有別坊間一般水牛城雞翼製法。至於craft beer,餐廳有十幾個tap 頭,不定期咁轉款,香港定外國最新最受歡迎嘅酒款都有得飲,仲可以先試少少,試啱心水至嗌一大杯。Last but not least,佢哋仲係香港第一間可以將生啤外賣拎走嘅餐廳呀!
 



文:Kar、Cathy、Yanica
相、片:Kar、Cathy、Yanica、Perrins、Tom


關鍵字
2018
飲食潮流
回顧
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
6天前