如果大家有印象，開飯仔曾經同大家介紹過M&M’s嘅沖劑飲品，嗰陣見到都已經覺得好新奇，但我啱啱見到樣更新奇嘅嘢呀！係 M&M’s樽裝朱古力奶呀！



有兩款味，朱古力奶同花生朱古力奶，兩支奶嘅外型都做到好似成個奶樽咁，喺便利店飲品櫃度見到真係眼都突埋，梗係諗都唔使諗，即刻買晒佢返嚟幫大家試味啦。

飲之前記得要搖勻喎。倒出嚟兩杯睇落差唔多色，但唔使驚認唔返，因為隻花生朱古力奶真係好大陣花生味，就連行過嘅同事冇睇過包裝都即刻聞得出。



咁就先試隻花生朱奶啦，究竟係咩味呢？嗯……飲得到淡淡嘅花生味嘅，冇聞落陣味咁勁，朱古力味都唔算話太甜……至於啡色嗰支朱古力奶味，飲得出係比花生嗰隻杰身啲，但朱古力味都唔算話好濃囉。

$25蚊一支，350毫升，其實都係買返包朱古力食會開心啲。不過呢個世界上勇士總有幾個，建議如果真係想試嘅話，最好嗌多幾個朋友一齊些牙飲啦，分擔風險呀嘛科科。

文：Kar



其他最新飲食潮流：
心心眼！酒店士多啤梨x白朱古力自助餐
Hello Kitty粉別瘋狂 一田首推Hello Kitty壽司
M記新推4款小食 即試朱古力批、黑松露shake shake薯條（有片）





 

隨時接收最新資訊
讚好OpenRice專頁！