燒肉就燒肉啦，不用分哪麼細？唔得，識食一定要搞清楚韓系定日式！以前只略懂皮毛，肉類海鮮等食材用橙紅色醬汁醃過的，滿口辣辣泡菜味，必定係韓式燒肉；肉類不經醃製，一塊塊表面佈滿霜降的牛肉，仲唔係日式？事實並非如此簡單，有請炑八燒肉達人Samuel為我們講解一下啦。
原來燒肉源自韓國，之後先傳入日本，食燒肉嘅歷史比日本更長久！就好似日本燒肉店一定會見到嘅單詞カルビ（Karubi），其實係韓語，字面解作肋骨，但係燒肉層面，其實代表適合用來燒肉嘅靚部位，所以日本燒肉店當中唔同等級嘅カルビ同埋特上カルビ，代表唔同部位。
以前慣性用醃肉去區分日式定韓式，其實韓式燒肉都有不經醃製嘅肉類，尤其是高級韓牛或者稀有部位，梗係要原汁原味嗒真啲！韓式燒肉有以下特點：
1, 只燒一種肉
去到韓國你會發現，一間傳統正宗燒肉店，只會獨沽一味供應牛肉、豬肉或者海鮮，唔似香港的韓燒餐廳，咩種類都有得食。
2, 以石燒為主
日式多以網燒，韓式燒海鮮時雖然都會用到網燒，燒肉就主要係石燒或者板燒居多。好處係受熱平均，而唔會搶火將肉燒焦。
3, 大量蔬菜
韓國人注重飲食均衡，燒肉時會有大量前菜如泡菜、醃漬蘿蔔及海帶等，更加有新鮮蔬菜如生菜及青瓜，又有洋葱醬汁、蒜頭及辣椒，可以連肉一齊食，減輕油膩感。
4, 新式食法
韓國飲食潮流經常受電視節目帶領，好似早前韓劇帶紅炸雞啤酒一樣！所以不時出現新派食法，好似拉芝、爐邊蒸雞蛋等，食法千變萬化。
5, 獨有燒豬皮
無論係邊種燒肉，食材都係不外乎係不同部位甚至內臟等。不過韓式燒肉有一款獨有的食材，日式燒肉係冇嘅，就係豬皮！燒完之後煙煙韌韌，點黃豆粉或者芝麻最正宗。
文：Perrins
相：Calvin Kwok
場地提供：炑八韓烤